Juan 19
19
1Tsënö niyaptinmi Jesústa Pilato astakëkatsirqan. 2Soldädukunanam kashapita corönata awëkur Jesúspa peqanman yakatsiyarqan. Tsënöllam granäti cäpata aqshutsiyarqan.#19.2 Granäti cäpataqa reykunallam yakakuyaq. 3Tsëpitanam Jesústa laqyar niyarqan: <<¡Alabashqa katsun Israel nunakunapa reynin!>>
4Tsëpitanam yapë yarqaramur Pilato nirqan: <<Käyikuyë. Apayämushqëki nunapa ima jutsantapis manam tarïtsu. Tsëmi jutsannaq kashqanta musyayänëkipaq jorqamushaq>>.
5Tsënö nirmi Jesústa jorqamurqan kasha corönan yakashqata y granäti cäpan yakashqata. Tsëmi Pilato nirqan: <<¡Rikäyë kë nunata!>>
6Rikëkurnam mandakuq sacerdötikunawan templu täpaq wardiakunapis qaparipa niyarqan: <<¡Crucifiquë! ¡Crucifiquë!>>
Tsënö niyaptinnam Pilato kënö nirqan: <<Qamkuna crucificäyë. Noqaqa manam ima jutsantapis tarïtsu>>.
7Tsënö niptinnam niyarqan: << <Diospa Tsurinmi kä> niqkunataqa wanutsiyänäpaqmi leynïkunachö nikan. ¡Tsënö nikaptinqa tsë nunaqa wanutsun!>>
8Tsënö niyaptinmi Pilato alläpa mantsakarqan. 9Tsëmi despächunman kutïkur Jesústa yapë kënö tapurqan: <<¿Qam mëpitataq kanki?>>
Tsënö tapuptin Jesús manam imatapis parlakurqantsu. 10Pilatunam nirqan: <<¿Manaku yaskimanki? Crucificätsinaqpaq o kacharinaqpaqpis mandakuq kashqäta ¿manaku musyanki?>>
11Jesúsnam nirqan: <<Qampa makikiman Teyta Dios mana churamaptinqa imata ruramänëkipaqpis manam poderniki kanmantsu. Tsëmi makikiman qoykamaq nuna qampita mas jutsayuq këkan>>.
12Tsënö niptinmi Pilato kacharita munarqan. Tsënö kaptinpis Israel nunakunapa autoridäninkunam qaparipa qayaripa kënö niyarqan: <<¡Kë nunaqa rey tukurmi mandakuq Césarpa contran këkan! ¡Pëta kacharirqa qampis Césarpa contranmi kanki!>>
13Tsënö niyaptinmi Jesústa waqtaman jorqaratsimur Gábata nishqan alarman ëwar Pilato täkurirqan. (Hebreo idiömachöqa Gábata nishqanqa <<llapsha rumikunawan rurashqa>> ninanmi.) 14Tsë höraqa karqan pullan junaqnönam. Tsë tardim Pascua fiestachö jamakï junaq qallëkunanpaqna karqan.#19.14 Israel nunakunapaqqa mushuq junaq qallëkurqan las seis de la tardim. Tsëchömi Pilato kënö nirqan: <<¡Reynikikunata rikäyë!>>
15Pëkunanam qaparipa niyarqan: <<¡Wanutsun! ¡Wanutsun! ¡Crucifiquë!>>
Pilatunam nirqan: <<¿Reynikikunataku crucificätsishaq?>>
Mandakuq sacerdötikunanam niyarqan: <<¡Noqakunapa reynïkunaqa Césarllam! ¡Pëpita mas juk reyqa manam kantsu!>>
16Tsënö niyaptinmi munayashqannö Jesústa crucificäyänanpaq soldädukunata Pilato entregarqan. Tsënam Jesústa jeqaratsiyarqan.
Jesústa crucificäyanqan
Mateo 27.32-44; Marcos 15.21-32; Lucas 23.26-43
17Cruzta katarkatsirmi Calavëra niyashqan sitiuman Jesústa apayarqan. Hebreo idiömachöqa Calavëra niyashqanta Gólgota niyanmi. 18Tsëman chëkatsirnam Jesústa crucificäyarqan. Tsënöllam ishkan nunakunatapis Jesúspa lädunkunaman crucificäyarqan.
19Tsëpitanam juk letrëruta qellqarir cruzpa puntanman Pilato clavatsirqan. Tsë letrëruchömi nirqan: <<Nazaretpita Jesús, Israel nunakunapa reynin>>.
20Jerusalénpita amänullachö crucificashqa kayaptinmi tsë letrëruta Israel nunakuna atskaq leyiyarqan. Tsë letrëruqa hebreuchö, latínchö y griego idiömakunachömi qellqararqan. 21Tsëmi mandakuq sacerdötikuna Pilatuta kënö niyarqan: << <Israel nunakunapa reynin> nirqa ama qellqarätsuntsu. Tsëpa rantinqa <Israel nunakunapa reynin kashqantam kë nunaqa nirqan> nirlla qellqarätsun>>.
22Pilatunam nirqan: <<Qellqashqäqa qellqashqanam këkan>>.
23Crucificärirnam Jesúspa ratashninkunata chuskuq soldädukuna rakinakuyarqan. Rurin kaq ratashnin costürannaq kaptinmi 24niyarqan: <<Këtaqa ama rachishuntsu, sinöqa mëqantsikpis apakunapaq sortiyarishun>>.
Tsënö rurayaptinmi Teyta Diospa palabran kënö nishqan cumplikärirqan: <<Ratashnïtapis rakinakuyashqam. Mëqanpis apakunanpaqmi sortiyayashqa>>.#Sal. 22.18. Tsë nishqannöllam soldädukuna rurayarqan.
25Crucificarëkashqan kaqchömi këkäyarqan Jesúspa maman, mamanpa nanan, Cleofaspa warmin María y María Magdalenapis. 26Mamanta y kuyashqan discïpulun nöpanchö këkaqta rikëkurnam Jesús kënö nirqan: <<Mäma, pënam wawëki kanqa>>.
27Tsëpitanam kuyashqan discïpuluntapis nirqan: <<Kananqa pënam mamëki cuenta kanqa>>.
Tsënö nishqanpita patsam wayinman pushakur mamänintanö rikarqan.
Jesús wanunqan
Mateo 27.45-56; Marcos 15.33-41; Lucas 23.44-49
28Llapanpis cumplishqana kashqanta musyarmi Teyta Diospa palabran cumplinanpaq Jesús kënö nirqan: <<¡Yakunämi!>>#Sal. 69.21.
29Tsëchömi järra junta vinagri këkarqan. Tsëmi hisöpu qoraman esponjata watarkur tsë vinagriman tullpurkur Jesúspa shiminman churayarqan. 30Tsë vïnuta llamirirnam Jesús nirqan: <<Llapanpis cumplikärishqam>>.
Tsënö nirirnam wanurirqan.
Jesústa tuksinqan
31 Pascuachö jamakï junaq qallëkunanpaqna kaptinmi#19.31a Pascuaqa qallëkurqan las seis de la tardim. Israel nunakunapa autoridäninkuna munayarqantsu pipis crucificarëkar quedananta. (Pascuachö jamakï junaqqa alläpa sagrädum karqan.) Tsëmi Pilatuta mañayarqan cruzchö jipakïkaqkunapa chankankunata pakikacharkur cruzpita jorquyänanpaq.#19.31b Crucificarëkaqpa chankankunatam pakiyaq ras wanurinanpaq. Pakiriyaptinmi derechakëta mana puëdir ras wanuriq. 32Mañakuyashqanta äniriptinnam soldädukuna ëwar Jesúswan crucificarëkaqkunapa chankankunata pakikacharkuyarqan. 33Jesús wanushqana këkaqta rikarnam pëpa chankankunataqa pakiyarqannatsu. 34Tsëpa rantinmi juk soldädu lanzawan qasqunpa tuksïkurqan. Tuksïkuptinmi yawarwan yaku juklla yarqaramurqan.
35Llapan tsëkunatam rikarqä. Tsëmi imanö kashqantapis qellqëkä salvamaqnintsik Cristo kashqanta qamkunapis creyiyänëkipaq. Llapan qellqashqäkunaqa rasun kaqmi këkan. 36Teyta Diospa palabranmi nin: <<Manam ni juk tullunllapis pakishqatsu kanqa>>.#Éxo. 12.46; Núm. 9.12; Sal. 34.20.
Llapan tsëkuna pasarqan Teyta Diospa palabran cumplikänanpaqmi. 37Tsënöllam Teyta Diospa palabran nin: <<Tuksiyashqantam rikäyanqa>>.#Zac. 12.10.
Jesústa pampayanqan
Mateo 27.57-61; Marcos 15.42-47; Lucas 23.50-56
38Tsëpitanam Arimatea markapita José shutiyuq nuna Pilatuta rowakur nirqan: <<Jesúspa ayanta pampanäpaq qoykamë>>.
Josépis Jesúspa discïpulunmi karqan. Discïpulun karpis Israel autoridäkunata mantsarmi musyatsikurqantsu. Mañakushqanta Pilato äniriptinmi Jesúspa ayanta pampaq apakurqan. 39Tsëmanmi Nicodemupis ëwarqan kima arröbanö mïrra y áloe takushqata#19.39 Mïrra karqan montipa weqinmi. Áloepis karqan juk qoram. Tsëkunatam Israel nunakuna tsakirkatsir qochqu aqayaq. Tsëtam ayaman winayaq mana asyänanpaq. aparkur. Nöpatam Nicodemo tutapëllapa Jesúswan parlaq ëwarqan.#Juan 3.1-2. 40Israel nunakunapa costumbrinkunamannömi Joséwan Nicodemo tsë apayashqankunata säbanaman jichëkur Jesúspa ayanta wankuyarqan.
41Jesústa crucificäyashqan lädunchömi karqan juk huerta. Tsëchömi karqan pitapis manaraq pampayashqan mushuq sepultüra.#Mat. 27.60. 42Jamakï junaq qallananpaqna kaptinmi tsë sepultürallamanna Jesústa pampayarqan.
Currently Selected:
Juan 19: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.