Sere i Solomoni 1
1
1 #
1Tui 4.32
Na sere sa uasivia na veisere, e nei Solomoni.
Ai Matai ni Sere
Na Yalewa
2Me reguci au o vunituraga ena i regu ni gusuna:
Ni sa uasivi cake na nomuni dodomo ka ca na waini.
3Sa rui boi vinaka na nomuni waiwai ni veilumuti,
Kei na yacamuni sa vaka na i lumu talei sa sovaraki,
Ka ra sa taleitaki kemuni kina o ira na goneyalewa.
4Ni kauti au yani vei kemuni, me daru dro yani;
Ni mai noqu tui ka kauti au yani ki na nomuni rumu.
E daru na marau ka reki vata,
Ka cibitaka na nomuni dodomo sa uasivia na waini.
Sa rauta me ra vinakati kemuni na goneyalewa!
5Kemudou na yalewa ni Jerusalemi,
Oi au na yalewa baloa, ia ka'u sa matavinaka,
Au sa baloa me vaka na valelaca ni Kitari,
Ia sa rairai vinaka me vaka na i latilati ni vale i Solomoni.
6Kakua ni wanonovi au ena vuku ni noqu baloa,
Ka ni sa solia na roka ni yagoqu na katakata ni siga:
E ratou a cudruvi au na ganequ;
Ka ratou lesi au me'u qarava na veiloganivaini,
Ia na noqu loganivaini au sa sega ni qarava vinaka!
7Tukuna vei au, oi kemuni na noqu dodomo,
Evei na tikina o na kauti ira kina na nomuni sipi me ra kana?
Evei na vanua o na vakadavori ira kina ena siga levu tutu?
A cava li na vuna me'u vakasaqarai kemuni tale kina
E kedra maliwa na qelenisipi ka nodra na i vakatawanisipi tale eso?
Na Tagane
8O sega beka li ni kila, o iko sa matavinaka vei ira kecega na yalewa?
Mo muria na mawe ni yavadra na sipi,
Ka vakani ira na nomu luve ni me
Volekata na nodra valelaca na i vakatawanisipi.
9Au vakatauvatani kemuni, i noqu daulomani,
Kei na ose yalewa ena maliwa ni qiqi vakaturaga i tui Ijipita.
10Sa rui totoka na balumu ena kena i ukuuku,
Kei na domomu ena i taube vatu talei.
11Keitou na cakava na nomu sau koula,
Ka kena i ciqiciqi na siliva.
Na Yalewa
12A davo koto na noqu tui ena nona i dabedabe,
Ka sa kuvuraka yani na boi vinaka ni noqu i lumu talei.
13O noqu daulomani e koto vua na i boi ni mura
Ni davo no ena maliwa ni sucuqu.
14O noqu daulomani sa vaka na senikau ni veikau
Sa se e loma ni veivaini mai Eniketi
Na Tagane
15O sa matavinaka dina, isa noqu daulomani;
Io, o sa rui totoka vakaoti;
Ka sa vaka ga na ruve na matamu.
Na Yalewa
16O ni sa rairai vinaka ka musudonu, noqu daulomani,
Sa ka levu sara na noqu taleitaki kemuni.
Na veico drokadroka ena nodaru i mocemoce.
17Na kau sitari ena caka kina na i coka ni nodaru vale,
Ka kena siligi e cake na damanu.
Currently Selected:
Sere i Solomoni 1: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.