2 Corintios 7

1Kuyë wawqikuna y panikuna, Teyta Dios tsënö nikämashqaqa llapan jutsantsikkunata jaqirishun. Jutsata rurarmi cuerpuntsiktapis espïrituntsiktapis rakchatantsik. Tsënö këkaptinqa Teyta Diosta mantsakur pë munashqannö imëpis kawakushun.

Pablupa yachatsikïninta cäsukuyanqan

2Wawqikuna y panikuna, yarpëkalläyämëri. Qamkunata manam mëqëkitapis mana allita rurayarquqtsu ni ulipäyarquqtsu ni engañayarquqtsu. 3Tsënö niyaq manam manakaqpaq churayarnikitsu, sinöqa nöpata niyashqaqnöpis qamkunata kuyayarnikim. Tsëmi imëpis mana qonqëta yarparëkäyaq. 4Niyashqaqkunata chaskiyänëkipaq kashqanta käyirmi qamkunaman markäkü. Tsëmi ima pasamaptinpis llakikunäpa rantin alläpa kushikü.

5Macedonia provinciaman chäyashqäpita patsam jamëtapis tariyarqütsu. Tsëpa rantinmi nunakuna conträkuna shäriyaptin y qamkunapaq y Titupaq yarpakachar alläpa llakikuyarqü. 6Tsënö këkäyaptïmi Tito chämuptin llakishqa këkaqkunata kushitsiq Teyta Dios kushitsiyämashqa. 7Manam Tito chämushqanllapitatsu kushikuyarqü, sinöqa qamkuna kaqpita Tito kushishqa kutimushqanpitapis kushikuyarqümi. Pëmi willayämashqa qamkunaman watukaq shamunäta munëkäyashqëkita, piñatsinakushqantsikpita llakikuyashqëkita y noqapaq yarpakachëkäyashqëkitapis. Tsënö willayämaptin masran kushikuyarqü.

8Apatsimushqä cartata leyir llakikuyashqëkita musyarpis manam llakikütsu. Qellqamushqä höram sï alläpa llakikurqä cartachö niyashqaqta leyir llakikuyänëkipaq kashqanta musyar. 9Kananqa alläpam kushikü. Manam qamkunata llakitsiyashqaqpitatsu kushikü, sinöqa käyikur Teyta Diosta cäsukuyashqëkipitam. Cartata apatsiyämushqä manam manakaqllapaqtsu kashqa, sinöqa Teyta Dios munashqannö llakikuyänëkipaqmi.

10Teyta Dios munashqannö llakikurqa jutsa rurëta jaqirintsikmi. Jutsa rurëta jaqiriqkunatam Teyta Dios perdonan. Tsënö perdonta tarirqa manam llakikuntsiknatsu, sinöqa kushikuntsikmi. Tsënö kaptinpis mana creyiqkunaqa llakikurpis jutsa rurëta mana jaqirqa wanushqanömi këkäyan.

11Teyta Dios llakikïman churayäshushqëki allipaqmi kashqa. Tsëmi kananqa perdonta mañakayämarqunki, conträ nunapaq piñakuyarqunki, Teyta Diosta cäsukïkäyanki, noqawan tinkïtana munëkäyanki, noqapaq yarpakachëkäyanki y jutsayuq nunata piñapäyarqunki. Tsënö kayaptikim käyikuyä llapanta sitiunman churayashqëkita.

12Tsë apatsimushqä carta manam conträ shäriq nunata corrigiyänëkillapaqtsu ni noqa kushikunällapaqtsu kashqa, sinöqa käyitsiyashqaqta chaskikur rasunpa kuyayämashqëkita [y noqapis kuyayashqaqta] Teyta Diospa nöpanchö käyiyänëkipaqmi. 13Kuyayämashqëkita musyarmi alläpa kushikuyarqü. Tsënö kaptinpis masran kushikuyarqü Tituta alli chaskiyashqëkipita y kallpatsayashqëkita kikin willayämaptin.

14Manaraq qamkuna kaqman Tito shamuptinmi pëta kallpatsarqä <<pëkuna allim chaskiyäshunki>> nir. Tsë nishqänöllam llapanpis kashqa. Tsëmi qamkunata imëpis rasun kaqta nishqänö qamkunapaq pëta nishqäkunapis rasun kaqlla kashqa. 15Kananqa Titupis qamkunapaqmi yarparëkan cäsukuyashqëkipita y pëta alli chaskikuyashqëkipita. 16Tsënöllam markäkïpaqna kayashqëkipita noqapis kushikü.

Currently Selected:

2 Corintios 7: qwhB

Highlight

Copy

Compare