2 Corintios 4

Teyta Diospa willakïninta Pablo willakunqan

1Teyta Dios ankupäyämar willakïninta willakuyänäpaq churayämashqa kaptinmi conträ shäriyaptinpis llakikuyätsu. 2Noqakuna manam imatapis llutankunata ni penqakïpaq kaqkunata rurayätsu. Manam pitapis engañayätsu ni Teyta Diospa willakïninman kikïkunapa yarpënïkunata yapayätsu. Tsëpa rantinqa willakïninta pïmëpis musyayänanpaqmi Teyta Dios munashqannö kawakuyä.

3Tsënö kaptinpis infiernuman jitashqa kayänanpaq kaqkunaqa willakuyashqäta manam chaskikuyantsu. 4Pëkunaqa chaskikuyantsu kë patsachö këkaq dios#4.4 Kë patsachö këkaq diosqa Satanásmi këkan. yarpëninkunata upayätsishqa kaptinmi. Tsëmi Jesucristupa willakïnin aktsinö këkaptinpis pëkunaqa mana rikaq cuenta kar tsë willakïninta käyiyantsu. Jesucristuchömi Teyta Dios imanö kashqantapis käyintsik.

5Manam noqakunapa munënïkunachö kawayänëkipaqtsu willakuyä, sinöqa Señor Jesucristupa munëninchö kawayänëkipaqmi. Noqakunaqa Jesucristuta sirwir qamkunapa sirwiqnikikunanöllam këkäyä. 6Tsënö këkäyä chipapëkaq aktsitanö alli willakïninta shonqükunaman Teyta Dios churamushqa kaptinmi. Tsënö churamushqa kë patsata kamar tutapëchö atsikyë kananpaq nishqannöllam.#Gén. 1.3. Tsëmi Teyta Dios imanö kashqantapis Jesucristuchö shumaq käyikäyä.

Pablo jipakïninkunachö willakunqan

7Tsë alli willakïqa shonqükunachö këkan allpa mankachö alläpa väliq riquëza këkaqnömi. Noqakuna allpa mankanölla karmi kikïkunapa podernïkunawantsu willakuyä, sinöqa Teyta Diospa poderninwanmi. 8Tsëmi imanö jipatsiyämaptinpis mana ajayashpa willakïkäyä. Ima rurëta mana puëdirpis manam alläpaqa llakikuyätsu. 9Chikiyämaptinpis Teyta Dios manam jaqiyämantsu. Conträ shäriyaptinpis Diosllamanmi imëpis markäkuyä. 10Mëpa ëwayaptïpis Jesucristo jipashqannö jipayashqätam nunakuna rikäyäman. Pëta cäsuyaptïmi ichikllapatsu wanuratsiyämanpis. Tsënöpam nunakuna käyiyan wanïpita salvamänanpaq Jesucristo puëdiq kashqanta. 11Jesucristupa willakïninta willakushqäpita wanutsiyämëta munayaptinpis Jesucristo noqakunawan kawashqanmi musyakëkan. 12Tsëmi wanï janäkunachö kaptinpis wiñë kawëta tariyänëki rëkur willakïkäyä.

13Teyta Diospa palabranchömi kënö qellqarëkan: <<Pëman markäkurmi willakurqü>>.#Sal. 116.10.

Tsë qellqarëkashqannöllam noqakunapis Teyta Diosman markäkur willakïninta willakïkäyä. 14Pëman markäkurmi musyantsik Señor Jesucristuta kawaritsimushqannö kawarirkatsimarnintsik lädunman pushamänantsikpaq kashqanta. 15Tsëmi imanö jiparpis salvakuyänëkipaq willakuyä. Tsënöpam wakin nunakunatapis Teyta Dios ankupar salvaptin jinantinchö pëta payllä nikur alabayanqa.

16Tsëmi Teyta Diospa willakïninta mana ajayëpa willakuyä. Awkinyashqa cuerpuntsik lasaptinpis shonquntsikchöqa waran waranllam mas jövinnö këkantsik. 17Kë patsachö kashqantsikyaq jiparpis gloriachö wiñëpa kawanantsikpaqmi alistakïkantsik. Tsë kawëmanqa manam imapis kë patsachö kaqkuna iwalantsu. 18Manam kë patsachö kawanantsikllapaqtsu yarpakachantsik, sinöqa gloriachö kawanantsikpaqmi. Kë patsachö kawëqa ushakaqllam këkan. Gloriachö kawakïqa wiñëpa wiñëninmi kanqa.

Currently Selected:

2 Corintios 4: qwhB

Highlight

Copy

Compare