3 Juan 1
1
Apóstol Juan napakunqan
1Kuyë wawqi Gayo:#Hech. 19.29; Rom. 16.23; 1Cor. 1.14.
Noqam anciänu kar rasunpa kuyarniki kë cartata cartakamü.
2Kuyë wawqi, Teyta Diostam mañakïkä alli kawashqëkinö llapanchöpis alli kanëkipaq y alli saloryuq kanëkipaq. 3Jesucristo yachatsikushqannölla kawëkashqëkita wawqikuna chämur willayämaptinmi alläpa kushikurqü.#2Juan 4. 4Teyta Dios munashqannö wamräkuna#1.4 Wamrankunapaq parlarqa markäkuq mayinkunapaqmi parlarqan. kawëkäyashqanta musyarir alläpam kushikü.
Gayo yanapakuq kanqanpita Juan kushikunqan
5Kuyë wawqi Gayo, juk lädupita shamuq wawqikunata yanapar allitam rurëkanki. 6Pëkunam këman chämur kuyakuq kashqëkita ëllukäyashqächö willayämashqa. Tsëmi yapë kutiyämuptinpis juk markaman ëwayänanpaq yanapëkullanki. Tsënö ruraptikim Teyta Diospis kushikunqa. 7Pëkunaqa Jesucristupa alli willakïninta willakur purirmi Teyta Diosta mana cäsukuq nunakunataqa imatapis mañakuyantsu. 8Tsëmi Teyta Diospa willakuqninkunataqa yanapanantsik. Tsënöpam pëkunawan willapäkuqnö kashun.
Diótrefes mana cäsukuq kanqan
9Willakur puriqkunata yanapanantsikpaq käyitsikurmi juk cartata qamkunaman cartakamurqü. Tsënö këkaptinpis Diótrefes manash cäsumantsu. Pëqa mandakuq këninman markäkurshi munashqanta rurakïkan. 10Tsëshi noqakunapa wasäkunapis rimar purikan. Karupita shamuq wawqikunatapis manash chaskintsu. Posadatsita munaqkunatapis mana posadatsiyänanpaqshi michan. Michëkaptin posadatsiptinqa ëllukäyashqëkipitash qarqurin. Tsënö rurashqanpitam shamurnin imaqa piñapäshaq.
Demetrio cäsukuq kanqan
11Kuyë wawqi Gayo, ama qamqa Diótrefesnö këtsu. Tsëpa rantinqa allillata rurë. Allita ruraq kaqqa Diospa wamranmi. Mana allita ruraq kaqqa Diosta manam reqintsu.#1Juan 2.29; 3.6, 9-10. 12Demetriupaqqa Teyta Diospa willakïnin nishqannö kawashqantam llapan nunakunapis parlayan. Tsënö kawashqantaqa noqakunapis rikäyarqümi. Y musyayanqëkinöpis noqakunaqa rasun kaqllatam parlayä.
Cartapa ushanan
13Maspis kanran käyitsiyänaqpaq. Tsënö kaptinpis cartallachöqa manachi llapanta qellqamümantsu. 14Kikï shamurnam mastaqa käyitsiyashqëki.#2Juan 12.
15Teyta Diospa munëninchö alli kawanëkipaq yanapëkulläshï. Këchö reqishuqnikikunam napayäshunki. Qampis tsëchö reqinqäkunata napëkullë.
Currently Selected:
3 Juan 1: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.