JONI 21
21
Na Rairai nei Jisu vei Iratou na Tisaipeli e Vitu
1Ni sa oti na veika o ya, sa qai vakaraitaki koya tale ko Jisu vei iratou na tisaipeli mai na drano mai Taiperia; ka a vakaraitaki koya vakaoqo. 2E ratou a tiko vata voli o Saimoni Pita, kei Tomasi, o koya ka vakatokai na “Drua”, kei Nacanieli na kai Kena mai Kalili, kei rau na luve i Sepeti, ka lewe rua tale na nona tisaipeli. 3A qai kaya vei iratou o Saimoni Pita, “Au sa lako mada ki qoli.”#Luke 5.5
E ratou a mani kaya vua, “Keitou na lako talega yani.” E ratou sa qai lako ka vodo ki na dua na waqa. Ia e ratou a sega ni rawata e dua na ika ena bogi o ya. 4Ia ni sa mataka mai, sa tu mai matasawa ko Jisu; ia eratou a sega ga ni kila na tisaipeli ni sai Jisu o ya. 5Sa qai kaya vei iratou ko Jisu, “Ra cauravou, e sa bau rawa eso na ika?”
E ratou a sauma, “E sega sara ga ni bau dua.”
6Sa qai kaya vei iratou o koya, “Dou balata na lawa ki na i matau ni waqa, dou na kunea kina eso.” E ratou a mani balata kina, ka ratou a sega ni yavia rawa na lawa, ni sa ka levu sara na ika.#Luke 5.6
7A ka oqo sa kaya kina vei Pita na tisaipeli ka dau lomana ko Jisu, “Na Turaga bagi ka tu oqo!” Ni sa rogoca o Saimoni Pita ni sai koya na Turaga o ya, sa qai daramaka na nona i sulu vakagonedau (ka ni a luvata tu na nona i sulu) ka lade yani ki wai. 8E ratou sa qai yaco ki vanua ena waqa lailai o iratou na vo ni tisaipeli, ka yavia yani na lawa sa sinai tu ena ika. E ratou sa sega ni yawa sara mai vanua, ka ni rauta beka ga e dua na drau na mita na kena yawa. 9Ni ratou sa sobu ki vanua, eratou sa raica sara e dua na matanibuka sa waqa tu, ka sa tavu toka ena kena qilaiso eso na ika, kei na madrai. 10Sa qai kaya vei iratou ko Jisu, “Dou kauta mai eso na ika dou se qai rawata ga oqo.”
11Sa qai lako o Pita ki waqa ka yavia mai ki vanua na lawa sa sinai tu ena ika lelevu, e 153 taucoko na kena levu. Ia e dina ga ni a levu vaka o ya na ika, sa sega ga ni bote na lawa. 12Sa qai kaya vei iratou ko Jisu, “Dou mai katalau.” Ia sa sega ga ni doudou e dua vei iratou na tisaipeli me tarogi koya, “O cei oi kemuni?” baleta ni ratou sa kila ni sai koya ga na Turaga. 13Sa qai lako mai ko Jisu, ka taura na madrai, ka solia vei iratou; a sa vakayacora vakakina ena ika.
14Sa i koya oqo na i katolu ni gauna sa vakaraitaki koya kina ko Jisu vei iratou na nona tisaipeli ni sa tu cake tale mai na mate.
Ko Jisu kei Pita
15Ni ratou sa katalau oti, sa qai kaya vei Saimoni Pita ko Jisu, “I Saimoni na luve i Jona, o sa lomani au vakalevu cake mai vei iratou oqo, se segai?”
Sa kaya vua o koya, “Io Turaga, o ni sa kila ni'u sa lomani kemuni.”
Sa qai kaya vua ko Jisu, “Vakani ira na noqu lami.” 16Sa kaya tale vakarua vei koya ko Jisu, “I Saimoni na luve i Jona, o sa lomani au li, se segai?”
Sa kaya vua o Pita, “Io Turaga, o ni sa kila ni'u sa lomani kemuni.”
Sa qai kaya tale vua ko Jisu, “Qaravi ira na noqu sipi.” 17A sa taroga tale, “I Saimoni na luve i Jona, o sa lomani au se segai?”
Sa rarawa na loma i Pita ni sa kena i katolu na nona taroga vua, “O sa lomani au, se segai?” A mani kaya vua, “Kemuni na Turaga, o ni sa kila na ka kecega, o ni sa kila ni'u sa lomani kemuni!”
A qai kaya vua ko Jisu, “Vakani ira na noqu sipi. 18Au sa kaya vakaidina vei iko oqo: ni o a se gone, o a dau tu vakarau ka lako yani ki na vanua ga o sa digitaka mo lako kina; ia ni o sa qase cake, o na dodoka na ligamu ka na vesuki iko e dua tale na tamata, ka kauti iko ki na vanua o sa sega ni vinakata.” 19(A sa vosa vakaoqo ko Jisu me vakatakila kina na mataqali i matemate nei Pita ena gauna ena mate kina, ka me na vakacerecerei kina na Kalou.) Sa qai kaya vua ko Jisu, “Muri au mai!”
Ko Jisu kei na Tisaipeli Kadua
20E a qai vuki o Pita, ka raica na tisaipeli sa dau lomana ko Jisu ni muri tiko yani, o koya ka a dabe raviti Jisu ena nodratou vakayakavi ka taroga, “Turaga, o cei ena soli kemuni yani?”#Joni 13.25 21Ni sa raici koya o Pita, sa qai tarogi Jisu, “Turaga, e vakaevei o koya oqo?”
22A sauma vua ko Jisu, “Kevaka sa lomaqu me bula tikoga o koya ka yacova ni'u lesu tale mai, a cava o ya vei iko? O iko, mo muri au ga!”
23Sa qai rogo yani vei ira na i lawalawa era sa muri Jisu ni na sega ni mate na tisaipeli oqo. Ia sa sega ni kaya ko Jisu ni na sega ni mate o koya; a sa kaya ga, “Kevaka sa lomaqu me bula tikoga o koya ka yacova ni'u lesu tale mai, a cava o ya vei iko?”
24Sa i koya na tisaipeli oqori ka sa vakadinadinataka na veika oqo, ka vola talega; ka keitou sa kila ni sa dina na nona i tukutuku.
Ai Tinitini
25Sa vuqa sara na veicakacaka tale eso sa cakava ko Jisu. Kevaka era sa volai kecega, au nanuma ni na oso o vuravura ena veivola ena volai.
Currently Selected:
JONI 21: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.