Juan 10
10
Üshakunapa duëñunman Jesús iwalatsikunqan
1Mastam Jesús kënö nirqan: <<Rasunpam rasunpam niyaq: Üshakunapa kanchanman pipis punkunpa mana yëkurqa suwam y ranchadormi. 2Punkunpa yëkuq kaqqa üshapa duëñunmi këkan. 3Pëtam üsha täpakuq nuna punkuta kichapan. Üshapa duëñunqa üshankunata shutinpa shutinpa qayarmi kanchanpita jorqun. 4Üshakuna yarqurnam duëñunpa parlëninta reqir qepanta ëwayan. 5Mana duëñun kaptinqa manam qepanta ëwayantsu, sinöqa shiminta mana reqirmi wakpa këpa ewkuyan>>.
6Iwalatsikïpa Jesús tsënö yachatsikuptinmi nunakuna käyiyarqantsu imata yachatsikushqantapis. 7Tsëmi Jesús kënö nirqan: <<Rasunpam rasunpam niyaq: Noqam üshakunapa kanchanpa punkun kä. 8Manaraq shamuptï puntata shamuqkunaqa llapanpis suwam#10.8 Tsënö parlar Jesucristo käyitsirqan Cristo tukuqkunapaqmi. kayarqan. Tsëmi üshakuna pëkunata wiyayarqantsu. 9Noqaqa kanchapa punkunmi këkä. Punkupa yëkuq kaqqa salvakunqam. Pëkunaqa yëkur y yarqurpis alli qewatam tariyanqa. 10Suwaqa shamun suwakunanpaq, wanutsinanpaq y ushakätsinanpaqmi. Noqam sï shamurqü nunakunata alli kawëta qonäpaq.
11<<Noqam alli mitsikuq nuna kä. Alli mitsikuqqa üshankuna rëkurmi wanurinmanpis. 12Qellë rëkurlla mitsikuq kaqqa löbu shamïkaqta rikëkurmi üshankunata jaqirir ewkun. Tsënö ewkun duëñun mana karmi. Tsëmi löbu yëkïkur tsariptin wakin üshakuna mëtsëpapis ëqir ewkuyan. 13Qellë rëkurlla mitsikuq kaqqa üshakunata mana ankuparmi ëqir ewkun.
14-15<<Noqaqa alli mitsikuq nunam kä.#Isa. 40.11; Eze. 34; Luc. 15.4-5; Heb. 13.20. Teytäta reqishqänö y pë reqimashqannömi#Mat. 11.27; Luc. 10.22. noqapis üshäkunata reqï y üshäkunapis reqiyäman. Tsëmi üshäkuna rëkurqa wanurishaqpis. 16Manam këllachötsu üshäkuna këkäyan, sinöqa maspis juk lädukunachö këkäyanmi. Pëkunapis parlënïta reqirmi wiyayämanqa. Tsëmi pëkunatapis ëllumushaq juk kanchallachöna kayänanpaq. Tsënöpam jukllëllana mitsiqninkuna kanqa.#Efe. 2.11-22.
17<<Üshäkuna rëkur wanunäpaq kaptï y kawarimunäpaq kaptïmi Teytä kuyaman. 18Noqa puëdiqmi këkä wanunäpaq y kawarimunäpaqpis. Tsëmi kikï mana munaptïqa pipis wanutsimanqatsu. Wanunäpaq y kawarimunäpaqmi Teytä nimashqa>>.
19Jesús tsënö parlëkuptinmi Israel nunakuna yapë kikinpura piñatsinakuyarqan.#Juan 7.12-13, 40-43. 20Tsëmi wakin kënö niyarqan: <<Pëchö supë kaptinmi löcuyashqa këkan. ¿Imapaqtaq wiyashunpis?>>
21Wakinnam niyarqan: <<Supë löcuyätsiptinqa manam tsënö parlanmantsu. Jina wisku nunata manam kachakätsinmantsu karqan>>.
Jesúsman mana creyiyanqan
22Tamya killachömi Jerusalénchö templupa fiestan karqan. 23Tsëmi templuman yëkur Salomón nishqan alarchö#10.23 Wakin nunakunaqa corredorchö niyanmi. Jesús purikaptin 24Israel nunakuna ëllukärir tapuyarqan: <<¿Imëyaqtaq shuyayashqëki rasun kaqta willayämänëkipaq? Teyta Dios kachamushqan Cristo karqa juklla willayämë>>.
25Jesúsnam nirqan: <<Qamkunata willayarquqnam. Willëkäyaptiqpis y Teytäpa shutinchö milagrukunata rurëkaptïpis manam creyiyämankitsu. 26Tsënö creyiyämankitsu üshäkuna mana karmi.
27<<Üshäkunaqa voznïta wiyarmi qatiyäman. Noqapis pëkunata reqïmi. 28Wiñë kawëtam pëkunata qoykushaq. Imëpis manam ushakäyanqatsu.#10.28 Imëpis manam ushakäyanqatsu nishqanqa infiernuman manam jitashqatsu kayanqa ninanmi (Mat. 10.28; Juan 3.16; Apoc. 20.14; 21.8). Pëkunataqa podernïpita manam pipis qochimanqatsu. 29Teytämi pëkunata makïman churamushqa. Llapanpitapis puëdiq kaptinmi ni pipis Teytäpa makinpita qochinqatsu. 30Teytäwan noqaqa juknöllam kayä>>.
31Tsënö niptinmi tsë autoridäkuna Jesústa yapë tsampikïta munayarqan. 32Jesúsnam nirqan: <<Qamkuna rikäyarqunkim atska milagrukunata Teytäpa munëninwan rurashqäta. ¿Mëqan milagru rurashqäpitataq tsampimëta munayanki?>>
33Tsëmi kënö niyarqan: <<Manam allita rurashqëkipitatsu tsampiyënikita munayä, sinöqa Diospa contran parlashqëkipitam.#Lev. 24.16. Qamqa nunalla këkarmi Dios tukïkanki>>.
34Jesúsnam nirqan: <<Leynikikunachöpis kënömi qellqarëkan: <Noqam nirqä: <<Qamkunaqa dioskunam#10.34 Nunakunata juzgayänanpaq Teyta Dios churashqa kaptinmi autoridäkunata hebreo idiömachö dios kayanqanta niyaq. kayanki>> >.#Sal. 82.6. 35Teyta Diospa palabran nishqankunaqa rasun kaqllam këkan. Unë nunakunata käyitsir Teyta Dios tsënö nikaptinqa 36¿imanirtaq <Diospa Tsurinmi kä> niptï llutanta nishqäta yarpäyanki? Kikin Teyta Diosmi kë patsaman kachamashqa.
37<<Rurashqäkuna Teytä munashqannö mana kaptinqa ama creyiyämëtsu. 38Pë munashqannö kaptinqa creyiyämë. Niyashqaqkunata wiyëkarpis mana creyirqa milagru rurashqäkunata rikëkarqa creyiyämë. Tsënöpam käyiyanki noqachö Teytä kashqanta y pëchö noqa kashqäta>>.
39Tsënö niptinmi yapë prësu tsarita munayarqan. Tsëmi safar 40Jordán mayu tsimpanman kutikurqan. Tsëchömi puntata Juan bautizarqan.#Juan 1.28. 41Jesús tsëchö këkashqanta musyarmi atskaq nunakuna tsëman ëwëkur kënö niyarqan: <<Juanqa manam ima milagrutapis rurarqantsu. Tsënö kaptinpis Jesúspaq nishqankunaqa llapanpis rasun kaqllam këkan>>.
42Tsëchömi atskaq nunakuna Jesúsman creyikuyarqan.
Currently Selected:
Juan 10: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.