2 Corintios 5

Mushuq cuerputa chaskinantsikpaq ninqan

1Musyantsikmi kë cuerpuntsik ushakaptinpis mana ushakaq mushuq cuerputa Teyta Dios qomänantsikpaq kashqanta. Kë patsachöqa cuerpuntsik ushakaq tsukllanöllam këkan. Gloriachönam mushuq cuerpuntsik Teyta Dios rurashqan alli wayinöna kanqa. 2Kë patsachö kawashqantsikyaqqa mushuq cuerputa juklla chaskita munarmi yarpakachar llakikuntsik. 3Mushuq cuerputa chaskirqa manam qalapächunötsu kashun, sinöqa alli ratashllashqanönam kashun.

4Kë patsachö cuerpuntsik ushakaqlla kaptin llakikurpis manam wanïta munantsiktsu, sinöqa cuerpuntsik mana ushakaq cuerpuman juklla tikranantam munantsik. 5Mana ushakaq cuerpuyuq kanantsikpaqmi Teyta Dios kamamarquntsik. Mushuq cuerputa chaskinantsikpaq kashqanta musyanantsikpaqmi Espíritu Santuta qomarquntsik.

6Tsëmi Teyta Diosman imëpis markäkuntsik. Musyantsikmi kë patsachö kashqantsikyaqqa Teyta Diosta manaraq rikashqantsikta. 7Pëta manaraq rikarpis pëmanmi markäkuntsik. 8Pëman markäkurmi cuerpuntsikta jaqirir nöpanman juklla chëta munantsik. 9Tsëmi kawarpis o wanurpis Teyta Dios munashqannö kawanantsikpaq imëpis tïrantsik.

10Jesucristupa nöpanman chärishqam llapantsikta juzgamäshun.#Rom. 14.10. Kë patsachö kawashqantsikyaq allita o mana allita rurashqantsikpitam premiutapis o castïgutapis chaskishun.

Teyta Dioswan nunakuna amishtayänanpaq willakuyanqan

11Señor Jesucristo juzgamänantsikpaq kashqanta musyarmi pëta mantsakur willakïninta imanöpapis willakïkäyä. Teyta Dios musyanmi pëta sirwikäyashqäta. Tsëtaqa qamkunapis käyiyankimanmi. 12Tsënö nikä manam yachaq kayashqäta alabakurtsu, sinöqa Teyta Diospa willakuqnin kayashqäta käyir kushikuyänëkipaq y pipis conträ parlaptin noqaman qaqäyänëkipaqmi.

Tsë conträ shäriqkunaqa yachaq tukurpis janan shonqullam Teyta Diosta sirwiyan. 13Löcu kayashqäta niyaptinpis Teyta Diosta sirwiyänä rëkurmi löcu nishqapis kayä. Alli yarpëyuq kayanqäta niyaptinpis qamkunata yanapayänaq rëkurmi alli yarpëyuq kayä. 14Imanö niyämaptinpis noqakunaqa Jesucristo kuyamashqantsikta käyirmi wanï kawë pëta sirwiyä. Tsënö sirwiyä Jesucristo llapantsik rëkur wanushqanta musyarmi. Noqantsik rëkur wanuptinmi llapantsikpis jutsa rurëpaq wanushqanöna këkantsik. 15Manam kikintsik munashqantsikllata rurar kawanantsikpaqtsu Jesucristo wanushqa, sinöqa pë munashqannöna kawanantsikpaqmi. Pëqa wanurpis noqantsik rëkurmi kawarimushqa.

16Tsënö kaptinmi Diosman mana markäkuq nunakunanöqa pipaqpis llutanta yarpäyätsu. Nöpataqa noqakunapis mana markäkuq nunakunanöllam Jesucristupaq llutanta yarpäyarqä. Kananqa manam tsënönatsu yarpäyä. 17Pipis Jesucristuchö karqa mushuq kamashqan nunanam këkan.#Gál. 6.15; Efe. 4.24; Tito 3.5; 1Ped. 1.3, 23. Unë kawëqa pasashqanam. Kananqa llapanpis mushuqnam këkan.

18Tsënö kanantsikpaq kikin Teyta Diosmi permitishqa. Pëmi Jesucristo noqantsik rëkur wanuptin perdonamarquntsik. Tsënöllam nunakuna pëwan amishtayänanpaq willakïninta willakuyänäpaq churayämashqa. 19Tsë willakïqa kënömi nikan: Jesucristuchömi Teyta Dios karqan nunakunata jutsankunapita perdonar kikinwan amishtananpaq. Tsë willakïta willakuyänäpaqmi churayämashqa.

20Tsëmi noqakunaqa Jesucristupa willakuqninkuna këkäyä. Willakuqnin karmi Teyta Dios rowakuqnö Jesucristupa shutinchö pïmëtapis kënö nir rowayä: ¡Teyta Dioswan amishtakï! 21Jutsannaq karpis llapan jutsantsiktam Jesucristuman Teyta Dios jitarkushqa. Tsëmi jutsayuq nunanö noqantsik rëkur wanuptin pëchö kashqa Teyta Dios jutsannaqtanö chaskimantsik.

Currently Selected:

2 Corintios 5: qwhB

Highlight

Copy

Compare