YouVersion Logo
Search Icon

1 TIMOCI 1

1
1Oqo na i vola mai vei Paula, na i apositolo i Karisito Jisu ena lewa ni Kalou na noda i vakabula kei Karisito Jisu na noda i nuinui —
2 # Caka 16.1 Kivei Timoci, na luvequ dina ena vakabauta:
Me solia vei iko na Kalou na Tamada kei Karisito Jisu na noda Turaga na lolomasavu, na yalololoma kei na vakacegu.
Na i Vakaro Eso me Baleta na i Vakavuvuli Lasu
3Au vinakata mo tiko ga e Efeso, ni'u a vakamasuti iko kina ena noqu i lakolako ki Masitonia. Eso vei ira na tamata maikea sa vakatavuvulitaka tiko na i vakavuvuli lasu, ka sa dodonu mo vakaroti ira me ra tarova na ka oqo. 4Tukuna vei ira me ra kakua ni vakabauta na i talanoa buli eso kei ira na i vola ni kawa balabalavu oqori, ni ra sa kauta ga mai na veileti; sa sega sara ni kilai na i naki ni Kalou mai na veika oqo, sa kilai ga ena vakabauta. 5Ia na i naki ni vakaro oqo me vakatubura na loloma sa vu dina mai na yalosavasava, mai na lewa-e-loma vinaka, kei na vakabauta dina. 6Eso era sa gole tani mai na veika oqo ka ra sa yali vakatawamacala yani ena veivosaki lialia. 7Era sa gadreva me ra dauvakatavuvulitaka na lawa ni Kalou, ia era sa sega mada ga ni kila na ka era vosataka se na veika era sa vosa doudou kina.
8Eda sa kila ni sa ka vinaka na Lawa kevaka sa muri vakadodonu sara me vaka na kena i valavala. 9Sa dodonu me kilai ni sa sega ni buli na lawa me baleti ira na tamata vinaka, ia me baleti ira ga na daubasu lawa kei ira dauvakacaca, o ira na tawa lotu kei na daucaka ca, o ira sa sega ni vakalou se vakayalo, o ira sa vakamatea na tamadra se na tinadra, o ira na daulaba, 10o ira na dauveibutakoci, o ira na dauveimoceri vakatagane se vakayalewa, o ira na dauvesu tamata me rawati kina na lomadra, o ira na tamata lasulasu kei ira na daububului vakailasu se cakava na veika sa veisaqasaqa kei na i vakavuvuli dina. 11Na i vakavuvuli oqo sa kunei ena kosipeli ka sa vakacolati vei au me'u vunautaka, oqori na i Tukutuku Vinaka mai vua na Kalou cecere ka dokai.
Na Vakavinavinaka me Baleta na Loloma ni Kalou
12Au sa vakavinavinaka vei Karisito Jisu na noda Turaga, o koya sa solia vei au na kaukauwa me baleta na cakacaka oqo, ni sai koya sa nanuma ni'u sa yalodina ka digitaki au kina ki na cakacaka oqo, 13#Caka 8.3; 9.4,5veitalia ga na noqu a dau vakasewasewani koya e liu ka dau vakararawataki koya ka tamata viavialevu vua. A sa yalololoma ga vei au na Kalou baleta ni'u sa vakayacora tu na veika oqo ena lecaika, ena vuku ni kena sega vei au na vakabauta. 14Ia sa qai sovaraka vei au na Turaga na nona lolomasavu ka solia vei au na vakabauta kei na loloma ka sa noda ni da sa tu vata kei Karisito Jisu. 15Sa i koya oqo na i tukutuku dina me ciqomi ka vakadinati: Sa lako mai ki vuravura ko Karisito Jisu me vakabulai ira na tamata i valavala ca. Oi au oqo na tamata i valavala ca levu duadua vei ira kecega, 16ia sa yalololoma ga vei au na Kalou, ka sa vakaraitaka kina vei au ko Karisito Jisu na titobu ni nona vosota vakadede voli mai na noqu bula ni sa gadreva o koya me'u i vakaraitaki, me'u i dusidusi vei ira era via lako mai me ra vakabauti koya ni sa sala ki na bula tawamudu. 17Me rokovi ka dokai na Tui ni veitabagauna kecega, o koya sa sega ni mate rawa ka sa sega talega ni raici rawa ena mata, o koya na Kalou e duabau ga — io me vakacerecerei ka tawamudu! Emeni!
18I Timoci na luvequ, au sa vakataqara vei iko na i tavi oqo ena vuku ni vosa ni parofisai eso sa tukuni oti me baleti iko. Mo yalodina kina ka vakayagataka me nomu i yaragi mo vala vakavinaka kina; 19mo taura matua na nomu vakabauta kei na lewa-e-loma vinaka. Eso era sa sega ni via vakarorogo ki na nodra lewa-e-loma ka sa vakacacani kina na nodra vakabauta. 20E rau sa vakaoqo o Imeneo kei Alekisada, oi rau ka'u a totogitaka ena noqu soli rau vei Setani; me rau na vulica kina me rau muduka na nodrau vosavakacacataka na Kalou.

Currently Selected:

1 TIMOCI 1: FNV

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy