2 SAMUELA 1
1
Rogoca o Tevita na Mate i Saula
1Ia ni sa mate o Saula, sa lesu tale mai o Tevita ena nona ravuti ira na Amalekaiti ka mai tiko e Sikilaki me rua na siga. 2Ena i katolu ni siga, sa qai lako mai e dua na tamata mai na i tikotiko ni valu i Saula. E a dresulaka na nona i sulu ka kaburaka e uluna na qele me vakaraitaka na nona lolosi. Sa qai lako mai vei Tevita ka cuva ki na qele ena vakarokoroko. 3A sa tarogi koya o Tevita, “O sa lako mai vei?”
A sa kaya vua o koya, “Au a dro bula saka mai na nodra i tikotiko vakaivalu na Isireli.”
4A sa kaya vua o Tevita, “Mo tukuna mada mai vei au se na cava sa yaco.”
A sa kaya vua na tamata o ya, “Sa vakasuka ka dro tani mai na i valu na neimami mataivalu, ka ra lewe levu era mate ena keimami maliwa. E rau sa mate talega o Saula kei Jonacani na luvena.”
5A taroga tale o Tevita vua na cauravou ka mai tukutuku, “O kila vakacava ni rau sa mate o Saula kei Jonacani?”
6A sa kaya vua o koya, “Au a toka mai Ului Qiliboa ka'u a raici Saula ni sa ravita toka na nona moto, ka sa cici volekati koya na nodra qiqinivalu na meca kei ira na lewe ni mataivalu vodo ose.#1Samu 31.1-6; 1Vei 10.1-6 7Ia ena gauna e rai mai kina ki muri ka raici au, sa qai kacivi au. 8A sa tarogi au, ‘O cei o iko?’
Au a sauma vua, ‘Oi au saka e dua vei ira na Amalekaiti.’ 9A qai kaya vei au o koya, ‘Lako mai ki yasaqu, mo vakamatei au! Au sa mavoa vakaca ka'u sa voleka ni mate.’ 10Au sa qai lako yani ki yasana ka vakamatei koya, ni'u kila ni na sega tale ni bula rawa ena nona bale oqo ki ra. Au a qai taura na i sala vakatui mai uluna kei na qato mai na ligana, ka kauta mai oqo vei kemuni na noqu turaga.”
11A sa dresulaka na nona i sulu o Tevita ena vuku ni nona rarawa, ka ra sa vakayacora vakakina o ira kece na nona tamata era tu vata kaya. 12Era sa tagi, ka vakaloloku, ka lolo me yacova na yakavi ena vuku i Saula kei Jonacani, kei na vukudra talega na tamata i Jiova kei na mataqali i Isireli, baleta ni sa lewe levu era sa mate ena i valu.
13A vosa o Tevita vua na cauravou ka mai tukutuku vua, ka kaya, “O kai vei o iko?” A sauma vua o koya, ka kaya, “Oi au saka e dua na luve ni kai tani, e dua vei ira na Amalekaiti.” 14A sa kaya vua o Tevita, “E vakaevei, o a sega li ni rere ni dodoka yani na ligamu mo vakamatei koya na i lumuti ni Kalou?” 15A sa kaciva e dua na nona tamata o Tevita ka kaya, “Mo toro mada vua, ka vakamatei koya.” A sa mokuta mate na kai Amalekaiti o ya o koya. 16A sa kaya vua o Tevita, “Sa baleti iko ga na nomu mate; ni sa beitaki iko na gusumu ena nomu kaya, ‘Au sa vakamatei koya sa lumuta ko Jiova.”
Tagilagalagataki Saula kei Jonacani o Tevita
17A sa tagilagalagataki Saula kei Jonacani na luvena o Tevita ena sere oqo, 18ka vakarota me vakatavulici vei ira na Juta na Sere ni Dakaititi. (Sa volai oqo e Na i Vola i Jasari.)#Josua 10.13
19“Ena veidelana e Isireli era sa bale mate kina na neimami i liuliu!
Era sa bale kina na sotia yaloqaqa!
20Kakua ni la'ki tukuna ki Kaca,
se ki na veisalatu e Esikaloni;
De ra reki na nodra goneyalewa na kai Filisitia;
De ra meke ni marau na luvedra yalewa na tamata tawa cili.
21“Oi kemuni na veiulunivanua o Qiliboa,
Me kakua na tegu se uca e tauci kemuni,
ka me kakua ni vuavuai na nomuni veiwere.
Ni ra davo madua koto e kea na nodra i sasabai na qaqa;
Sa kabita tu na veveka na i sasabai i Saula.
22“Mai na nodra dra na moku, kei na nodra uro na qaqa,
A sega ni gole tani na dakaititi i Jonacani,
Sa sega ni tale lala na i seleiwau i Saula.
23“E rau a dau veirogoci ni rau a bula o Saula kei Jonacani,
erau sa sega ni tawase ena bula, ka vakakina ena mate;
sa totolo cake mai na ikeli, ka kaukauwa cake mai na laione.
24“Oi kemuni na goneyalewa ni Isireli, mo ni tagicaki Saula,
O koya a vakaisulutaki kemuni ena i sulu kulakula totoka,
Ka ukutaka na nomuni i sulu ena koula.
25“Oilei! era sa bale na sotia yaloqaqa,
era sa mate ena i valu!
Sa bale mate koto o Jonacani ena veidelana.
26“Au sa rarawataki iko vakalevu, I Jonacani na tuakaqu;
ni o sa rui bibi dina vei au!
E veivakurabuitaki na nomu loloma vei au,
sa uasivita na nodra loloma na yalewa.
27“Oilei! Era sa bale sa sotia yaloqaqa,
ka rusa tu mai na nodra i yaragi ni valu.”
Currently Selected:
2 SAMUELA 1: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.