2 Corintios 6
6
1Willapäkuqnin karmi qamkunata rowayaq ankupäkuq Teyta Diosta mana wasqitupäyänëkipaq. 2Palabranchöpis kënömi qellqarëkan:
<<Ankupashqä höram mañakamashqëkita wiyarqü.
Salvanäpaq kaq junaqmi yanaparquq>>.#Isa. 49.8.
Teyta Dios ankupäyäshunëki höraqa kanan höram këkan. Teyta Dios salvayäshunëki junaqqa kanan junaqmi këkan.
Jipanqanpita Pablo willakunqan
3Noqakuna willakuyashqäta pipis manakaqpaq mana churayänanpaqmi imatapis llutantaqa rurayätsu. 4Tsëpa rantinqa Teyta Diosta sirwiq kayashqäta käyikuyänanpaqmi pë munashqannölla kawayä imanö jiparpis, imäkuna pishiptinpis, alläpa llakirpis, 5astayämaptinpis, carcelman llawitsiyämaptinpis, maqayämaptinpis, utiyanqanyaq willakurpis y punïta mikïta mana tarirpis. 6Tsënöllam Teyta Diosta sirwiq kayashqäta käyikuyänanpaq jutsata mana rurashpa kawayä, willakïninta shumaq käyikuyä, chikiyämaqnïkunata perdonayä, pïmëtapis ankupäyä, Espíritu Santupa poderninchö kawayä, pïmëtapis kuyayä, 7Diospa willakïninta willakuyä y pë yanapayämaptin imatapis allita rurayä. Conträ shäriyaptinpis pë munashqannömi allillata rurayä.
8Wakin nunakunam alli rikäyäman y wakinnam mana alli rikäyäman. Jina wakinmi favornïkuna parlayan y wakinnam conträkuna parlayan. Rasun kaqllata parlayaptïpis ulikuyashqätam yarpäyan. 9Wakinqa reqiyämarpis manam reqiq tukayämantsu. Wanuyashqäta yarpäyaptinpis kawëkäyäran. Chikiyämar jipatsiyämarpis manam wanutsiyämashqatsu. 10Llakishqa karpis kushishqallam kawëkäyä. Waktsa karpis atskaqta rïcuyätsiqnömi këkäyä.#6.10 Atskaqta rïcuyätsiqnömi këkäyä nishqanqa atskaqtam willapäyä Jesucristupa alli willakïninta imëka riquëzatanö chaskiyänanpaq ninanmi. Mana imëkayuq karpis imëkayuqnömi këkäyä.
11Corintuchö täraq wawqikuna y panikuna, llapan shonqükunawan kuyayarnikim imatapis mana pakëpa llapan yarpäyashqäta willapäyarquq. 12Qamkunata kuyayarniki mana qonqëta yarparëkaptiqqa ¿imanirtaq qonqëkayämarqunki? 13Tsëmi wamräkunatanö niyaq: Noqakuna kuyayashqaqnö qamkunapis kuyayämar yarpëkalläyämë.
Teyta Diospa templun kanqantsik
14Wawqikuna y panikuna, musyayashqëkinöpis manam pipis törutawan ashnuta yüguntsu. Tsënöllam qamkunapis Jesucristuta mana chaskikuqkunawan yügukäyankimantsu. Alli rurëpis manam mana alli rurëwan iwalantsu. Aktsi kashqanchöpis paqas manam kantsu. 15Jesucristupis Belialwan#6.15 Belialqa Satanásmi këkan. manam käyinakuyantsu. Tsënöllam Jesucristuta chaskikuqkunawan mana chaskikuqkunapis käyinakuyantsu. 16Tsënöllam Teyta Diospa templunman ïdulukunata tätsiyashqan allitsu këkan. Noqantsikqa wiñëpa kawaq Teyta Diospa templunmi këkantsik.#1Cor. 3.16; 6.19. Palabranchömi Teyta Dios nin:
<<Pëkunawanmi täräshaq.
Pëkunawanmi purishaq.
Pëkunapa Diosninkunam kashaq.
Pëkunam kuyashqä nunakuna kayanqa>>.#Lev. 26.12; Eze. 37.27.
17Jina kënöpis palabranchö nikanmi:
<<Jutsata ruraq nunakunapita witikuyë.
Pëkunapita yarqukuyë.
Imatapis impüruyätsikuqkunata ama yatayëtsu.
Tsënö kawayaptikim chaskiyashqëki.#Isa. 52.11.
18Qamkunapa tëtëkim kashaq.
Qamkunanam wamräkuna kayanki.
Llapanpaq poderyuq Teyta Dios karmi tsënö nï>>.#2Sam. 7.14; 1Crón. 17.13; Jer. 31.9.
Currently Selected:
2 Corintios 6: qwhB
Highlight
Copy
Compare
Share
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
