Amós 9
9
Teyta Dios juzgaptin pipis mana safananpaq ninqan
1Teyta Diostam revelacionchö rikëkurqä altarpa nöpanchö shëkur kënö nimuqta:
<<Templupa columnankunata tsaktë numbralkunapis karkaryanqanyaq.
Tsënöpam nunakuna jananman templu juchumunqa.
Tsëpita safaqkunata espädawan wanutsiptï manam jukllëllapis salvakunqatsu.
2Patsa rurinman ratakuyaptinpis jorqamushaqmi.
Ciëluman witsäyaptinpis urätsimushaqmi.#Sal. 139.7-12; Jer. 23.23-24.
3Carmelo jirkaman ratakuyaptinpis ashi ashïkurmi tsarimushaq.
Lamar rurinman ratakuyaptinpis jatun culebrawanmi kanitsishaq.
4Juk lädu markaman contrankuna prësu apakuyaptinpis espädawanmi wanutsishaq.
Israel nunakunataqa mëchö rikarpis yanapanäpa rantinqa castigashaqmi>>.
5Llapanta mandaq Teyta Dios kë patsata yatëkuptinmi tsullurinqa.
Tsëmi jinantin Israel nacionchö täraq nunakuna waqakuyanqa.
Imëka Nilo mayu bunyëpa bunyar ëwaqnöran patsapis umaman y uraman kuyunqa.
6Teyta Diosqa ciëluchömi wayin rurashqa.
Patsa jananchö azulyarëkaqtapis pëmi kamashqa.
Pëmi pukutëtapis lamarpita shäritsir patsaman tamyatsimun.
Shutinpis Yahwehmi këkan.
7 Teyta Diosmi nin:
<<Israel nunakuna, qamkunata kuyanqaqnöllam Etiopía nunakunatapis kuyä.
Imanömi qamkunata Egiptupita jorqayämurqaq tsënömi filisteo nunakunatapis Caftor islapita jorqamurqä.
Aram nunakunatapis Kir partipitam jorqamurqä.
8<<Noqa rikëkämi Israel nacionchö täraqkuna jutsata pasëpa rurayanqanta.
Tsënö kayanqan rëkurmi tsë nacionta ushakätsishaq.
Tsënö kaptinpis Jacobpita miraqkunata wakintaqa manam ushakätsishaqtsu>>.
Teyta Diosmi tsënö nin.
9<<Trïguta cerniyashqannömi Israel nunakunatapis llapan nación nunakunatawan cernishaq.
Gränu kaqkuna pasayaptinpis gransa kaqkuna mana pasaqnömi jukllëllapis mana cäsumaqkuna castïgupita safanqatsu.
10Mana cäsumaq kaqkunataqa llapantapis espädawanmi wanutsishaq.
<Manam imapis pasamäshuntsu> niqkunaqa llapanmi ushakäyanqa>>.
Israel nacionta yapë shäritsiyänanpaq Teyta Dios ninqan
11<<Tsë witsanmi Davidpa wayin juchutsishqa kaptinpis yapë shäritsishaq.#9.11 Davidpa wayinpaq parlarqa Davidpita miraq reykunapaqmi parlëkan. Davidpa wayin juchutsishqa kashqanta nirqa Davidpita miraqkuna manana reykuna kayashqantam nikan. Yapë shäritsishaq nishqanqa Davidpa castanpita rey kananpaq yapëmi churashaq ninanmi.
Unë kashqannö yapë kananpaqmi raqrankunata tsapashaq y juchutsishqa kaqkunata altsashaq.
12Tsënö rurashaq kawëkar quedaq edomita nunakunapis Israel nunakunapa munëninchö kayänanpaqmi.
Tsënöllam shutïta sumätsiq kaq wakin nacionkunapis munëninchö kayanqa>>.
Teyta Diosmi tsënö nin.
Pëmi tsëkunata ruranqa.#Hech. 15.16-18.
13 Teyta Diosmi nin:
<<Shamuq watakunachö trïgu ëllïtapis manaraq ushayaptinmi murï tiempuna chärinqa.
Üvasta jalïtapis manaraq ushayaptinmi üvas plantapakï tiempuna chärinqa.
Jirkakunapapis mayunöran vïnu atska ëwanqa.
14Karu nacionchö kayanqanpitam kuyanqä Israel nunakunata kutitsimushaq.
Kutïkamurmi juchushqa markakunata altsarir tsëchö täräyanqa.
Yapë plantayanqan üvaspitam vïnutapis upuyanqa.
Murukuyanqan alli wayuptinmi mikïninkunapis tsëtsika kanqa.
15Kikinkunapa nacionninman kutitsiptïmi imëyaqpis tsëchö täräyanqa.
Tsëpitaqa pipis mananam qarqunqanatsu.
Noqa kuyashuqniki Teyta Diosmi tsënö kananpaq nï>>.
Currently Selected:
Amós 9: qwhB
Highlight
Copy
Compare
Share
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
