Juan 13
13
Discïpulunkunapa chakinta Jesús paqanqan
1 Pascua fiesta manaraq qallaptinmi Jesúsqa musyarqanna kë patsapita Teytan kaqman ewkunanpaqna kashqanta. Tsënö kaptinpis pëman creyiqkunataqa imëpis kuyashqannöllam kuyarqan.
2Discïpulunkunawan Jesús manaraq cënayaptinmi Simónpa tsurin Judas Iscariotita diablu yarpënin qoshqana karqan Jesústa rantikunanpaq. 3Jesús musyarqanmi llapantapis munëninman Tëtan churashqanta. Jina musyarqanmi pë kaqpita shamushqanta y pë kaqman kutikunanpaq kashqanta. 4Mikïkäyashqanpita sharkurnam mantunta qoturir toällata tseqllanman watakurqan. 5Tsëpitanam lavatoriuman yakuta winarir discïpulunkunapa chakinta paqar qallëkurqan. Paqarirnam tseqllanta toällata jorqurir tsakitsipurqan.
6Simón Pedrupa chakinta paqananpaq këkaptinnam Pedro nirqan: <<Teyta, ¿imanöpataq qamqa chakïta paqamunkiman?>>
7Jesúsnam nirqan: <<Imanir paqashqäta kanan mana käyirpis tsëpitaran käyinki>>.
8Pedrunam nirqan: <<Teyta, chakïta manam imëpis paqamunkitsu>>.
Jesúsnam nirqan: <<Chakikita mana paqamuptïqa manam discïpulütsu kanki>>.
9Tsënam Simón Pedro nirqan: <<Teyta, tsënö kaptinqa ama chakïllataqa paqamïtsu, sinöqa makïtapis peqätapis paqëkallämï>>.
10Jesúsnam nirqan: <<Pipis bañakushqana karqa chakinllatanam paqakun. Qamkunaqa jutsëkikunapita limpiunam këkäyanki. Tsënö karpis manam llapëkitsu limpiu këkäyanki>>.
11Tsënö nirqan juk discïpulun pëta rantikunanpaq kashqanta musyarmi.
12Discïpulunkunapa chakinta paqar usharirnam qotushqan mantunta yakakurir mësaman yapë täkurirqan. Tsëpitanam nirqan: <<¿Käyiyankiku imanir chakikikunata paqamushqäta? 13Yachatsikuq kashqäta y Señorniki kashqäta niyämar rasun kaqtam niyanki. 14Noqa yachatsikuqnikikuna y Señornikikuna këkar chakikikunata paqëkämuptïqa qamkunapis kikikikunapura chakikikunata paqapänakuyanki. 15Tsënö rurarqü noqata rikämar qamkunapis rurayänëkipaqmi.#13.15 Tsë witsanqa esclävukunallam pipatapis chakinta paqapuyaq. Tsëmi kë textuchö Jesucristo nirqan esclävunö humillakur juknintsik juknintsik yanapanakunantsikpaq.#Mat. 20.28; Mar. 10.45; Luc. 22.27. 16Rasunpam rasunpam niyaq: Sirwikuqqa manam patronninpita mas mandakuqtsu këkan.#Mat. 10.24; Luc. 6.40; Juan 15.20. Tsënöllam willakuq ëwaqpis kachaqninpita mas puëdiqtsu.#13.16 Tsënö nirmi Jesucristo käyitsirqan patronnin këkarpis esclävu cuenta yanapashqannö discïpulunkunapis esclävu cuenta nuna mayinta yanapayänanpaq. 17Kë niyashqaqta käyir cumplirqa kushishqam kawayanki.
18<<Manam llapëkipaqtsu tsënö nikä. Noqa musyämi mëqan discïpulükunata akrashqätapis. Teyta Diospa palabranpis kënömi nikan: <Noqawan juntu mikïkarpis conträmi shärishqa>.#Sal. 41.9. Tsë qellqarëkaqqa cumplikanqam. 19Manaraq cumplikaptinmi qamkunata willapëkäyaq tsënö kananpaq kashqanta. Tsëmi nishqänölla cumplikaptin musyayanki noqa kashqäta#13.19 Noqa kashqäta nirqa Jesucristo käyitsirqan kikin Dios kashqantam. Tsëpita masta musyanëkipaq leyinki Éxo. 3.14; Juan 10.30-33..
20<<Rasunpam rasunpam niyaq: Kachashqäkunata chaskiqkunaqa noqatam chaskiyäman. Noqata chaskimaqkunaqa kachamaqnïtapis chaskiyanmi>>.#Mat. 10.40; Mar. 9.37; Luc. 9.48; 10.16.
Judas rantikunanpaq kanqanta willakunqan
Mateo 26.20-25; Marcos 14.17-21; Lucas 22.21-23
21Tsënö nirirmi Jesús alläpa llakikur nirqan: <<Rasunpam rasunpam niyaq: Qamkunapita juknikim prësu tsariyämänanpaq entregamanqa>>.
22Mëqanpaq nikashqantapis mana musyarmi discïpulunkuna jukninpis jukninpis rikänakuyarqan. 23Tsë höram Jesúspa kuyë discïpulun lädunchö këkarqan. 24Pëtam Simón Pedro sëñasta rurarqan mëqanpaq parlëkashqantapis Jesústa tapunanpaq. 25Tsëmi kuyashqan discïpulun Jesúspa pëchunman witïkur tapurqan: <<Teyta, ¿mëqäkunapaqtaq nikanki?>>
26Jesúsnam nirqan: <<Tantata ushmarkatsir makyashqä kaqmi kanqa>>.
Tsënö nirmi tantata ushmarkatsir Simónpa tsurin Judas Iscariotita tsarätsirqan. 27Tsë tantata chaskiriptinmi Judasman Satanás yëkurqan. Tsënam Jesús kënö nirqan: <<Ruranëkipaq kaqta juklla rurë>>.
28Tsënö niptinpis manam mëqan discïpulunpis imanir tsënö nikashqanta käyiyarqantsu. 29Qellëta tsaraq kaptinmi wakin yarpäyarqan Pascua fiestapaq rantipakuq Jesús kachëkashqanta. Wakinnam yarpäyarqan waktsakunata yanapananpaq kachëkashqanta. 30Tantata mikurirnam Judasqa juklla ewkurqan. Tsë höraqa patsa tutapashqanam karqan.
Mushuq mandamientuta Jesús yachatsikunqan
31Judas yarquriptinnam Jesús kënö nirqan: <<Höra chämushqanam Nunapa Tsurin glorificashqa kananpaq#13.31 Glorificashqa kananpaq kashqanta nirqa Jesucristo wanunanpaq, kawarimunanpaq, Teyta Diosman kutikunanpaq y llapanpaqpis poderyuq kananpaq kashqantam nirqan.. 32Teyta Diosta Nunapa Tsurin glorificaptinmi#13.32 Teyta Diosta Nunapa Tsurin glorificaptinmi nishqanqa Teyta Dios munashqannö wanukuptïmi ninanmi. Nunapa Tsurintapis Teyta Dios glorificanqa. Manaraqpis ëkächömi tsënö glorificanqa.
33<<Kuyë wamräkuna, qamkunapita ewkunäpaqnam këkä. Israel autoridäkunata nishqänöllam qamkunata niyaq: Ashimarpis noqa ëwashqä kaqman manam ëwëta puëdiyankitsu.#Juan 7.34.
34<<Qamkunata kuyayashqaqnö jukniki juknikipis kuyanakuyanki. Kë nishqäkunaqa mushuq mandamientum këkan.#Juan 15.12, 17; 1Juan 3.23; 2Juan 5. 35Tsënö kuyanakuyaptikim pïmëpis musyayanqa discïpulükuna kayashqëkita>>.
Pedro negananpaq kaqta Jesús willakunqan
Mateo 26.31-35; Marcos 14.27-31; Lucas 22.31-34
36Simón Pedrunam tapurqan: <<Teyta, ¿mëtataq ewkunki?>>
Jesúsnam nirqan: <<Noqa ëwashqä kaqman manam kanan ëwayankiraqtsu. Tsëpitaran ëwayanki>>.
37Pedrunam nirqan: <<Teyta, ¿imanirtaq qamwan kanan ëwämantsu? Qam rëkurqa wanurïmanpismi>>.
38Tsëmi Jesús kënö nirqan: <<¿Rasunpaku noqa rëkur wanurinëkipaq listu këkanki? Rasunpam niq: Gällu manaraq cantaptinmi kima kuti negamanki>>.
Currently Selected:
Juan 13: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.