VOSA VAKAIBALEBALE 1
1
Na Yaga ni Vosa Vakaibalebale
1 #
1Tui 4.32
Na veivosa vakaibalebale i Solomoni na luve i Tevita na tui Isireli.
2Oqo na veivosa vakaibalebale me vukea na nomuni kila na yalomatua kei na i vakasala vinaka, ka vulica na i balebale titobu ni vosa ni vuku. 3Era na vakavulici kemuni mo ni bula vakaivakarau kina, ka cakava na veika dodonu, ka dina, ka vinaka. 4Sa na rawa me yaco kina vua na tamata yalowai me yalomatua, ka vakavulici ira na i tabagone me rabailevu na nodra kila-ka. 5Na veivosa vakaibalebale oqo sa na rawa talega me vakuria na nodra kila-ka na tamata vuku kei na veituberi vei ira era vuli vinaka; 6me ra kila kina na i balebale vuni ni veivosa vakaibalebale kei na veika dredre era tukuna cake na tamata vuku.
Ai Vakasala Vei Ira na i Tabagone
7 #
Jope 28.28; Same 111.10; Vbale 9.10 Na rerevaki Jiova sai vakatekivu ni kila-ka, Era sa cata na yalomatua na tamata lialia ka sega ni via vuli.
8Na luvequ, mo rogoca na i vakaro i tamamu, mo kakua ni biuta na i vakavuvuli i tinamu. 9Na nodrau i vakavuvuli ena vakavinakataka na nomu i vakarau me vaka e dua na i sala lagilagi e ulumu, ka i taube rairai vinaka e domomu.
10Na luvequ kevaka era temaki iko na tamata ca, kakua sara ni vakadonuya mo rawai. 11Kevaka era kaya, Lako mai me tou la'ki vuni ka wawa koto, me tou vakamatea mada eso na tamata. 12Era na rairai bulabula ka tiko vinaka ni tou sotavi ira, ia era na mate ni oti na noda tilomi ira bulabula. 13Eda na qai kunea na veimataqali i yau kecega ka vakasoqona mai ki na noda veivale. 14Mai, me da mai lako vata ka vota na veika kece e butakoci.
15Na luvequ, mo kakua ni lako vata kei ira na tamata vakaoqo, ka mo kakua ni muria na nodra sala. 16Era sa sega ni dau wawa ni cakava na ka ca, era sa dau tu vakarau me ra veivakamatei. 17Sa sega ni yaga me biriki na dai ni rai tu mai na manumanu eda via vesuka. 18O ira na tamata vaka o ya era sa birika tikoga na dai me ra coko kina, na dai me ra na mate kina. 19E dau vakavuqa me butakoci talega na nodra bula na daubutako, me i tinitini ni yalo kocokoco vei ira era vakaitavi kina.
Na Kaci nei Yalomatua
20 #
Vbale 8.1-3
Sa kaci yani ena domo levu o Yalomatua ena tolo ni veisala, ka tabalaka cake na domona ena vanua ni veivoli. 21Sa tagilagalaga yani ena veivanua osooso, ena tikina era dau vakasoqoni vata kina na tamata.
22Ena cava li na kena dede, oi kemuni na yalowai, mo ni yalowai tikoga kina? A cava soti na dede ni nodra taleitaka na veivakalialiai na dauveivakalialiai kei na nodra cata na kila-ka o ira na lecaika? 23Ni vakarorogo mada me'u vunauci kemuni; ni'u na vakasalataki kemuni vakavinaka, ka vota vei kemuni na noqu kila-ka. 24Ena noqu kaci ni veisureti yani, o ni a bese ga; ka'u a dodo liga yani ka sega e malele mai kina. 25O ni sa vakawaletaka na noqu i vakasala kecega ka cata ni'u vakadodonutaki kemuni. 26Ia ni o ni sa leqa au na qai dredrevaki kemuni, ka'u na qai vakalialiai kemuni ni o ni sa rere, 27ni sa yaco mai vei kemuni na rere me vaka na cagilaba, ka kauta mai vei kemuni na cagi rerevaki ni leqa, ka sa na yaco vei kemuni na vutu kei na vakaloloma. 28O ni sa na kaciva yani na yalomatua, ia au sa na sega ni sauma mai. O ni na vaqarai au ena veiyasana kecega, ia o ni na sega ni kunei au. 29O ni sa cata na kila-ka ka cata tikoga mo ni rerevaki Jiova. 30O ni sega ni bau vinakata na noqu i vakasala se kauwaitaka na noqu vakadodonutaki kemuni. 31Sa i koya oqo o ni sa sota kaya kina na ka e dodonu me yacovi kemuni ka na vakatauvimatetaki kemuni na nomuni i vakarau. 32Era na mate na tamata ni ra besetaka na yalomatua, ni ra sa vakadonui ira vakai ira ga. 33Ia o koya yadua ena vakarogoci au ena vagalalataki. Ena taqomaki ka sega na ka e dodonu me vakavuna na nona rere.
Currently Selected:
VOSA VAKAIBALEBALE 1: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.