Mateu 1
XAVBP

Mateu 1

1
Zezu Cristuhu hi'rata norĩ za'ratazé
Luca 3.23-38
1Ã hã rob'ui'éré hã Zezu Cristuhu hi'rata norĩ za'ratazé. Ta hã Dawihi nhihudu, duré Abra'ãhã nhihudu. 2Abra'ã hã Izaquihi mama. Izaqui hã Zacoho mama. Zaco hã Zuda norĩ mama, isisãnawã norĩ me. 3Zuda hã Peresihi mama, duré Zeraha mama. Ina zahuré hã Tama na isisi hã. Duré Peresi hã Esrõhõ mama. Duré Esrõ hã Arãhã mama. 4Arã hã Aminadabehe mama. Duré Aminadabe hã Nasõhõ mama. Duré Nasõ hã Salmohõ mama. 5Salmo hã Buazihi mama. Buazihi na hã Ra'abi na isisi. Duré Buazi hã Obedihi mama. Obedihi na nhisi hã, Ruti na isisi. Duré Obedi hã Zéséhé mama. 6Zésé hã apito Dawihi mama. Dawi hã Salomahã mama. Uriasi idâ'â mro wa, ipodo, Saloma hã. 7Saloma hã Robuãhã mama. Duré Robuã hã Abiasihi mama. Duré Abiasi hã Azaha mama. 8Aza hã Zozafaha mama. Duré Zozafa hã Zurãhã mama. Zurã hã Uziasihi hi'rada. 9Uziasi hã Zotãhã mama. Duré Zotã hã Acasihi mama. Duré Acasi hã Ezequiaha mama. 10Ezequia hã Manaséhé mama. Duré Manasé hã Amosihi mama. Amosi hã Zoziaha mama. 11Zozia hã Zeconia norĩ mama, isisãnawã norĩ me. Babilonia u Izaraéu nhihudu norĩ, da te séme da, da te simroi mono siwaprã, ma tô ta norĩ hã tipoto za'ra.
12Tawamhã Izaraéu nhihudu norĩ, Babilonia u da te simroi mono za'u si, ma tô Zeconia hã poto, Sarati'é hã. Sarati'é hã Zorobabéhé mama. 13Zorobabé hã Abiudihi mama. Duré Abiudi hã Eriaquĩhĩ mama. Duré Eriaquĩ hã Azoho mama. 14Azo hã Sadoquihi mama. Duré Sadoqui hã Aquĩhĩ mama. Duré Aquĩ hã Eriudihi mama. 15Duré Eriudi hã Eri'azaha mama. Duré Eriaza hã Matãhã mama. Duré Matã hã Zacoho mama. 16Zaco hã Zuzéhé mama. Zuzé hã Mariaha mro. Ta hawi Zezusi hã ipodo, Cristu#1.16 Cristu hã, Danho'reptui'wa da, 'Re ihâimana u'âsi mono te te ipisudu, te wasu'u. na da te 're isisi za'ra mono.
17Ãne 14 na dahi'rata norĩ hâiba za'ra hã, Abra'ãhã hawimhã, õ Dawihi u hã. Duré 14 na dahi'rata norĩ hâiba za'ra hã Dawihi hawimhã, Izaraéu nhihudu norĩ, da te isimroi mono zéb u hã, Babilonia u. Duré 14 na dahi'rata norĩ hâiba za'ra hã Izaraéu nhihudu norĩ, da te isimroi mono zém hawimhã, õ Cristu ipotozéb u hã.
Zezu Cristuhu waptã'ãzé wasu'u
Luca 2.1-7
18Tawamhã ãne Zezu Cristuhu potozé hã: Maria hã Zezusi, ãma ina da hã ma tô sima ropisutu zahuré Zuzéhé me, sina mro zahuré da. Tane nherẽ, sina mro zahuré õ ré, ma tô 'Re ihâimana u'âsi mono pẽ'ẽzani na tiwasã Maria hã, te te sa'rese õ nherẽ. 19Tawamhã aibâ hã Mariaha ãma imro da hã 're morĩ wẽ di, Zuzé na isisi hã. Ta hã marĩ iwẽ si te te 're 'manharĩ u'âsi. Tahawa, ma tô sima rosa'rata, za ãma imro da na ropisudu pi'uriwi te te siwi ipari na hã, duré danho'a iwasété na te te ãma hiri wa, da te dasiwi waihu'u za'ra tõ da. 20Tawamhã ãne na te te sima rosa'rata wamhã, ma tô hâiwa hawi Wanhib'apito ma romhuri'wa hã tãma sihâi'ré, sõtõ 'rowim na. Ãne te taha wamhã tãma tinha:
— Zuzé, Dawihi nhihudu, asina aihâtâ'â tõ, Mariaha ãma aimro tõ da hã. Ta hã ma tô tiwasã, 'Re ihâimana u'âsi mono pẽ'ẽzani na. 21I'ra hã 'watébrémi na te za tãma podo. Tawamhã Zezusi na te za isisi. Danho'reptui'wa te wasu'u, isisi hã. Taha si te za tinhib'a'uwẽ hã te te 're anho'reptu, iwasété hawi, duré 'Re ihâimana u'âsi mono te te 're idahâ za'ra mono zém hawi.
22-23Ãne da hã ma tô pisutu, Zezusihi ma, 'Re ihâimana u'âsi mono hã duréihã tizadawa wasu'u 'rata 'wai ma, Izaiaha ma, te te iwaihu'uzém na te te ãma uwaimrami da. Ãne ma tô tãma waihu'u, duréihã:
“Pi'õi ubuni hã te za tiwasã. Duré i'ra hã te za tãma waptãrã, aibâ na.
Taha nhisi hã za, Emanuwé na.”
('Re ihâimana u'âsi mono, wasiré 're imorĩ u'â, te wasu'u, isisi hã.) Ãne 'Re ihâimana u'âsi mono te te ãma irowaihu'u siromo zé hã duréihã.
24Tawamhã Zuzé hã utu wamhã, hâiwa hawi Wanhib'apito ma romhuri'wa te te tãma iwaihu'uzéb zarina, ma tô ãma timro oto, Mariaha ãma, awa'awi. 25Tane nherẽ, Zuzé hã te te ãma sima rosa'rata upai õ di, a'â ãma panomro da hã Mariaha ãma, i'ra hã tãma waptã'ã õ ré. Taré te iré pibui wẽ. Tawamhã i'ra tãma waptã'ã wamhã, Zuzé hã ma tô sisi, Zezusi na.

© 2011, Wycliffe Bible Translators, Inc. 


Learn More About ꞌRe Ihâimana Uꞌâsi Mono Zadawa Wasuꞌu