Juan 13
13
Nu nacatyá ra Jesús tsaha ra tsicá tsihin ra
1Tsa ndi cumañi ca iin quɨvɨ tan tahan tsi vico pascua, tsa tsitó maa ra Jesús tyin tsa cua tsaa hora tsa cua quita ra nu ñuhu ñayɨvɨ ihya tan cunuhu ra nu nyaá Jutu ra. Tacan ñi maa cuñí xaan ra tsi nyɨvɨ cuenda ra tsa iyó nu ñuhu ñayɨvɨ ihya. Tan vityin cua janaha ra tsi ñi tyin cuñí xaan ra tsi ñi tyin cua cúu ra tsa cuenda ñi.
2Tan cuxiñi̱ ra Jesús tsihin ra tsicá tsihin ra. Tan quɨhvɨ̱ nu ña vaha añima ra Judas Iscariote sehe ra Simón tan natyuhu̱ nu tsi ra na xico ra tsi ra Jesús tan cuhva cuenda ra tsi ra Jesús tsi nu xaan iñi tsi ra. 3Maa tyin ra Jesús tsitó ra tyin tsaha̱ Jutu ra tandɨhɨ tyiñu tsi ra tyin quɨhɨ ndaha ra. Tan tsitó ra tyin nu nyaá Nyoo quee̱ ra tan juvin ñi ndacan cua cunuhu nyico ra. Tan nyaá ra Jesús cuxiñí ra. 4Tacan tan nduvita̱ ra tan tava̱ ra jahma tsa nditsí ra ityi tsata, tan tsahñi̱ ra iin toalla tsitsi ra. 5Tacan tan tyihi̱ ra ndutya tsitsi iin tsicoho tan quitsaha̱ nacatyá ra tsaha ra tsicá tsihin ra. Tan jana ityi̱ ra tsaha ra naha tsihin toalla can.
6Tan tsa cua nacatya ra tsaha ra Simón Pedro tan catyí ra Simón tsihin ra:
―Jutu Mañi yu, ¿a yooho cua nacatya tsaha yu?
7Tacan tan catyí ra Jesús:
―Vityin ña cutuñí iñi un tsa javahá yu, maa tyin cutuñi iñi maa un nu cuahán ca tsi quɨvɨ.
8Maa tyin ra Pedro catyí ra tsihin ra:
―Ndi iin tsaha tan ña cua cuhva yu nacatya un tsaha yu.
Tan catyí ra Jesús tsihin ra:
―Tatun ña cua nacatya yu tsaha un, ñavin ca cuenda yu cua cuvi un.
9Tacan tan catyí ra Pedro tsihin ra Jesús:
―Tun tacan, Jutu Mañi yu, ñavin tsaha ñi yu nacatya un. Na̱catya nda cuanda ndaha yu tan jiñi yu ―catyí ra.
10Maa tyin catyí ra Jesús tsihin ra:
―Nyɨvɨ tsa ndi tsityi̱, ña cuñí tsi tsa ndoo nanɨɨ cahnu cuñu ñuhu ñi. Tsaha ña ñi cuñí tsi ndoo, tyin tsa ndoo maa nanɨɨ ñi. Nyooho tsa ndoo̱ maa ndo, vasu ña tandɨhɨ ndo ndoo̱ ―catyí ra Jesús.
11Caha̱n ra tsa ña tandɨhɨ ra naha ndoo tyin tsitó ra yóo cua xico tsi ra tsi nu xaan iñi tsi ra nahnu.
12Tsa yaha̱ nacatya̱ ra Jesús tsaha ra tsicá tsihin ra, tan tsinditsi̱ nyico ra jahma ra, tan tsinyaa̱ nyico ra inga tsaha nu mesa tan catyí ra tsihin ra naha:
―¿A cutuñí iñi nyooho tsa javaha̱ yu tsihin ndo? 13Nyooho caahán ndo tsihin yu, “Maestro tan Jutu Mañí yu”, tan nditsa tyin yacan cuví yu. 14Yuhu tsa cuví yu Ra Jacuahá tan Jutu Mañi ndo, nacatya̱ yu tsaha ndo, tan tacan cuñí tsi tsa nacatya tahan maa ndo tsaha ndo. 15Yuhu tsaha̱ yu iin cuhva tsi ndo tyin ja̱vaha ndo tumaa cuhva javaha̱ maa yu. 16Tsa nditsa catyí yu tsihin ndo tyin ndi iin musu tan ña cahnu ca cuví ra tan ñavin ca tsitoho ra. Tan ndi iin ra tsa cuahán tyiñu, tan ña cahnu ca cuví ra tan ñavin ca ra tsa tava̱ tyiñu tsi ra. 17Tatun cutuñí iñi ndo yacan, tan javahá ndo can, sɨɨ xaan cua coo ndo.
18’Ñavin tsa cuenda tandɨhɨ ndo caahán yu. Yuhu tsitó maa yu yóo nacatsi̱ yu. Maa tyin cuñí tsi tsa cuvi tumaa caahán tuhun Nyoo tyehen: “Ra tsa tsatsi̱ paan tsihin yu, juvin ra cua xico ñaha tsi yu tsi nu xaan iñi tsi yu”, catyí tsi nu tutu Nyoo. 19Caahán yu tyehen tsihin ndo tsa ndi cumañi ca cuvi can tyin quɨvɨ cua cuvi yacan, cua tsinu iñi ndo tyin yuhu cuví ra tsa iyó nda ndi cumañi ca coo tandɨhɨ tsa iyó. 20Tsa nditsa catyí yu tsihin ndo tyin nyɨvɨ naquihin vaha tsi nyɨvɨ tsa jacuhún yu tsi ñi, maa yu naquihin vaha ñi cuví can. Tan nyɨvɨ tsa naquihín vaha tsi yuhu, naquihín vaha ndɨhɨ ñi tsi ra tsa jaquitsi̱ tsi yu ―catyí ra Jesús.
Nu jacotó ra Jesús tyin cua xico ra Judas tsi ra tsi nu xaan iñi tsi ra nahnu
(Mt. 26.20-25; Mr. 14.17-21; Lc. 22.21-23)
21Tsa yaha̱ tsa caha̱n ra Jesús yacan, tan quitsaha̱ nducuiihyá xaan cuñi añima ra, tan catyí catsi ra:
―Tsa nditsa catyí yu tsihin ndo, tyin iin nyooho cua xico ndo tsi yu tsi nu xaan iñi tsi yu ―catyí ra Jesús.
22Tacan tan ra tsicá tsihin ra, quitsaha̱ nyehé nuu tahan ra naha, tan ña tsitó ra naha yóo tuhun caahán ra Jesús. 23Iin ra tsicá tsihin ra Jesús nyanaá ra tsi ra nu nyaá ra cuxiñí ra. Tan ra ican cuví ra tsa cuñí xaan ra Jesús. 24Tan ra Simón Pedro javaha̱ ra seña tsi ra can, na ndaca tuhun ra yoó tuhun caahán ra Jesús. 25Tacan tan ra ican tsinyaá naa ca ra tsi ra Jesús, tan tsica̱ tuhun ra tsi ra:
―Jutu Mañi yu, ¿yoó ra cuví ra tsa caahán un tuhun?
26Tan nacaha̱n ra Jesús tan catyí ra:
―Cua jatyii yu luxu paan, tan ra tsa cua cuhva yu itsi, ra ican cuví ra ―catyí ra.
Tacan tan quihi̱n ra luxu paan tan jatyii̱ ra, tan tsaha̱ ra tsi ra Judas Iscariote, sehe ra Simón. 27Tsa quihi̱n ra Judas paan can tan quɨhvɨ̱ nu ña vaha añima ra. Tacan tan ra Jesús catyí ra tsihin ra:
―Tsa tsicá iñi un javaha un, ja̱numi ja̱vaha can ―catyí ra Jesús tsihin ra Judas.
28Maa tyin ndi intuhun ra tsa nyecú nu mesa can, ña cutuñí iñi ra naha nacuenda caha̱n ra tacan tsihin ra can. 29Ra Judas cuví ra yɨhɨ́ ndaha yɨtɨn nu yɨhɨ́ xuhun, yacan cuenda yɨhɨ́ ra naha cuñi̱ maa ra naha tyin cuñí ra Jesús tsa cujata ra tsa tsiñí ñuhu tsi ra naha tsa cuenda vico can, a cuhva ra juhva xuhun can tsi nyɨvɨ ndaahvi, cuñi̱ maa ra naha. 30Tsa yaha̱ quihi̱n ra Judas paan can, tacan tan quita̱ ra. Tan tsacuaa cuví can.
Tyiñu tsaa tsa tava̱ ra Jesús tsi yo: tsa cuñi tahan yo tsi yo
31Tsa yaha̱ tsa cuahán ra Judas, tan catyí ra Jesús:
―Vityin cua nyehe nyɨvɨ tsa cahnu cuví yuhu Rayɨɨ tsa quee̱ nda gloria. Tan cua nyehe ñi tsa cahnu cuví Nyoo tsa cuenda yu. 32Tatun Rayɨɨ tsa quee̱ nda gloria jacahnú ra tsi Nyoo, tacan tucu Nyoo cua jacahnu ra tsi ra. Tsa tsaa̱ quɨvɨ cua jacahnu ra tsi ra. 33Sehe yu, ña naha ca cua cunyii yu tsihin ndo. Nyooho cua nanducu ndo tsi yu, maa tyin tumaa tsa caha̱n yu tsihin ra cuví ityi nuu tsihin yo nyɨvɨ Israel can naha ra, caahán yu tsihin ndo vityin, tyin ña cua cuvi cuhun ndo nu cua cuhun yu. 34Tsahá yu iin tyiñu tsaa tsi ndo: Cu̱ñi tahan ndo tsi ndo. Tumaa tsa cuñí maa yu tsi ndo, tacan cuñí tsi tsa cuñí tahan ndo tsi ndo. 35Tatun cuñí tahan ndo tsi ndo, tandɨhɨ nyɨvɨ tan cua coto ñi tyin nyɨvɨ nyicún tsi yu cuví ndo.
Nu caahán ra Jesús tyin ra Pedro cua cahan ra tyin ña nacotó ra tsi ra
(Mt. 26.31-35; Mr. 14.27-31; Lc. 22.31-34)
36Ra Simón Pedro tsica̱ tuhun ra tsi ra Jesús tan catyí ra:
―Jutu Mañi yu, ¿nu maa cua cuhun un? ―catyí ra.
Tan nacaha̱n ra Jesús tan catyí ra:
―Nu cuhun yuhu, ña cua cuvi cunyicún un tsi yu vityin. Maa tyin nu cuahán ca tsi quɨvɨ, tan cunyicun un tsi yu ―catyí ra Jesús.
37Tacan tan catyí ra Pedro tsihin ra:
―Jutu Mañi yu, ¿nácaa tsa ña cua cuvi cunyicun yu tsi un vityin? Tan tsa iyó vaha iñi yu tsa cuhva yu ñayɨvɨ yu tsa cuenda un ―catyí ra.
38Tan nacaha̱n ra Jesús tan catyí ra:
―¿A nditsa tsa cuhva un ñayɨvɨ un tsa cuenda yu? Tsa nditsa catyí yu tsihin un, tyin tsa ndi cumañi ca vacu tsaa tsitooho, yooho cua cahan un uñi tsaha tyin ña nacotó un tsi yu ―catyí ra Jesús tsihin ra Pedro.
Currently Selected:
Juan 13: mjc
Highlight
Share
Copy
Want to have your highlights saved across all your devices? Sign up or sign in
© 1994, Wycliffe Bible Translators, Inc. All rights reserved.