Luca 24
24
Zezusi hã, Imama te te ihâiwa'utuzé wasu'u
Mateu 28.1-10; Marcu 16.1-10; Zuwã 20.1-10
1Dumigu na rowa'a wi, te pi'õ norĩ hã ai'aba'ré, ab're u. Marĩ wa'u te siré âri za'ra, isadaze hã. 2Ab're u sihutu wamhã, ẽne ma tô 'madâ'â za'ra, ab're nhitobzé hã. Ni'wa hã ma tô ab're nhiti sa'ré. Tahawa te 'ridawa sitob õ na 'ridawa haré oto za. 3Tawamhã sisisi wamhã, te te sãmri za'ra õ di, Wanhib'apito Zezusihi hâiba hã. Robaba di. 4Te te waihu'u za'ra õ wa, te ãne ãma rosa'rata za'ra:
— E niha ab're hã baba di. E mahãta ihâiba.
Tawamhã aibâ norĩ hã maparane ma itẽme za'ra aima'wara zahuré. I'uza hã ma hâi ai'ubuzi zahuré. 5Tahawa, ma tô pi'õ norĩ hã tãma tipahi za'ra. Pahi te, ma tô aiwẽ'ẽ za'ra, ti'ai u. Tahawa, te ãne tãma nharĩ za'ra, pi'õ norĩ ma hã:
— E niha da, te ihâiba zô irob'madâ'â za'ra wa'wa, inomrozéb ãmamhã. Apâ ma tô hâiwa'udu. 6-7Ãme nomro õ di oto. Ma tô hâiwa'udu. Galiléa ãma 're sãmra mono ré, ma tô romhâ ré aima siwasu'u siromo za'ra wa'wa aré, ãne: “Ti'ai ãma Dasiré Ipodo hã te za dama hâiba nhomri ni, aibâ iwasété norĩ ma. Wedepo'o nhonhi'rãmi na te za dasiwi sasõmri ni, dâ'â da. Bâdâ maparane ãma si'utõrĩ õ ré, te za apâ hâiwa'udu.” Ãne ma tô romhâ ré aima siwasu'u siromo za'ra wa'wa.
8Tahawa, ma tô pi'õ norĩ hã ãma tipo're pu'u za'ra, Zezusihi mreme na. 9Taha pari, te ab're hawi apâ ai'aba'ré, isazei'wa norĩ u. Aibâ 11 na ihâiba za'ra norĩ ma, ma tô rowasu'u pese za'ra, Zezusihi siré 're inomro mono norĩ ma. Isiré isi'ubumro norĩ ma zama, ma tô tãma rowasu'u pese za'ra. 10Pi'õ norĩ nhisi hã, ãne: Maria Madaréna, duré Zuãna, duré Maria, Tiaguhu na. Ta norĩ hã isiré pi'õ norĩ me, ab're u isi'aba'ré hã, te Zezusihi zadawa wasu'u'wa norĩ ma rowasu'u pese za'ra. 11Tane nherẽ, isimirowasu'u na te te saze za'ra õ di, taré newa. 12Tane nherẽ, Pedru hã ma tô wahudu, ab're u wara da, te te sabu da. Ab're u wisi wamhã, ma tô sô aiwẽ'ẽ, te te sô rob'madâ'â da. Sô siwẽ'ẽi wamhã, i'ubuzéb si, ma tô sabu. Tahawa, ma tô apâ mo 'ri tẽme, tob'uzu sina, marĩ ihâimanazém na.
Emausi u, isazei'wa norĩ nebzé wasu'u
Marcu 16.12-13
13Tawamhã tô taha bâtâ na te tineb zahuré, Emausi na 'ri wa'õtõ nhisi u, Zezusihi zazei'wa norĩ hã. Zeruzalẽ hawi te tineb zahuré, 'ri wa'õtõ u. Zeruzalẽ hawimhã, 10 na ti'ai pibuzé hã, Emausi u hã. 14Nep sina, ma tô te te sima rowasu'u zahuré, uburé marĩ hã iwairébé mono na. 15Te te sima rowasu'u zahuré mono ré, duré ãma sisada'âbâ zahuré mono ré, ma tô Zezusi hã ãma tiwisi zahuré. Taha wamhã, te oto ime timorĩ zahuré. 16Titõmo na ma tô 'madâ'â zahuré. Tane nherẽ, te te waihu'u zahuré õ di, ni'wa newa. 17Tawamhã Zezusi te sadanharĩ zahuré, ãne:
— E marĩ, te asima iwasu'u wa'aba mo, bâdâdi na ane wa'aba sina hã.
Tahawa, ma tô mazahâri zahuré. Ãhã wamhã, duré ubu pire zahuré di. 18Tawamhã ma tô ihâiba amo hã sadanha, Cleupasi na isisi hã:
— Zeruzalẽ ãma 're asãmra mono nherẽ, e niha merẽ aima si isa'rese õ, ã nimosi marĩ iwairébé mono hã.
19Tahawa, ma tô Zezusi hã asa sadanharĩ zahuré ãne:
— E marĩ, hâimana bâ.
— Zezusi, Nazaré hawi imorĩ ma, ma tô rob'manharĩ wasété za'ra ni. 'Re ihâimana u'âsi mono zadawa 'mahârâ'wa, te 're mo aré. Tiwaihu'u pese na ma tô aré marĩ hã te te dama 're ab'manharĩ, iwẽ hã. Duré mreme pire na, te 're mo. Ãne na ma tô waihu'u, 'Re ihâimana u'âsi mono hã. Ãne na hã uburé ma tô waihu'u za'ra ni. 20Tane nherẽ, wa'madâ'â'wa norĩ sasedoti ipire norĩ hã ma tô danhib'apito u siwi saprõ. Roti'wa norĩ dama ipire norĩ me, ma tô itẽme siwi saprõ, te te dama 'ru za'ra da, da te dasiwi wĩrĩ da. Tahawa, ma tô isimiwada'uri zarina, dasiwi sasõmri ni, wedepo'o nhonhi'rãmi na dâ'â da. 21Izaraéu nhihudu norĩ hã, danhimiwada'uri na oto 're wahâimana za'ra mono tõ da, te te 're wa'apawapto mono da ne, wa tô 're wanhimnhasi za'ra aré. Ãhã na bâdâ maparane ma tô ãma ne, da te iwĩrĩzém na hã. 22-23Ni'wam norĩ hã pi'õ norĩ hã ma tô ai'aba'ré ab're u, wasiré isazei'wa norĩ hã. Tane nherẽ, te te siwi sãmri za'ra õ di, ihâiba hã. Ab're hã baba na, ma tô sô sabu za'ra. Apâ sihutu wamhã, ãne te wama rowasu'u za'ra: “'Re ihâimana u'âsi mono ma romhuri'wa norĩ si, wa tô wasiwi 'madâ'â za'ra ni, hâiwa hawi we ine hã. Zezusi hã, u, dâ'â õ di. Te u, oto 're mo. Ãne ma tô wama rowasu'u zahuré.” Ãne te pi'õ norĩ hã wama rowasu'u za'ra. Tahawa, wa tô ãma watob'uzu za'ra ni, isimirowasu'u za'ra na hã. 24Tahawa, ma tô wasiré norĩ hã 'mane, pi'õi wa'rãmi, ab're u. Ta norĩ te te duré robzabu zahuré wamhã, ab're hã baba na ma tô duré sabu zahuré, pi'õ norĩ nhimirowasu'u zarina. Taha wamhã, te duré wama rowasu'u za'ra, Zezusihi hâiba hã te te isãmri zahuré õ na.
25-26Tawamhã Zezusi hã te asa tãma nharĩ zahuré, ãne:
— E niha bâ bété, waihu'u su'u aba õ di, sazei aba da, 'Re ihâimana u'âsi mono zadawa 'mahârâ 'rata 'wa norĩ nhimirowasu'u mono bâ, Danho'reptui'wa na rob'ui'éré hã. Danho'reptui'wa da, 'Re ihâimana u'âsi mono te te ipisudu hã te za a'â robzépata, rowasédé, da te tãma 'manharĩ wamhã. Taha parip si, te za rowẽ ãma 're sãmra, 'Re ihâimana u'âsi mono te te tãma ipisutuzéb uwaibaba.
27Romhâ ré, ma tô iwana Danho'reptui'wa na rob'ui'éré za'ra ni. Tawamhã Mozési te te ãma irob'ui'éré na, te oto tãma rob'rãzarõtõ zahuré. Taha pari, uburé 'Re ihâimana u'âsi mono zadawa 'mahârâ 'rata 'wa norĩ, te te ãma irob'ui'éré za'ra na, te tãma rob'rãzarõtõ zahuré duré.
28Tawamhã ma tô rob'umhutu za'ra oto, 'ri wa'õtõ u hã, Emausi u. Zezusi hã te aré tiwi timorĩ waré zahuré. 29Tahawa, ma tô tãma nharĩ zahuré, tiwi morĩ zahuré tõ da:
— Wa'rata asãmra a'â. Ma tô wawi tihâiwahâ. Te za wawi tirobra.
Tahawa, ma tô ãzé 'ri para u, i'rata sãmra zahuré da, a'â. 30Tawamhã i'rata te tinhamra zahuré, siré saihuri da. Sãmra wamhã, ma tô i'u'ẽne hã ti'â, Zezusi hã. 'Re ihâimana u'âsi mono ãma te tiwata, sõpru wa. Taha pari, ma tô te te wẽ'ẽ, i'u'ẽne hã. Ta hã ma tô duré tãma sõmri zahuré. 31Tahawa, ma tô oto waihu'u zahuré, Zezusi na õ hã. Tazahã, ma tô tiwi aimani zahuré. 32Tahawa, te isa'u sima rowasu'u zahuré, ãne:
— Bâdâdi na we te te wama rowasu'u mono ré hã, e iwatoi õre bété, wapẽ'ẽ 'remhã. Wato sina, wa we wa te wapari. Wapari ze ti.
33Tawamhã awa'awi, ma tô tiwahutu zahuré, Zeruzalẽ u neb da apâ. Simasisi wamhã, ma tô Zezusihi siré norĩ hã sabu za'ra, 11 na ihâiba za'ra hã. 'Ri para, te siré ai'ubumro, isazei'wa norĩ me.
34— Tô sena, ma tô Wanhib'apito hã hâiwa'udu. Simahã ma, ma tô sihâi'ré.
35Tawamhã Wanhib'apito, bâdâdi na itẽme iwisi zahuré na, ma tô asa dama rowasu'u zahuré, isazei'wa norĩ ma. Duré, Wanhib'apito te te iwaihu'u zahuré zém na, ma tô siwasu'u zahuré. I'u'ẽne te te tãma iwẽ'ẽ zahuré na, ma tô duré Wanhib'apito hã waihu'u zahuré. Ãne na ma tô siwasu'u zahuré, Zezusihi zazei'wa norĩ ma.
Zezusi hã, tizazei'wa norĩ ma, isihâi'rézé wasu'u
Mateu 28.16-20; Marcu 16.14-18; Zuwã 20.19-23; Atu 1.6-8
36Tawamhã isazei'wa norĩ ma, te te rowasu'u zahuré ré, ma tô Zezusi hã iwa'wa tizab za'ra. Ãne te tãma nharĩ za'ra:
— Rowẽ na 're aihâimana za'ra wa'aba mono.
37Tawamhã dahâiba warõ newa, ma tô tãma tipẽ'ẽwara za'ra. 38Tahawa, te Zezusi hã tãma nharĩ za'ra, ãne:
— E marĩ da, ma tô ĩma aipẽ'ẽwara za'ra wa'wa. E marĩ da, ma tô ĩwawã za'ra wa'wa, ĩhâiwa'utuzém na. 39Ĩnhib'rada, 'madâ'â za'ra wa'aba. Duré ĩpara hã 'madâ'â za'ra wa'aba. Ma'ãpé oto ĩzaze za'ra wa'aba. Wa hã tô, Zezusi. Dahâiba warõ hã nhi õ di, duré hi õ di. Wa hã ĩnhi ré hã, duré ĩhi ré hã. Ma'ãpé asib'rata na ĩ'upi za'ra wa'aba, tô sena na ĩzaze za'ra wa'aba da.
40Tahawa, ma tô tinhib'rada hã tãma sõ'a za'ra, duré tipara hã. 41Imreme te te wapari za'ra wamhã, te 're to za'ra, tipẽ'ẽ na. Tãma rowẽ uptabi za'ra di. Tane nherẽ, Zezusi hã hâiwa'utu õ newa, te te ãma saze za'ra õ di. Tahawa, mrab zô te sadanharĩ za'ra oto, Zezusi hã ãne:
— E mra, te aima tihâimana za'ra wa'wa.
42Tawamhã suru na ma tô tãma sõmri za'ra, tepe zebre hã. 43Tawamhã ma ti'â, te te 'rẽne da, isõ'a za'ra. 44Tahawa, te Zezusi hã tãma nharĩ za'ra, ãne:
— Romhâ ré wa tô aima rowasu'u za'ra wa'wa, ai'rata 're ĩnhamra za'ra wa'aba mono ré hã, marĩ hã za ĩzô iwairébé mono na, Mozésihi nhimi'ui'éré zarina, duré 'Re ihâimana u'âsi mono zadawa 'mahârâ 'rata 'wa norĩ nhimi'ui'éré zarina, duré isõ're na rob'ui'éré zarina.
45-46Tawamhã ma tô ãne tãma waihu'u za'ra, ibaihâ na rob'ui'éré zarina:
— Romhâ ré ma tô ãne ĩ'ãma rob'ui'éré za'ra ni: “Danho'reptui'wa te za robzépata za'ẽtẽ, 'Re ihâimana u'âsi mono te te ipisudu hã. Tane nherẽ, bâdâ maparane ãma si'utõrĩ õ ré, te za hâiwa'udu apâ, ab're hawi. 47Duré, te za iwasu'uwẽ na isadawa para te te 're dapo're pu'u za'ra, ãne: ‘Dawasédé hã te za da te 're rẽme pese za'ra. Tawamhã te za te te dama 're apari dawasédé hã, 'Re ihâimana u'âsi mono hã.’ Ãne te za iwasu'uwẽ na uburé te te ãma 're dapo're pu'u za'ra, daro mono bâ. Zeruzalẽ ãma isãna'rada hã za.” Ãne ma tô duré romhâ ré ãma rob'ui'éré za'ra, ibaihâ na hã. 48A norĩ wa'wa hã ma tô ĩ'ãma i'madâ'â za'ra wa'wa, ĩdâ'âzé hã. Duré ĩhâiwa'utuzé hã ma tô ĩ'ãma iwaihu'u za'ra wa'wa. Tahawa, te za ĩwasu'u wẽ'wa, 're anomro aba mo. 49Wa hã wa za we atẽme satõrĩ za'ra wa'wa, Ĩmama te te aima iropisutu za'ra wa'aba zéb zarina. Tahawa, te za a'â ãme 'ri ahâ ãma sô asimipari za'ra wa'wa, hâiwa hawi te we atẽme isatõrĩ za'ra wa'aba zéb u, ĩwaihu'u pese na 're ĩmorĩ ne, 're anomro aba mono da.
Zezusi hã, hâiwa u imorĩzé wasu'u
Marcu 16.19-20; Atu 1.9-11
50Tawamhã Zezusi hã ma tô tisiré 're inomro mono norĩ hã te te simro, 'ri ahâ nhiti, Betãnha na 'ri wa'õtõ nhisi u. Tamomo te te rob'umhutu za'ra wamhã, ma tô tinhib'rada hã wahutu, tisi hawimhã, iwẽ hã te te tãma sõmri za'ra da, Zezusi hã. 51Tawamhã taha ré, ma tô tiwi timorĩ za'ra. Imama hã ma tô tiwi âri za'ra, hâiwa u. 52Tawamhã isa'u, te Zezusihi ãma tiwata za'ra, hi'rãtitõ. To sina, te apâ ai'aba'ré, Zeruzalẽ u. 53Tawamhã 'Re ihâimana u'âsi mono nhorõwa ãma, te 're si'ubumroi u'âsi, 'ri 'wawi wa'ra 're, ãma 're wata u'âsi za'ra mono da hã.
Currently Selected:
Luca 24: xavBP
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc.All rights reserved.