2 Corintios 3

Corintuchö täraq wawqikuna y panikuna recomendación cartanö kayanqan

1Tsënö niptï ama yarpäyëtsu chaskiyämänëki rëkur parlayashqäta. Jina ama yarpäyëtsu chaskiyämänëkipaq recomendación cartataraq wanayashqäta. Wakin nunakuna recomendación cartata puritsiyaptinpis qamkuna chaskiyämänëkipaqqa manam wanayätsu. Tsënöllam juk markaman chäriyaptï chaskiyämänanpaq qamkunapita recomendación cartata wanayätsu. 2Tsëpa rantinmi shonqükunachö qellqarëkaq recomendación cartaqa qamkuna këkäyanki. Tsë cartataqa pïmëpis leyiyanmi.#3.2 Tsënö nirmi Pablo kënö nirqan: Recomendación cartä mana kaptinpis willakuyashqäpita Jesucristuta chaskikuyashqëkita musyarmi pïmëpis musyayan apóstol kashqäta. 3Tsënöpam nunakuna musyayan willakuyashqäta chaskir Jesucristo qellqashqan carta kayashqëkita. Tsë cartataqa manam tintawantsu qellqashqa, sinöqa wiñëpa kawaq Teyta Diospa Espïritunwanmi. Tsënöllam llapsha rumichötsu#Éxo. 24.12. qellqashqa, sinöqa shonqïkikunachömi.#Jer. 31.33; Eze. 11.19; 36.26.

4Tsënö këkäyashqëkitam musyayä Jesucristo salvayämashqanpita Teyta Diosman markäkur. 5Willakuyänäpaq manam yachaq kayashqämantsu markäkuyä, sinöqa Teyta Diosmanmi. 6Pëmi yanapayäman mushuq pactupaq#Jer. 31.31. willakuyänäpaq. Tsë mushuq pactuqa manam leykunapa poderninchö kawanantsikpaqtsu nikämantsik, sinöqa Espíritu Santu käyitsimashqantsiknö kawanantsikpaqmi. Leykunapa poderninchö kawarqa wanushqanömi kawantsik.#Rom. 7.1-6. Espíritu Santupa poderninchö kawarqa wiñë kawëtam tarintsik.

Moisés qellqanqan leykunapitapis Jesucristupa willakïnin mas alli kanqan

7Llapsha rumichö qellqarëkaq leykuna nunakunata salvananpaq mana këkaptinpis tsë leykunata Israel nunakunaman Moisés chätsiptinmi qaqllan alläpa chipaparqan. Tsë chipapashqan ushakaqlla këkarpis alläpam chipaparqan.#Éxo. 34.29. Tsëmi Moiséspa qaqllanta rikëta puëdiyarqantsu. 8Moisés apamushqan leykunapis tsënö kushikïpaq këkaptinqa ¿manaku Espíritu Santu apamushqan willakï mas kushikïpaq këkan? 9Mana salvakunantsikpaq këkarpis tsë leykuna alli këkaptinqa salvamänantsikpaq kaq willakï mas allim këkan. 10Tsë leykunaqa Espíritu Santu apamushqan willakïman manam iwalantsu. 11Tsëmi ushakänanpaq kaq leykuna kushikïpaq kaptinpis Jesucristupa mana ushakaq willakïnin mas kushikïpaq këkan.

12Tsëta musyarmi mana mantsakushpa willakuyä. 13Manam Moisésnötsu Diospa willakïninta willakuyä. Pëqa qaqllan chipapashqan ushakëkashqanta Israel nunakuna mana rikäyänanpaqmi vëluwan tsapakurqan.#Éxo. 34.33. Tsënöpam leykuna ushakänanpaq kashqanta käyiyarqantsu.

14Moiséspa qaqllan tsaparashqannömi Israel nunakunapa yarpëninkunapis tsapashqanö këkan. Tsëmi punta kaq pactuta leyir kananyaqpis käyiyantsu juk tiempullapaq kashqanta. Jesucristuta chaskikurran shumaqqa käyikuyanqa. 15Moisés qellqashqan leykunata leyirpis manam kananyaqpis käyiyantsu. 16Tsënö kaptinpis Señornintsikta chaskikurqa käyikuyanqanam.

17Señornintsikqa Espíritu Santum këkan. Pëpa Espïritunta chaskikurmi librina këkantsik. 18Librina karmi Señornintsikta rikaqnö këkantsik. Tsëmi nunakuna rikämarnintsikpis kikin Señornintsikta rikaqnö këkäyan. Tsënöllam Señornintsikqa Espíritu kar waran waran yanapëkämantsik kikin kashqannö noqantsikpis kanantsikpaq.#Rom. 8.29; Gál. 4.19; Fil. 3.10.

Currently Selected:

2 Corintios 3: qwhB

Highlight

Copy

Compare