1 TUI 1
1
Sa Qase Sara na Tui o Tevita
1A sa qase sara o Tevita na tui, ka dina ga ni ra a tutuvitaki koya na nona tamata ena i tutuvi, ia sa sega ga ni katakata rawa. 2Era a qai kaya vua na nona i vakalesilesi, “Kemuni na tui, me qarai mada mai e dua na goneyalewa mo drau tiko vata ka qaravi kemuni. Ena davo volekati kemuni o koya mo ni katakata kina.” 3Era a vakasaqara ena veiyasana kecega e Isireli me ra kunea kina e dua na goneyalewa mata vinaka, era a qai kunei Avisaki e dua na goneyalewa ni Sunemi ka ra kauti koya mai vua na tui. 4A mata vinaka sara na goneyalewa oqo ka dau qaravi koya na tui; ia sa sega ga ni moceri koya na tui.
Taura na i Tutu o Atonaija
5Ia oqo, a sa qai lavelaveti koya cake o Atonaija, na luve i Akici, ka kaya, “Au sa na tui;” ka sa vakarautaka eso na nona qiqinivalu kei na so na tamata dauvodo ose, kei na lewe 50 na tamata me ra daucici tiko e liu vua.#2Samu 3.4 6A sega mada ni se vunauci koya vakadua o tamana ena dua na gauna, me bau taroga, “A cava mada o cakava kina na ka oqo?” A sa dua na tagane rairai vinaka o Atonaija, ka a sucu taravi Apisalome o koya. 7A sa veivosaki kei Joape (ka tinana o Seruwaia) vata kei Epaiaca na bete, ka rau vakadonuya vata me rau tokoni koya. 8Ia e ratou a sega ni veitokoni vei Atonaija o Setoki na bete, o Penaia na luve i Jioiata, o Necani na parofita, o Semeai, o Rei, kei ira na sotia matayadra i Tevita.
9A sa vakamatea o Atonaija eso na sipi, na bulumakau kei na manumanu uro mai Vatu ni Gata, ka voleka ki Enirokeli. A sa veisureti vei ira kece na vo ni luve i Tevita na tui kei ira na nona i vakalesilesi mai Juta me ra tiko ena nona solevu oqo, 10ia a sega ga ni kacivi Solomoni na tacina, se o Necani na parofita, se o Penaia, se o ira na sotia matayadra ni tui.
Sa Buli me Tui o Solomoni
11A sa lako yani o Necani vei Vaciseva na tina i Solomoni, ka tarogi koya, “O sega beka ni se rogoca ni sa buli koya me tui o Atonaija na luve i Akici? Ia e qai sega tu ni kila na veika oqo o Tevita na tui!#2Samu 12.24 12Kevaka o vinakata mo bula o iko vata kei na luvemu o Solomoni, ia oqo na noqu i vakasala vei iko. 13Mo lako sara vakatotolo vua na tui o Tevita ka kaya vua, ‘Kemuni na tui, o ni sega beka li ni a bubului vei au na nomuni vada ka kaya ni na sosomitaki kemuni na luvequ ena nomuni i tutu vakatui? Ia na cava na vuna sa tui kina oqo o Atonaija?’ 14Ena gauna o drau veivosaki tiko kina kei koya na tui, au na qai muri iko yani ki loma ka vakadinadinataka na nomu vosa.”
15A sa lako vua na tui o Vaciseva ka curu ki na nona rumu. A sa qase sara na tui; a sa qaravi koya tiko o Avisaki na yalewa ni Sunemi. 16A sa cuva sobu ena vakarokoroko o Vaciseva. A sa kaya sara mai na tui vei Vaciseva, “A cava o vinakata?”
17A sauma o Vaciseva ka kaya, “Noqu turaga, o ni a bubuluitaka vei au na nomuni vada, ena yaca i Jiova na nomuni Kalou, ka vaka: Ena sosomitaki au vakaidina o Solomoni na luvemu me tui, ka na tiko ena noqu i tikotiko vakaturaga. 18Ia oqo, sa yaco me tui o Atonaija, ka dina ga ni o ni se sega ni kila oqo na noqu turaga na tui. 19A sa vakamatea o Atonaija e vica vata na bulumakau, eso na manumanu uro, kei na vuqa sara na sipi, ka kacivi ira kece na luvena na tui, o Epaiaca na bete, kei Joape na komada ni mataivalu; ia sa sega ga ni kacivi Solomoni na nomuni tamata o koya. 20Ia oqo, kemuni na noqu turaga na tui, sa wanonovi kemuni tiko na matadra kecega na Isireli taucoko, mo ni tukuna vei ira, se o cei me na sosomitaki kemuni na noqu turaga na tui, me tiko ena nomuni i tikotiko vakaturaga. 21Kevaka e sega, sa na yaco vakaidina me keirau sa na okati vakatamata cala, o au kei Solomoni na luvequ, ni o ni sa na mate, ka la'ki vakotori vata kei ira na nomuni qase.”
22Ia ena gauna e rau a veivosaki tiko kina o Vaciseva kei koya na tui, a sa curu yani o Necani na parofita. 23A sa tukuna sara vua na tui, “Oqo o Necani na parofita.” Ia a lako yani vua na tui o Necani ka vakacuva na uluna ena vakarokoroko. 24A sa kaya o Necani, “Kemuni na noqu turaga na tui, o ni sa kacivaka oti beka ni na sosomitaki kemuni ena nomuni i tutu vakatui o Atonaija? 25Ni sa lako sobu edaidai o koya, ka sa vakamatea e levu na bulumakau, na manumanu uro, kei na vuqa na sipi. A sa qai kacivi ira kecega na luvena na tui, o Joape na komada ni mataivalu,#1.25 Vakadewa va-Kirisi Joape na komada ni mataivalu; Ena kena vaka-Iperiu kei iratou na komada ni valu. o Epaiaca na bete; ka ra sa kana ka gunu vata tiko ena marau ena gauna sara ga oqo, ka kailavaka voli, ‘Me bula balavu na tui o Atonaija!’ 26Ia, sa sega ga ni sureti au na nomuni tamata, kei Setoki na bete, kei Penaia na luve i Jioiata, kei na nomuni tamata o Solomoni. 27O ni sa cakava li na veika oqo na noqu turaga na tui, ka o ni sega ni vakatakila mada vei au na nomuni tamata se o cei me veisosomitaki ki na i tikotiko vakaturaga?”
28A sa vosa o Tevita na tui, ka kaya, “Dou kacivi Vaciseva tale mada mai ki loma.” A sa curu lesu yani ki loma o koya vua na tui, ka mai tucake tu e matana. 29A sa qai vosa ni bubului na tui, ka kaya, “Me vaka sa bula ko Jiova, ka a vakabulai au mai na veika rarawa kecega, 30au sa na vakayacora edaidai na noqu bubului vei iko ena yaca i Jiova na nodra Kalou na Isireli, ni'u a kaya, ‘Ena sosomitaki au vakaidina na luvemu o Solomoni me dabe ena noqu i tikotiko vakaturaga me tui.”
31A sa vakacuva sobu na uluna o Vaciseva ena vakarokoroko vua na tui, ka kaya, “Me bula balavu na noqu turaga o Tevita na tui!”
32A sa kaya o Tevita na tui, “Dou kacivi iratou mai o Setoki na bete, o Necani na parofita, kei Penaia na luve i Jioiata kivei au.” A ratou sa lako mai vua na tui. 33Sa qai kaya vei iratou na tui, “Dou kauti iratou na noqu i vakalesilesi ni tikotiko vakatui; dou la'ki vakavodoki Solomoni na luvequ ki na noqu meule, ka kauti koya sobu ki na ulu ni wai na Kioni; 34ia me rau lumuti koya mai kea me nodra tui na Isireli o Setoki na bete kei Necani na parofita. Me qai uvuci na davui ka kailavaki vakadomoilevu yani, ‘Me bula balavu o Solomoni na tui!’ 35Mo ni qai muri koya cake mai, me mai tiko ena noqu i tikotiko vakaturaga; ni na tui o koya me kequ i sosomi; ia ka'u sa lesi koya me lewai ira na Isireli kei ira na Juta.”
36A vosa vua na tui o Penaia, na luve i Jioiata, ka kaya, “Emeni! me kaya talega vakakina ko Jiova na nona Kalou na noqu turaga na tui. 37Me vaka sa tiko ko Jiova kei na noqu turaga na tui, me tiko vakakina o koya vei Solomoni, ka me cakava me kaukauwa cake na nona i tikotiko vakaturaga mai vua na noqu turaga o Tevita na tui.”
38A lako sobu o Setoki na bete, o Necani na parofita, o Penaia na luve i Jioiata, o ira na Kireci, kei ira na Pileci, ka ra a vakavodoki Solomoni ki na meule i Tevita na tui, ka kauti koya ki Kioni. 39E kea, a qai taura o Setoki na bete e dua na tavaya waiwai olive mai na vale tabu, ka sa lumuti Solomoni. Era a uvuca na davui, ka ra kaya kecega na tamata, “Me bula balavu na tui o Solomoni!” 40Era a qai muri koya cake na tamata kecega, ka ra uvuca na bitu ni vakatagi, ka sa ka levu sara na nodra reki, ka yavavala na vanua ena levu ni domodra.
41Ni sa oti tiko na nodra kana magiti o Atonaija kei ira kece na nona vulagi, era a rogoca sara na rorogo. Ena nona sa rogoca o Joape na domo ni davui, a kaya o koya, “A cava na i balebale ni maue ka rorogo mai na koro?” 42Ni vosa tikoga o koya, raica, a lako mai o Jonacani na luve i Epaiaca na bete; ka kaya o Atonaija, “Mo curu mai, ni o sa tamata yaga o iko, ka o sa kauta tiko mai na i tukutuku vinaka.”
43A vosa vei Atonaija o Jonacani, ka kaya, “E sega, sa lesi Solomoni vakaidina me tui, o Tevita na noda turaga na tui; 44a tala vata kaya o koya na tui, na bete o Setoki, o Necani na parofita, kei Penaia na luve i Jioiata, kei ira na kai Kireci, kei ira na i Pileci, era a vakavodoki Solomoni ena nona meule na tui; 45e rau a lumuti koya mai Kioni me tui o rau o Setoki na bete, kei Necani na parofita: era a lako cake mai kea ena reki kei na marau levu, ka sa maue kina na vanua. Oqori na rorogo o ni a rogoca. 46A tiko o Solomoni ena i tikotiko vakaturaga ni tui. 47Era a lako talega na tamata na dauqarava na tui, vosa vakacaucautaka na turaga o Tevita na tui, ka ra kaya, ‘Me vakalevulevuya cake mada ga na yaca i Solomoni o koya na nomuni Kalou, me rogo levu cake mai na yacamuni, ka tara cake na nona i tikotiko mai na nomuni i tikotiko vakaturaga. A cuva sobu na tui ka masu ena nona i mocemoce. 48A sa kaya tale na tui, ‘Me vakavinavinakataki ko Jiova na Kalou ni Isireli, o koya a solia vua e dua na luvequ me tiko ena noqu i tikotiko vakaturaga, ka'u sa vakadinadinataka tiko e mataqu.”
49Era a rere ka sautaninini na tamata ka kacivi ira mai o Atonaija, era a tucake ka dui lako yani ena nodra sala. 50A rere o Atonaija, a tu cake ka la'ki kubeta tu na ucuna momoto ena tutu ni cabocabonisoro. 51A tukuni vei Solomoni, ka vaka, “Raica, sa rerevaki kemuni na tui o Atonaija; me vaka ni sa la'ki kubeta na tutu cecere ni cabocabonisoro, ka kaya, ‘Me bubului vei au edaidai o Solomoni na tui, ni na sega ni vakamatei au na nona tamata ena i seleiwau.”
52A sa kaya o Solomoni, “Kevaka sa vakadinadinataka ni sa tamata yaga o koya, ena sega ni rawa ni na lutu ki na qele e dua na drau-ni-uluna; ia kevaka sa kune vua na ca, ena mate o koya.” 53A talatala o Solomoni na tui, ka ra la'ki kauti Atonaija mai ena i cabocabonisoro. A lako mai o koya, ka cuva ni vakarokoroko vei Solomoni na tui; a qai kaya vua o Solomoni, “Mo lako ki na nomu vale.”
Currently Selected:
1 TUI 1: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.