YouVersion Logo
Search Icon

JONI 8

8
Na Yalewa ka a Vesu ni Veibutakoci Tiko
1Era sa qai lako ki na nodra veivale na tamata, ia sa lako ga ko Jisu ki na Ulunivanua ni Veiolive. 2A sa lesu tale ki na Valenisoro o koya ena mataka lailai ni siga ka tarava. Era sa soqoni vata yani vua na tamata kecega; ka sa dabe sobu ka tekivu vakatavulici ira. 3Era sa qai kauta yani vua o ira na daunilawa kei ira na Farisi e dua na yalewa sa vesuki mai ni sa veibutakoci, ka ra vakaturi koya ena kedra maliwa. 4Era sa qai kaya vua, “Vakavuvuli, sa vesu mai na yalewa oqo ni se ia tiko na veibutakoci. 5Ena noda Lawa, sa vakarota kina o Mosese me ra vakaviriki o ira era cakava na ka oqo. Ia, na cava o sa kaya kina?”#Vsoro 20.10; Vrua 22.22-24 6Era sa kaya oqo me ra veretaki koya ka beitaki koya rawa kina. Ia sa cuva ga ko Jisu ka volavola ena buturara ni vale (nuku) ena nona i qaqalo.
7Ni ra se tucake tu ga e kea ka vakatarogi koya tiko, a sa qai tu cake vakadodonu o koya ka kaya vei ira, “O koya vei kemuni e sega na nona i valavala ca, me viritaka na i matai ni vatu.” 8A sa qai cuva sobu tale ka volavola ena buturara ni vale. 9Ia ni ra sa rogoca oqo, era sa qai curucuru yadudua yani ki tautuba, ka tekivu sara ga vei ira na qase. E rau sa qai mai vo tikoga e kea ko Jisu kei na yalewa o ya. 10Sa qai tu cake ko Jisu, ka kaya vua, “Yalewa, sa evei o ira oqo? Sa sega tale li ni dua e vo me lewai iko mo cudruvi?”
11Sa qai sauma lesu na yalewa ka kaya, “Sa sega saka ni dua e vo.”
Sa qai kaya ko Jisu, “Oi au talega sa sega ni lewai iko mo cudruvi. Mo lako ga, ia mo kakua ni valavala ca tale.”
Ko Jisu na Rarama kei Vuravura
12Sa qai vosa tale vei ira na Farisi ko Jisu, ka kaya, “Oi au na rarama kei vuravura. O koya yadua sa muri au ena tiko vua na rarama ni bula ka na sega ni lako ena butobuto.”#Maciu 5.14; Joni 9.5
13Era sa qai kaya vua na Farisi, “O iko o sa tukuni iko tikoga; sa sega ni dina na veika o tukuna tiko.”#Joni 5.31
14A sauma ko Jisu, ka kaya vei ira, “E segai sara. E dina ga ni'u sa tukuna tikoga na veika me baleti au, ia sa dina ga na noqu i tukutuku, baleta ni'u sa kila na vanua ka'u sa lako mai kina kei na vanua au sa lako tiko kina. Oi kemuni o ni sa sega ni kila na vanua ka'u sa lako mai kina se na vanua au sa lako tiko kina. 15O ni sa dau vakalewa na ka ena sala vakatamata; ia, oi au, au sa sega ni vakalewa e dua na tamata. 16Ia kevaka me'u vakayacora vakakina, ena dina ga na noqu vakalewa na ka, baleta ni'u sa sega ni vakayacora duadua vakai au na ka oqo; na Tamaqu ka sa talai au mai sa tiko vata kei au. 17Sa volai tu ena nomuni Lawa ni sa dina na i tukutuku kevaka sa vakadonuya vata e lewe rua na i vakadinadina.#Vrua 19.15 18Au sa vakadinadinataka na ka ena vukuqu, ka sa vakadinadina talega ena vukuqu na Tamaqu sa talai au mai.”
19Era sa qai tarogi koya, “E vei ga o tamamu?”
Sa qai sauma ko Jisu ka kaya, “O ni sa sega ni kilai au se Tamaqu. Kevaka o ni sa kilai au, o ni na kilai Tamaqu talega.”
20Sa cavuta na veivosa oqori ko Jisu ni sa vakatavuvuli tiko ena loma ni Valenisoro, ena rumu ka dau maroroi kina na kato ni soli. Ia sa sega ni dua e vesuki koya, baleta ni se bera ni yaco mai na nona gauna.
Dou na Sega ni Lako Rawa ki na Vanua Au sa Lako Tiko Kina
21Sa qai kaya tale vei ira ko Jisu, “Au sa lako tiko ena noqu i lakolako; o ni na qai vakasaqarai au, ia o ni na mate ena vuku ni nomuni i valavala ca; o ni na sega ni lako rawa ki na vanua au sa lako tiko kina.”
22Era sa qai kaya kina na nodra i liuliu na Jiu, “E tukuna o koya ni da na sega ni rawa ni lako rawa ki na vanua sa lako kina. E kena i balebale beka oqo ni na vakamatei koya ga vakai koya?”
23Sa qai kaya vei ira o koya, “Oi kemuni, o ni lewe ni vuravura ka tiko oqo e ra, ia oi au, au lako mai cake. Oi kemuni, o ni lako mai na vuravura oqo, ia oi au, au sega ni lako mai kina. 24O koya oqo au sa kaya kina vei kemuni ni o ni na mate ena vuku ni nomuni i valavala ca; ka o ni na mate ena vuku ni nomuni i valavala ca kevaka o ni sa sega ni vakabauta ni sai au o Koya.”
25Era sa qai kaya vua, “O cei o iko?”
Sa qai kaya vei ira ko Jisu, “Na ka ga au sa tukuna vei kemuni mai na i vakatekivu. 26E vuqa tu na ka me'u tukuna ka vakalewa me baleti kemuni, ia sa dina o koya ka a talai au mai; ka'u sa tukuna ki vuravura na ka ga au a rogoca mai vua.”
27Era a sega ni kila rawa ni a vosa tiko ko Jisu me baleti Tamana. 28Sa qai kaya tale vei ira o koya, “Ni o ni sa na laveta cake na Luve ni Tamata, o ni na qai kila ni Sa i Au oi Au; o ni sa na qai kila talega ni sega ni dua na ka me'u cakava vaka i au ga. Ia au sa dau tukuna ga na veika e vakatavulici au kina ko Tamaqu. 29Sa tiko vata ga kei au o koya ka a talai au mai; e sega ni biuti au me'u tiko duadua ga; ni'u sa dau cakava tikoga na ka e vinakata.”
30Era a mani vakabauti koya e lewe vuqa vei ira era a rogoca na nona vosa.
Na Dina ena Veisereki me Rawati na Bula Galala
31Sa qai kaya ko Jisu vei ira na Jiu ka ra sa vakabauti koya, “Kevaka o ni muria tikoga na noqu vosa, o ni sa qai noqu tisaipeli dina; 32ka o ni na kila na ka dina, ka na sereki kemuni na ka dina.”
33Era sa qai kaya vua, “Oi keimami na kawa i Epara-ama; keimami a sega ni bau bobula vua e dua na tamata ena dua na gauna. A cava na i balebale ni nomu kaya, ‘O ni na sereki’?”#Maciu 3.9; Luke 3.8
34Sa qai kaya vei ira ko Jisu, “Au sa tukuna vakadodonu sara vei kemuni, o koya ga sa kitaka na i valavala ca sa bobula ki na i valavala ca. 35Sa sega ni lewe ni vuvale tudei o koya na bobula, ia na luvena tagane ga na i taukei ni vale o ya sa lewe ni vuvale tudei ka tawamudu. 36O koya oqo, kevaka sa sereki kemuni na Luvena, o ni sa na qai sereki dina sara kina. 37Au sa kila ni o ni kawa i Epara-ama. Ia o ni sa via vakamatei au tiko, baleta ni o ni sa sega ni vakadinata na noqu vosa. 38Au sa dau tukuna ga na veika sa vakaraitaka mai vei au ko Tamaqu, ia e dodonu vei kemuni mo ni sa cakava na veika o ni sa rogoca mai vei tamamuni.”
39Era sa qai vosa ka kaya vua, “Na tama i keimami o Epara-ama.”
Sa qai kaya vei ira ko Jisu, “Kevaka o ni sa luve i Epara-ama dina, ke o ni na kitaka na veika sa cakava o Epara-ama. 40Na ka ga au sa bau kitaka, o ya me'u tukuna na veika dina au a rogoca mai vua na Kalou, ia oi kemuni, o ni sa via vakamatei au tiko. E a sega ni bau cakava e dua na ka vakaoqo o Epara-ama! 41O ni sa cakava tikoga na ka sa cakava na tamamuni.”
Era sa qai kaya vua, “Keimami a sega ni sucu mai ena veibutakoci. E duabau ga na tama i keimami, o ya ga na Kalou.”
42Sa qai kaya vei ira ko Jisu, “Kevaka e tamamuni dina na Kalou, ke o ni a lomani au, baleta ni'u sa lako mai vua na Kalou ka'u sa tiko oqo edaidai. Au a sega ni lako mai vakai au ga, ia sa talai au ga mai o koya. 43A cava o ni sega ni kila tiko kina na i balebale ni noqu vosa? E baleta ga ni o ni sa sega ni via vakarogoca. 44Na tamamuni na Tevoro, ka o ni sa gadreva mo ni cakava na veika sa gadreva na tamamuni. A sa daulaba mai na i vakatekivu o koya, e sega ni dau tovaka na dina, ka ni sega ga vua na dina. Ni sa tukuna o koya e dua na i tukutuku lasu, sa dodonu sara tu ga vua o ya, ka ni sa daulasulasu o koya ka sa vu mai vua na lasu kecega. 45Ia au sa tukuna tiko oqo na ka dina, ni sai koya o ya na vuna o ni sa sega kina ni vakabauti au. 46O cei vei kemuni e rawa ni vakadinadinataka ni tiko e dua na noqu i valavala ca? Kevaka au sa tukuna tiko vei kemuni na ka dina, a cava na vuna o ni qai sega ni vakadinati au kina? 47O koya sa lako mai vua na Kalou sa dau vakarorogo ki na vosa ni Kalou. Ia, oi kemuni, o ni sa sega ni lako mai vua na Kalou, ka oqori na vuna o ni na sega ni vakarorogo kina.”
Ko Jisu kei Epara-ama
48Era sa qai sauma na Jiu, ka kaya vua, “E sega li ni dina na neimami a kaya ni o kai Samaria, kei na neimami a kaya talega ni curumi iko tiko e dua na tevoro?”
49Sa qai kaya ko Jisu, “E sega ni curumi au tiko na tevoro. Au sa vakarokorokotaki Tamaqu, ia o ni sa vakalialiai au ga. 50Au sa sega ni vakasaqara na noqu lagilagi, sa tiko e dua sa vakasaqara ka vakatau lewa kina. 51Au tukuna vakadodonu sara vei kemuni, kevaka e dua e katona e lomana na noqu vosa ka talairawarawa kina, ena sega sara ni mate.”
52Era sa qai kaya vua o ira na Jiu, “Sa qai macala vei keimami ni curumi iko dina tiko e dua na tevoro! Sa mate o Epara-ama; era sa mate talega na parofita; ia o iko, o kaya, ‘Kevaka e dua sa katona na noqu vosa ka talairawarawa kina ena sega sara ni mate.’ 53O iko beka o cecere cake vei Epara-ama, na tama i keimami? Sa mate o koya ka ra sa mate talega na parofita; o nanuma tiko o cava o iko?”
54Sa qai sauma tale ko Jisu, ka kaya, “Kevaka au vakalagilagi au ga, ena ka wale na noqu lagilagi; ia ko Tamaqu, o koya o ni kaya tiko ni nomuni Kalou, o koya ga e vakalagilagi au. 55O ni sega ni kilai koya: ia au kilai koya oi au. Kevaka au na kaya ni'u sega ni kilai koya, au sa na wili vaka tamata lasulasu me vakataki kemuni; ia au sa kilai koya, ka sa katona ka muria tiko na nona vosa. 56E a marautaka vakalevu o Epara-ama, na tamamuni, ni a tiko me raica na gauna ni noqu lako mai. Ia sa mani raica ka reki kina.”
57Era sa qai kaya vua o ira na Jiu, “O sa raici Epara-ama dina? E se sega mada ga oqo ni o yabaki limasagavulu!”
58Sa qai kaya vei ira ko Jisu, “Au tukuna vakadodonu sara vei kemuni, ni se bera ni sucu o Epara-ama, au sa bula tu oi au.”
59Era sa qai tomi vatu me ra vakaviriki koya, ia sa vunitaki koya ko Jisu ka lako tani mai na Valenisoro.

Currently Selected:

JONI 8: FNV

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy