JONI 16
16
1“Au sa tukuna na veika oqo vei kemudou, mo dou kakua kina ni tarabe. 2Era na vakatabui kemudou mai na nodra veivalenilotu: ka na yaco mai na gauna ena nanuma kina o koya e vakamatei kemudou, ni sa qarava tiko kina na Kalou. 3Era na kitaka tiko na veika oqo vei kemudou, ni ra sega ni kilai Tamaqu se i au. 4Ia au sa tukuna rawa tiko na veika oqo vei kemudou, me na qai yaco mai na kena gauna, dou na nanuma ni'u a sa tukuna oti vei kemudou.
Na Cakacaka ni Yalo Tabu
“Au a sega ni tukuna e liu na veika oqo vei kemudou, ka ni'u a sa tiko vata voli ga kei kemudou. 5Ia oqo au sa na lako vei koya ka a talai au mai; ka sega mada ni bau dua vei kemudou me taroga na vanua au lako tiko kina. 6Ia oqo ni'u sa tukuna vei kemudou na veika oqo, sa luvuci na lomamudou ena rarawa. 7Ia au sa tukuna vakadodonu oqo vei kemudou: ena vinaka vei kemudou me'u lako tani, baleta ni kevaka ka'u sa sega ni lako, ena sega ni lako mai vei kemudou na Dauveivuke. Ia kevaka ka'u sa na lako, au na talai koya mai kivei kemudou. 8Ia ena gauna sa lako mai kina o koya, ena vakatakila vei ira na tamata e vuravura na nodra cala me baleta na i valavala ca, kei na veika sa dodonu, kei na lewa ni Kalou. 9Era sa cala ena vuku ni i valavala ca, baleta ni ra sa sega ni vakabauti au; 10era sa cala ena vuku ni ka e dodonu, baleta ni'u sa lako vei Tamaqu, ka dou na sega ni raici au tale; 11era sa cala ena vuku ni kena vakatauci na lewa, baleta ni sa lewai oti o koya na tui ni vuravura oqo.
12“E se vo tiko e vuqa na ka me'u tukuna vei kemudou, ia dou na sega ni kila rawa ena gauna oqo. 13Ia ni sa lako mai na Yalo Tabu, o koya sa vakatakila na dina ni Kalou, ena liutaki kemudou ki na veika dina kecega. Ena sega ni vosa o koya ena nona kaukauwa vakataki koya ga, ia ena tukuna na veika sa rogoca ka tukuna vei kemudou na veika era se bera ni yaco mai. 14Ena vakalagilagi au o koya, baleta ni na maroroya o koya na veika ka'u sa kaya ka tukuna yani vei kemudou. 15Sa noqu na veika kecega sa nei Tamaqu; o ya na vuna au sa kaya kina ni na maroroya na Yalo Tabu na veika ka'u na solia vua, ka me la'ki tukuna vei kemudou.
Na Rarawa kei na Reki
16“Ena sega ni dede, dou sa na sega tale ni raici au; ka na sega tale ni dede, dou sa na qai raici au.”
17E ratou a mani kaya kina vakai iratou eso na nona tisaipeli, “A cava beka na i balebale ni nona kaya, ‘Ena sega ni dede, dou sa na sega tale ni raici au ka na sega tale ni dede, dou sa na raici au tale: baleta ni'u sa na lako vei Tamaqu?’ ” 18E ratou a kaya talega, “A cava e kaya kina o koya ni ‘na sega ni dede’? E sega sara ga ni matata na ka e kaya.”
19Sa kila ko Jisu ni ratou via tarogi koya tiko ka mani kaya kina vei iratou, “O dou veitarotarogitaka tiko li na noqu a kaya, ‘Ena sega ni dede, dou sa na sega tale ni raici au, ka na sega tale ni dede, dou sa na raici au tale’? 20Au kaya vakadodonu vei kemudou, dou na tagi ka tagiyaso, ia ena reki o vuravura. Ena rarawa na lomamudou, ia ena vuki me reki na nomudou rarawa. 21Ni sa taratara e dua na yalewa, sa ka rarawa vua, ni sa yacova tiko mai na kena gauna. Ia, ni sa sucu rawa na gone, sa sega tale ni nanuma o koya na rarawa, ena kena rekitaki ni sa sucu mai ki vuravura e dua na tamata. 22E vakakina na nomudou rarawa ena gauna oqo. Ia, au na raici kemudou tale, ka na qai reki na lomamudou, ka na sega ni dua ena kauta tani rawa na nomudou marau.
23Ena siga o ya dou na sega tale ni tarogi au ena dua na ka. Au kaya vakadodonu sara vei kemudou, na ka kecega dou na kerea vei Tamaqu, ena yacaqu, ena solia vei kemudou o koya. 24Me yacova mai oqo, dou sega mada ni sa bau kerea e dua na ka ena yacaqu. Dou kerekere, ka na yaco vei kemudou, me ka taucoko kina na nomudou marau.
Au sa Vakamalumalumutaki Vuravura
25“Au a sa tukuna oti vei kemudou na veika oqo ena vosa vakatautauvata: ia sa lako tiko mai na gauna au sa na sega tale ni vosa kina vei kemudou ena vosa vakatautauvata, ni'u sa na vosataka vakamacala ga vei kemudou na veika e baleti Tamaqu. 26Ena siga o ya dou na kerekere ena yacaqu; ia e sega ni yaga me'u tukuna vei kemudou ni'u na masuti Tamaqu ena vukumudou, 27ka ni ko Tamaqu sara ga vaka i koya e lomani kemudou. E lomani kemudou o koya me vaka ni o dou sa lomani au, ka vakabauta ni'u a lako mai vua na Kalou. 28Au a lako mai vei Tamaqu, ka lako mai ki vuravura; ia oqo au sa biuti vuravura tale, ka lako vei Tamaqu.”
29E ratou sa qai kaya vua na nona tisaipeli, “Raica, o ni sa qai vosa vakamatata oqo, ka sega tale ni o ni vosa tiko ena vosa vakatautauvata. 30Keitou sa qai kila oqo ni o ni sa kila na veika kecega, ka ni sa sega tale ni yaga me dua e vakatarogi kemuni. Na ka oqo keitou sa vakabauta kina ni o ni a lako mai vua na Kalou.”
31A qai sauma vei iratou ko Jisu, ka kaya, “Dou sa qai vakabauta, ne? 32Raica, sa lako mai na gauna, ka dou sa yacova sara tu ga oqo, mo dou na dui veiseyaki kina, na tamata yadua ki na nona vale, ka dou na biuti au me'u tu duadua tu mai. Ia ka'u sa sega sara ni tu duadua voli ga baleta ni sa tiko vata kei au ko Tamaqu. 33A veika oqo ka'u sa tukuna vei kemudou ni dou na rawata na vakacegu ni lomamudou ni dou sa semati kivei au. O vuravura ena vakavuna mo dou sotava na veika rarawa. Ia mo dou yaloqaqa ga!; Au sa vakamalumalumutaki vuravura oti!”
Currently Selected:
JONI 16: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.