ESITERI 1
1
Vakasivoi Vasiti na Ranadi o Tui Asuerosi
1 #
Esera 4.6
Ena dela ni nona gauna ni veiliutaki vakatui o Asuerosi, sa veiliutaki tiko mai na koroturaga o Susa. 2Era a vakarorogo tu vua e 127 na veiyasana me tekivu mai Idia ka yaco yani ki Eciopea.
3Ena i katolu ni yabaki ni nona tui, a cakava kina o koya e dua na soqo ni kana magiti kei na veivakamarautaki me baleti ira kecega na ravouvou ni vanua, na vakailesilesi liu, na turaganivalu lelevu ni veimata i valu ni Perisia kei Mitia, na sucu turaga kei ira na kovana ni veiyasana era qali tu ki Perisia. 4Me ono taucoko na vula na kena dede, sa vakaraitaka na levu ni yau e tu vua kei na lagilagi ni nona i tikotiko.
5Ni oti na soqo o ya, a qai cakava tale o koya ena lomanibai ni tikotiko vakatui e dua na soqo vaka o ya me baleti ira na tagane ni koro o Susa, o ira na vutuniyau kei ira na dravudravua, ka siga vitu na kena dede. 6A ukutaki tu na lomanibai vakatui ena vuqa na i latilati i sulu roka vulavula kei na karakarawa, ka vesuki vata ena lineni matailalai roka lokaloka ki na mama siliva sa nokati tu ki na veiduru vatu mapolo. Na i dabedabe eso ka buli mai na koula kei na siliva era a biu talega ena lomanibai vakatui, ka kena buturara na mapolo vulavula, kei na felesipa damudamu, kei na tinadra na mataniciva, kei na tokise karakarawa. 7Era sa bilo koula na bilo ni waini, ka duidui na kedra lelevu kei na kedra i bulibuli, ka sa lomasoli na tui ena kena vakayagataki na waini vakaturaga. 8A sa sega ni yalani na gunu, ni sa solia na i vakaro na tui vei ira na dauveiqaravi ni rawa me ra gunuva na levu ni ka era vinakata o ira na tamata kecega.
9Ia sa cakava tale tikoga e dua na soqo ni kana magiti kei na veivakamarautaki vei ira na yalewa ena loma ni valenitui o Vasiti na ranadi.
10Ena i kavitu ni siga ni soqo oqo ni sa gunu ka marau tiko na tui, a sa kacivi iratou na lewe vitu na enuki#1.10 A kena i balebale na tagane dauveiqaravi sa vakacacani se kau laivi na nona yago tabu. ka ratou nona dauveiqaravi na tui, o ya o Meumani, o Piseca, o Apona, o Pikica, o Epakica, o Seca, kei Kakasi. 11A qai vakaroti iratou me la'ki kau mai o Ranadi Vasiti, ka me daramaka tu mai na nona i sala vakaranadi. A sa yalewa matavinaka na ranadi, ka gadreva na tui me vakaraitaka na kena totoka vakaoti vei ira na i vakalesilesi kei ira kece na nona vulagi. 12Ia ni ratou sa tukuna vua na ranadi na i vakaro ni tui, a qai bese ni lako mai o koya. A ka oqo sa vakavuna me cudru vakalevu sara kina na tui.
13A qai qara i vakasala vei ira na tamata vuku na tui era kila na ka me caka ena leqa vakaoqo, ni sa nona i vakarau tudei na tui me dau qara i vakasala vei ira era kila vakavinaka na veika vakalawa kei na veika ni veiliutaki. 14A qai taro na tui vei iratou o Kasina, o Seca, o Atimata, o Tasisi, o Mereisi, o Masena kei Memukani — o iratou na lewe vitu na turaga ni Perisia kei Mitia e ratou taravi koya ena veiliutaki ena matanitu, ka ratou veikilai kaya sara vakavinaka. 15A sa kaya vei iratou, “Na cava e dodonu vakalawa me caka vei Vasiti na ranadi ena vuku ni nona sega ni muria na noqu i vakaro e ratou a kauta vua na noqu i talai?”
16Sa qai vosa o Memukani vua na tui kei ira na nona i vakalesilesi: “E sega ni cala duadua ga vua na tui na Ranadi; sa cala talega o koya vei ira kece na i vakalesilesi ni tui, io sa cala vei ira na tagane kecega ena matanitu raraba! 17Na ka sa cakava oqo na Ranadi era na rogoca kecega na yalewa ka na vakavuna me ra beci keda na watidra, ka ra na kaya vakaoqo. ‘E a vakarota o Asuerosi na tui me la'ki kau mai vua o Vasiti na Ranadi, ia a qai bese na Ranadi ni lako vua.’ 18O ira sara mada ga na marama ni Perisia kei Mitia era rogoca rawa edaidai na i vakarau a vakayacora oqo na Ranadi era na talanoataka vei ira na nona vakailesilesi liu na tui ka sa na ka levu sara kina na veibeci kei na kena cudru. 19Kevaka sa lomamuni vakakina na tui, ia mo ni vakauta e dua na i vakaro vakatui, ka me okati talega me lawa tudei ni vanua o Perisia kei Mitia, o ya me sa kakua tale ni qai rairai yani vei kemuni na tui o Vasiti. Me vakaroti me sa soli na nona i tutu vakaranadi vua e dua tale e uasivi cake. 20Ni sa kacivaki yani ki na matanitu taucoko na i vakaro oqo, era na qai rokovi ira na dui watidra na yalewa kecega, se ra turaga vutuniyau se dravudravua.”
21A taleitaka na tui kei ira na nona daunivakasala na i tukutuku oqo, ka sa vakayacora kina na tui na i vakasala i Memukani. 22A sa veikauyaki na i tukutuku ni tui oqo ki na veiyasana mai na i vola era volai ena nodra matanivola duidui eso kei na vosa duidui vakamatatamata, ka tukuni kina ni dodonu me ra i liuliu ni matavuvale na turaga vakawati.
Currently Selected:
ESITERI 1: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.