Juan 15
15
Üvaspa troncunman Jesús iwalatsikunqan
1Tsëpitanam Jesús kënö nirqan: <<Noqam rasunpa kaq üvaspa troncun kä.#Sal. 80.8-16; Isa. 5.1-7. Teytänam üvas uryaq. 2Mëqan rämäpis mana wayuptinqa Teytämi muturinqa. Mana wayuqkunata muturirpis wayuq kaqtaqa mas wayunanpaqmi shumaq llümapanqa#15.2 Wakin nunakunaqa römapanqa niyanmi.. 3Alli rämata llümapaptin limpiu kashqannömi qamkunapis nishqäkunata chaskikur jutsëkikunapita limpiuna këkäyanki.
4<<Noqawan juknölla kawayë. Tsënö kawayaptikiqa noqapis qamkunawan juknöllam këkäshaq. Troncunchö mana këkaq räma manana wayushqannömi qamkunapis noqawan mana juknölla karqa Teyta Dios munashqannö kawëta puëdiyankitsu.
5<<Noqaqa üvaspa troncunmi kä. Qamkunanam rämäkuna kayanki. Tsëmi noqawan juknölla kawarqa alli wayuq rämanö këkäyanki. Noqawan juknölla mana kawarqa ima rurëtapis manam puëdiyankitsu. 6Pipis noqawan juknölla mana kawarqa jawanpita mutushqa rämanömi tsakiriyanqa. Tsakiriyaptinnam ëllurir ninaman jitëkuyanqa.
7<<Noqawan juknölla karqa y yachatsiyashqaqnö kawarqa llapan mañakayämashqëkitam chaskiyanki. 8Tsënöpam alli wayuq üvasnö kar rasunpa discïpulükuna këkäyanki. Tsënö kawayaptikim Teytäta alabayanqa.
9<<Teytä kuyamashqannömi noqapis qamkunata kuyayaq. Tsënö kuyëkäyaptiqqa qamkunapis kuyayämë. 10Mandamientükunata cumplirqa rasunpam kuyëkäyämanki. Tsënöllam noqapis Teytäta kuyar mandamientunkunata cumplï. 11Tsëkunata niyaq noqa kushishqa kawashqänö qamkunapis kushishqa kawayänëkipaqmi.
12<<Mandamientüqa këkan qamkunata kuyayashqaqnö jukniki juknikipis kuyanakuyänëkipaqmi.#Juan 13.34; 15.17; 1Juan 3.23; 2Juan 5. 13Rasunpa kuyakuq kaqqa yanasan rëkur wanurpis wanurinmanmi. 14Llapan nishqäkunata cäsukurqa qamkunapis yanasämi kayanki. 15Sirwikuq kayashqëkita mananam niyashqëkinatsu. Sirwikuqtaqa manam patronnin willapantsu imata yarpashqantapis. Tsënö kaptinpis yanasantaqa llapan yarpashqantam willan. Tsënöllam qamkunatapis yanasä kayaptiki Teytä nimashqankunata llapanta willapäyarquq.
16<<Manam qamkunatsu akrayämarqunki, sinöqa noqam qamkunata akrayarquq. Tsënö akrayarquq mëpa ëwarpis alli wayuq rämanö kar allikunata rurayänëkipaqmi y tsë rurayashqëkikuna imëpis këkänanpaqmi. Tsënö kawakuyaptikim noqapa shutïchö imatapis mañakuyashqëkita Teytä qoyäshunki. 17Mandamientü ima nishqantapis yapëmi niyaq: Jukniki jukniki kuyanakur kawayë.
Jesúsman markäkuqkunata chikiyänanpaq ninqan
18<<Nunakuna chikiyäshuptiki ama llakiyëtsu. Tsëpa rantin käyikuyë puntata noqatapis chikiyämashqanta. 19Jutsata rurar kawayaptikiqa Diosta mana cäsukuq nunakuna kuyayäshunkimanmi. Tsënö kaptinpis Teyta Dios munashqannö kawayaptikim chikiyäshunki.#Juan 17.14-18. Pë munashqannö kawayänëkipaqmi qamkunata akrayarquq.
20<<Yarpäyë qamkunata kënö niyashqaqta: <Sirwikuqqa manam patronninpita mas mandakuqtsu këkan>.#Mat. 10.24; Luc. 6.40; Juan 13.16. Tsë nishqänöllam noqata chikikämarqa qamkunatapis chikiyäshunki. Noqa nishqäkunata chaskimarqa qamkuna niyashqëkitapis chaskiyäshunkim. 21Noqa rëkur chikiyäshunki kachamaq Teytäta mana reqirmi.
22<<Kë patsaman shamur mana willapaptïqa manam jutsayuqtsu kayanman.#15.22 Tsënö nirqa Jesucristo kënömi nirqan: Kë patsaman shamur mana willakuptïqa noqaman mana creyikayämashqanpita nunakuna manam jutsayuq kayanmantsu karqan. Diospa willakïninta willapaptï mana chaskikurmi jutsayuq këkäyan. 23Noqata chikimaq kaqqa Teytätapis chikinmi.
24<<Pipis mana rurashqan milagrukunata pëkunapa nöpanchö rurëkaptïpis chikiyämarmi jutsayuq këkäyan. Noqata chikimarqa Teytätapis chikiyanmi. Tsë milagrukunata mana ruraptïqa manam jutsayuqtsu kayanman karqan. 25Leyninkunachöpis kënömi nikan: <Jutsannaq këkaptïpis nunakuna chikiyämashqam>.#Sal. 35.19; 69.4. Tsë nishqannöllam llapanpis cumplikëkan.
26<<Teytä kaqpita Yanapakuqta kachamuptïmi noqapaq nunakunata musyatsinqa. Tsë Yanapakuqqa rasun kaqta käyitsikuq Espíritu Santum këkan. 27Tsënöllam qamkunapis qallananpita patsa noqawan purishqa kar noqapaq musyatsikuyanki.
Currently Selected:
Juan 15: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.