SAN JUAN 13
13
Mjyaꞌan Jesús kiyaꞌ neꞌ nu ngiꞌni xaꞌan chaꞌ ꞌin yu
1Ti ji tyukwa tsan chaꞌ ka taꞌa pascua kanꞌ; jlyo tiꞌ Jesús chaꞌ wa tiya ti bra ꞌin yu, chaꞌ tyoꞌo yu chalyuu re tyaa yu nde seꞌen ndiꞌin Ndiose Sti yu. Xkwiꞌ nsuꞌwi ꞌa chaꞌ tiye Jesús ñaꞌan yu ꞌin nten chalyuu nu wa yten chaꞌ ꞌin yu; loꞌo ñaꞌan ti nsuꞌwi ꞌa chaꞌ tiye yu ꞌin nten kanꞌ, sa ñaꞌan bra nu tyii chalyuu ꞌin yu.
2Ti kwiꞌ bra kanꞌ yꞌni kuneꞌ xaꞌan chaꞌ ngwiꞌya chaꞌ ke Juda sñiꞌ Simón Iscariote chaꞌ kuꞌni yu trisiyun ꞌin Jesús yaꞌ neꞌ xaꞌan. 3Jlyo tiꞌ Jesús chaꞌ nchga chaꞌ nu nsuꞌwi ꞌin Ndiose Sti yu wa nda Ni ꞌin yu. Loꞌo ngwañaꞌan jlyo tiꞌ yu chaꞌ wa mdoꞌo yu nde seꞌen ndiꞌin Ndiose mdiyan yu lo chalyuu re, loꞌo jlyo tiꞌ yu chaꞌ wa tyaa ti yu nde seꞌen ndiꞌin Ndiose xiyaꞌ. Ni siya jlyo tiꞌ Jesús nchga chaꞌ kanꞌ, 4mdyituun Jesús tuꞌwa msaa laja nu nchku siin neꞌ, ngulo yu teꞌ tukwin nu ndukuꞌ yu, msñi yu xka teꞌ chaꞌ skanꞌ yu siꞌ yu. 5Bra kanꞌ msuꞌwa yu tyiꞌa niꞌ siꞌyuu, ndyaa jyaꞌan yu kiyaꞌ neꞌ nu ngiꞌni xaꞌan chaꞌ ꞌin yu, mxtyi yu kiyaꞌ neꞌ loꞌo teꞌ nu nchkanꞌ siꞌ yu.
6Bra nu mdiyan Jesús seꞌen ndukwa Tyu Simón, ykwiꞌ Tyu loꞌo yu bra kanꞌ:
―¿Nuꞌwin a?, yu kula. ¿Ta jyaꞌaan kiyaǎnꞌ a? ―ndukwin Tyu ꞌin yu.
7―Ja nchka biyaꞌ tiiꞌ ni, ni sa ñaꞌan tñan ngiꞌniǐn nde ―ndukwin Jesús ꞌin yu―, chunꞌ ndiꞌin la chinꞌ ka biyaꞌ tiiꞌ chaꞌ kanꞌ.
8―¡Ja kaja chabiyaꞌ jyaꞌaan kiyaǎnꞌ siyaꞌ ti! ―ndukwin Tyu ꞌin Jesús.
―Ja ka xuꞌwi chaꞌ ꞌiin loꞌoǔn si ja jyaꞌaǎn kiyaaꞌ ―ndukwin Jesús ꞌin Tyu bra kanꞌ.
9―Suꞌwe sikwa, yu kula ―ndukwin Tyu Simón bra kanꞌ―. Ni siꞌi kiyaǎnꞌ tiǎn jyaꞌaan sikwa, loꞌo yaǎnꞌ loꞌo keěn jyaꞌaan.
10―Luwi ꞌa tyukwi ñaꞌaan nan xa wa ytaan chku ―ndukwin Jesús bra kanꞌ―, ja ndiꞌin chaꞌ kataan chku xiyaꞌ bra kanꞌ. Kiyaanꞌ tian katen bra nu stean niꞌ ñaꞌan. Loꞌo ꞌwan, ni siya luwi ꞌa kasiya ꞌwan, ti ndiꞌin xka yu loꞌo wan nu ja luwi ꞌa kasiya ꞌin yu.
11Bra nu ndukwin Jesús: “Ndiꞌin xka yu loꞌo wan nu ja luwi ꞌa kasiya ꞌin yu”, ykwiꞌ yu ngwañaꞌan chaꞌ wa jlyo tiꞌ yu ti ka lka nu kuꞌni trisiyun ꞌin yu yaꞌ neꞌ xaꞌan.
12Bra wa mdyii mjyaꞌan Jesús kiyaꞌ neꞌ, xiyaꞌ ykuꞌ yu steꞌ yu, loꞌo ndyaa tukwa yu tuꞌwa msaa. Ykwiꞌ yu loꞌo neꞌ bra kanꞌ:
―¿Ngwa biyaꞌ tiꞌ wan nan lka nu yꞌniǐn bra nu mjyaꞌaǎn kiyaꞌ wan ngwañaꞌan a? ―ndukwin yu―. 13“Mstru” ndukwin wan ꞌñaǎn; “Xꞌnan ba” ndukwin wan ꞌñaǎn, loꞌo chañi ꞌa chaꞌ kanꞌ. Ti kwiꞌ ngwañaꞌan lkaǎn chaꞌ ꞌwan ―ndukwin yu―. 14Naꞌ nu lkaǎn Xꞌnan wan, naꞌ nu lkaǎn Mstru ꞌwan ni, wa mjyaꞌaǎn kiyaꞌ wan; kanꞌ chaꞌ ndiꞌin chaꞌ jyaꞌan wan kiyaꞌ taꞌa wan kwiꞌ ngwañaꞌan ―ndukwin yu―. 15Ngwa tiǎnꞌ chaꞌ kuwe tiꞌ wan xa nu ñaꞌan wan mjyaꞌaǎn kiyaꞌ taꞌa wan, chaꞌ sa ñaꞌan nu yꞌniǐn bra kanꞌ, bra nu mdayaǎnꞌ ꞌwan, ngwañaꞌan ndiꞌin chaꞌ kuꞌni wan loꞌo taꞌa wan ―ndukwin Jesús ꞌin neꞌ nu ngiꞌni xaꞌan chaꞌ ꞌin yu―. 16Chañi chaꞌ nu nchkwiǐnꞌ loꞌo wan, chaꞌ ti kwiꞌ nten nu lka xꞌnan neꞌ, kanꞌ nka ndloo ꞌin neꞌ, siꞌi msu nu nka ndloo; loꞌo nten nu ndlo tñan ꞌin neꞌ chaꞌ tsaa neꞌ lo kichen, kanꞌ nka ndloo la, siꞌi neꞌ nu ndyaꞌan lo kichen ti. 17Wa ngwa biyaꞌ tiꞌ wan nchga chaꞌ nu tka ykwiǐnꞌ tiǎn loꞌo wan ni, kanꞌ chaꞌ suꞌwe ꞌa ka tiye wan xa nu tukwa wan chaꞌ kanꞌ ―ndukwin Jesús―.
18’Ja nchkwiǐnꞌ chaꞌ ꞌin nchga wan. Jlyo tiǎnꞌ ti nten ka nu ngulo suwiǐn chaꞌ kuꞌni xaꞌan neꞌ chaꞌ ꞌñaǎn ―ndukwin Jesús―. Ti sꞌni ndukwa ska chaꞌ ꞌin Ndiose lo kityi kula nu nchkwiꞌ: “Ti kwiꞌ yu kanꞌ nu suꞌwa nchku tyaja loꞌoǔn, kanꞌ lka nu nxuun loꞌoǔn ni” ngwañaꞌan ndukwin kityi kanꞌ; loꞌo jlyo tiǎnꞌ chaꞌ ndiꞌin chaꞌ ka chaꞌ kanꞌ ―ndukwin Jesús―. 19Wa ykwiǐnꞌ chaꞌ re loꞌo wan ni, xa nu ti ji ka chaꞌ kanꞌ; bra wa ngwa ngwañaꞌan, bra kanꞌ ka tsaa ñaꞌan tiꞌ wan ꞌñaǎn, chaꞌ chañi chaꞌ lkaǎn skaǎn tiǎn nu lka Sñiꞌ Ndiose, chañi chaꞌ mdiyaǎn lo chalyuu, sa ñaꞌan nu niǐn ꞌwan. 20Chañi chaꞌ nu chkwiǐnꞌ loꞌo wan ni ―ndukwin yu―, xa nu kunan wan chaꞌ nu nchkwiꞌ ska nten nu msuꞌwaǎn chaꞌ kan seꞌen ndiꞌin wan, bra kanꞌ suꞌwa ndyoꞌo chaꞌ ñaꞌan tiꞌ si kunan wan chaꞌ ꞌñaǎn; loꞌo xa nu kunan wan chaꞌ ꞌñaǎn, bra kanꞌ suꞌwa ndyoꞌo chaꞌ ñaꞌan tiꞌ si kunan wan chaꞌ nchkwiꞌ Stiǐn Ndiose nu msuꞌwa ꞌñaǎn ndijyaǎn lo chalyuu re.
Ytsaꞌ Jesús ꞌin neꞌ ti ka nu kuꞌni trisiyun ꞌin yu yaꞌ neꞌ xaꞌan
21Bra nu wa ykwiꞌ Jesús ngwañaꞌan, tiꞌí niꞌ kasiya ꞌin yu chaꞌ xiꞌin ꞌa tiꞌ yu. Ykwiꞌ yu loꞌo neꞌ kanꞌ:
―Chañi ꞌa chaꞌ nu chkwiǐnꞌ loꞌo wan ni, chaꞌ ndiya ska yu taꞌa ndaꞌan wan nu kuꞌni trisiyun ꞌñaǎn yaꞌ yu xaꞌan ―ndukwin Jesús bra kanꞌ.
22Nduwe ꞌa tiꞌ neꞌ nu ngiꞌni xaꞌan chaꞌ ꞌin yu, naꞌan tloo taꞌa ti neꞌ bra kanꞌ; ja ndiꞌya neꞌ kwenta siyaꞌ ti sa ñaꞌan chaꞌ nu ykwiꞌ yu. 23Mskwa ska yu lo kaꞌ kwiꞌ seꞌen ti loꞌo Jesús; suꞌwe ꞌa nsuꞌwi tiye Jesús ñaꞌan ꞌin yu kiꞌyu kanꞌ, 24kanꞌ chaꞌ yꞌni chkan ti Tyu Simón ꞌin yu kanꞌ, mnichaꞌ ꞌin yu:
―¿Ni sa ñaꞌan nchka tiꞌ yu kula chkwiꞌ yu bra nu ykwiꞌ yu ngwañaꞌan a?
25Kanꞌ chaꞌ ndyaa xñi tloo yu kanꞌ kwiꞌ seꞌen la seꞌen ndukwa Jesús bra kanꞌ. Mnichaꞌ yu ꞌin Jesús:
―Xꞌnaǎn, ¿ti ka lka nu kanꞌ a? ―ndukwin.
26―Nde ñaꞌan kuꞌniǐn ―ndukwin Jesús ꞌin yu bra kanꞌ―. Taꞌaǎn sa yuꞌwe tyaja ꞌñaǎn niꞌ kaꞌnan skwa re ni. Nten nu taǎn yuꞌwe tyaja kanꞌ ꞌin chaꞌ ku, kanꞌ lka nu niǐn ꞌwan.
Loꞌo mdaꞌan Jesús sa yuꞌwe tyaja niꞌ kaꞌnan, mda ꞌin ran ꞌin Juda, sñiꞌ Simón Iscariote bra kanꞌ. 27Bra wa msñi Juda tyaja kanꞌ, ti kwiꞌ bra kanꞌ yten kuneꞌ xaꞌan nu naan Satanás, ndyaa niꞌ kasiya ꞌin Juda kanꞌ. Ykwiꞌ Jesús loꞌo yu bra kanꞌ:
―Yaa lyaa lo kichen ꞌiin, chaꞌ kuꞌnii tñan nu ndiꞌin chaꞌ kuꞌnii.
28Loꞌo ja ska nu ndukwa tuꞌwa msaa ngwa biyaꞌ tiꞌ ni chaꞌ ykwiꞌ Jesús loꞌo Juda ngwañaꞌan. 29Ti kwiꞌ Juda ngwa nu ngwiꞌya kwijin tñi seꞌen nu ska tlyu ti nsuꞌwi tñi ꞌin taꞌa neꞌ; kanꞌ chaꞌ ndiya neꞌ kanꞌ nu mskeꞌ tiꞌ chaꞌ wa ngulo Jesús tñan ꞌin yu, chaꞌ tsaa yu xiꞌi yu ska nan nu kunanjoꞌo ꞌin neꞌ chaꞌ ka taꞌa. Loꞌo xka ta neꞌ mskeꞌ tiꞌ neꞌ chaꞌ ndiya ska tñan ꞌin Juda, chaꞌ tsaa loꞌo yu lomstan chaꞌ ta yu ꞌin neꞌ tiꞌi. 30Kanꞌ chaꞌ xa wa mdyii yku Juda tyaja kanꞌ, bra ti mdoꞌo yu ndyaa yu ni siya tla bra kanꞌ.
Ska tñan kwi nu ndloo la ꞌñaan chaꞌ kuꞌnian
31Xa nu wa mdoꞌo Juda ndyaa yu, bra kanꞌ ykwiꞌ Jesús loꞌo nten nu nganun kanꞌ:
―Bra nu ni kuꞌni Ndiose chaꞌ ka tlyu laǎn chaꞌ ꞌñaǎn, naꞌ nu wa ndijyaǎn lo chalyuu chaꞌ kaǎn nten ―ndukwin yu―. Loꞌo kuꞌni tnun nten ꞌin Ndiose chunꞌ chaꞌ tnun nu ka ꞌñaǎn ―ndukwin yu―. 32Loꞌo naꞌ kuꞌniǐn chaꞌ ka tlyu la chaꞌ ꞌin Stiǐn, chaꞌ lkaǎn skaǎn tiǎn nu lka Sñiꞌ Ni, kwiꞌ ngwañaꞌan kuꞌni Ni chaꞌ ka tlyu la chaꞌ ꞌñaǎn; loꞌo bra ti kuꞌni Ni ngwañaꞌan. 33Sñiěnꞌ ―ndukwin Jesús ꞌin neꞌ kanꞌ―, ti tyiꞌiǐn loꞌo wan lo chalyuu xa chinꞌ ti tsan. Sa ñaꞌan nu niǐn ꞌin neꞌ judío nu ngwa xkanꞌ, ti kwiꞌ chaꞌ chkwiǐnꞌ loꞌo wan ni: Tsaa naan wan ꞌñaǎn nde seꞌen mdaꞌaǎn, loꞌo ja ka ꞌa ꞌwan tsaa wan seꞌen tyiꞌiǐn bra kanꞌ ―ndukwin yu―. 34Nde katsaǎnꞌ ꞌwan sa ñaꞌan ka ska tñan kwi nu kuꞌni wan. Ndiꞌin chaꞌ suꞌwe ꞌa xuꞌwi tiye wan ñaꞌan wan ꞌin taꞌa nten wan; sa ñaꞌan nu suꞌwe ꞌa nsuꞌwi tiyeěn naꞌaǎn ꞌwan, kwiꞌ ngwañaꞌan ndiꞌin chaꞌ suꞌwe xuꞌwi tiye wan ñaꞌan wan ꞌin taꞌa nten wan. 35Bra kanꞌ ka biyaꞌ tiꞌ ya ñaꞌan ti nten chaꞌ lka wan nten nu ngiꞌni xaꞌan chaꞌ ꞌñaǎn, bra nu suꞌwe ꞌa nsuꞌwi tiye wan ñaꞌan wan ꞌin taꞌa nten wan ―ndukwin Jesús.
Ndukwin Jesús chaꞌ wa kulaa yaꞌ ti Tyu ꞌin yu
36Ykwiꞌ Tyu Simón loꞌo Jesús bra kanꞌ:
―Xꞌnaǎn ―ndukwin―, ¿la nde yaꞌ tsaa ni a?
―Ja kaja chabiyaꞌ ꞌiin bra nu ni chaꞌ tsaa loꞌoǔn la seꞌen nu tsaꞌaǎn ―ndukwin Jesús―. Chunꞌ ndiꞌin la tsaa nuꞌwin tuwiin la kanꞌ.
37Loꞌo mnichaꞌ Tyu ꞌin yu bra kanꞌ:
―¿Ni chaꞌ lka ja nchka tiiꞌ chaꞌ tsaꞌaǎn loꞌoo la seꞌen tsaa, ni siya ni ti a? ―ndukwin―. Ja nꞌni chaꞌ ni siya kajaǎn chaꞌ ꞌiin.
38―¿Ta chañi ka ꞌiin chaꞌ xlyaa kajaa chaꞌ ꞌñaǎn? ―ndukwin Jesús ꞌin yu―. Chañi chaꞌ nu chkwiǐnꞌ loꞌoo ni, chaꞌ bra nu ti ji xiꞌya la kweꞌe nde tlya, snan yaꞌ xkween chaꞌ ꞌin nten chaꞌ ja nsuꞌwi lyoo ꞌñaǎn.
Currently Selected:
SAN JUAN 13: ctp
Highlight
Share
Copy
Want to have your highlights saved across all your devices? Sign up or sign in
© 1992, Wycliffe Bible Translators, Inc. All rights reserved.