Roma 1
1
1Oqo na i vola i Paula, na dauveiqaravi ka i apositolo i Jisu Karisito, o koya sa lesi ka kacivi mai vua na Kalou me vunautaka na nona i Tukutuku Vinaka.
2Na i Tukutuku Vinaka oqo e sa yalataka makawa sara tu na Kalou ena gusudra na parofita me vaka ka volai tu ena i Vola Tabu. 3Sa tukuni tiko kina na ka e baleta na Luvena, na noda Turaga o Jisu Karisito, o koya ka a mai sucu vakatamata ena kawa i Tevita. 4Ia ena tikina vaka yalo sa vakaraitaki ena kaukauwa levu ni sa Luve ni Kalou ena nona vakaturi cake tale mai na mate. 5Ena vukuna ga sa solia kina vei keitou na Kalou na loloma-savu kei na i lesilesi vakaiapositolo me keitou vakaraitaka kina na sala vei ira na lewe ni veivanua kecega me ra vakabauta ka talairawarawa vua na Kalou. 6O ni sa okati talega kina mai Roma, oi kemuni sa kacivi kemuni na Kalou mo ni sa nei Jisu Karisito.
7Au sa volavola yani kina oqo vei kemuni kece mai Roma, oi kemuni sa lomani kemuni na Kalou ka kacivi kemuni mo ni nona tamata:
Me sobuti kemuni na loloma kei na vakacegu ni Kalou na Tamada kei na noda Turaga o Jisu Karisito.
Na Masu ni Vakavinavinaka
8Taumada, au sa vakavinavinaka vua na noqu Kalou ena vuku i Jisu Karisito me baleti kemuni taucoko sara, baleta ni sa rogovaki e vuravura taucoko na nomuni vakabauta. 9Sa noqu i vakadinadina na Kalou, o koya au sa qarava ena yaloqu taucoko ena kena vunautaki na i Tukutuku Vinaka me baleta na Luvena. Sa kila na Kalou ni'u sa dau nanumi kemuni tikoga 10ena veigauna kece ni noqu masu. Au sa kerea tiko vua na Kalou me bau solia e dua na gauna, kevaka e rawa, me'u sikovi kemuni kina. 11Ni'u sa gadreva vakalevu me'u raici kemuni ka vota vei kemuni eso na ka ni veivakalougatataki vakayalo me vakaukauwataki kemuni. 12A kena i balebale oqo me da vukei vata vakatautauvata ena veika vakayalo, o ya mo ni vukei au ena nomuni vakabauta, ka me'u vukei kemuni talega ena noqu vakabauta.
13Au vinakata mo ni kila, oi kemuni na wekaqu, ni sa vuqa na gauna au nakita kina me'u la'ki sikovi kemuni yani, ia e qai dau yaco ga e dua na ka me'u tarovi kina. Au gadreva tu me bau so talega vei kemuni me ra vuki me ra vakabauta na Turaga o Jisu ena vuku ni noqu cakacaka me vaka e sa yaco vei ira eso tale na kai matanitu tani.#Caka 19.21 14Ni sa tu e dua na noqu i tavi kivei ira na tamata kecega, vei ira sa rarama kei ira na butobuto, vei ira na vuli kei ira talega na lecaika. 15Sa i koya oqo au sa gadreva vakalevu kina me'u vunautaka talega na i Tukutuku Vinaka vei kemuni o ni tiko mai Roma.
Na Kaukauwa ni Tukutuku Vinaka
16Ni'u sa sega ni maduataka na i Tukutuku Vinaka; ni sai koya oqo na kaukauwa ni Kalou me vakabulai kina o ira kecega sa vakabauta; sa liu vei ira na Jiu, vei ira talega na kai matanitu tani.#Mari 8.38 17Sa vakaraitaki ena i Tukutuku Vinaka na sala sa vakadonui keda kina na tamata na Kalou; ni sa vakayacori oqo ena vuku ni vakabauta duadua ga. Me vaka sa volai e na i Vola Tabu, “Ena vakabulai o koya sa vakadonui koya na Kalou ena vuku ni nona vakabauta.”
Na i Tovo Ca ni Tamata#Ipe 2.4
18Sa vakaraitaki mai lomalagi na cudru ni Kalou me baleta na nodra i valavala ca kei na nodra i tovo dukadukali kecega na tamata era sa dau tarova na kena kilai na i vakavuvuli dodonu ena nodra i valavala. 19Sa totogitaki ira na Kalou baleta ni sa matata vinaka tu vei ira na veika kece e rawa ni kila na tamata me baleta na Kalou, ka ni a vakatakila ga vei ira na Kalou na veika o ya. 20Me tekivu mai na gauna sa buli kina na vuravura, sa laurai vinaka tu na veika vuni ni Kalou ena nona kaukauwa sa sega ni vakaiyalayala kei na nona i tovo ni bula vakalou, ka dina ga ni ra sa sega ni raici rawa ena mata vakayago. Era sa rawa ni raica o ya ena veika sa bulia na Kalou, ka sa sega kina na nodra i ulubale!#Ym 13.1-9; Sr 17.8 21Era sa kila tiko na Kalou, ia era sega ga ni vakarokorokotaki koya me vaka na kena dodonu, ka ra sega talega ni vakavinavinaka vua. Ia sa yaco me lialia kina na nodra vakanananu, ka butobuto na nodra vakasama. #Efe 4.17,18 22Era kaya ni ra sa vuku, ia era sa lialia ga. 23Era sa sega ni qarava na Kalou dina, ia era sa qarava ga na veivakatakarakara e caka me vaka na tamata se manumanu vuka, se na manumanu yava i va se na veika sa dau qasi.#Vrua 4.16-18; Ym 11.15; 12.24; 13.10-19
24Sa i koya o ya na vuna sa laivi ira kina na tamata na Kalou me ra vakayacora na veika dukadukali e gadreva na lomadra, ka cakava vakataki ira na veika e veivakamaduataki. 25Era sa biuta na i vakavuvuli dina me baleta na Kalou ka maroroya me nodra na veika lasu. Era sa cuva ka qarava na ka e bulia na Kalou ka sega ni sokalou vua na Dauveibuli, o koya sa dodonu me vakacaucautaki ka sega ni mudu! Emeni.
26Ena vuku ni nodra sa vakayacora na veitovo vakaoqo, sa laivi ira kina na Kalou me ra vakayacora na veigagadre ca e veivakamaduataki. O ira sara mada ga na yalewa era sa vakayagataka vakatani na tikidra vakayalewa. 27Sa vakakina o ira na tagane ni ra sa biuta tani na i valavala kilikili me ra veidomoni ga kei ira na yalewa, ka ra sa veivinakati ga vakataki ira. Era sa vakayacora vakatagane na veika e veivakamadualaki; o koya oqo era na sotava kina na i totogi sa dodonu me tau vei ira.
28Ia ni ra sa bese ni kila na tamata na veivakavuvuli dina e baleta na Kalou, sa mani laivi ira kina na Kalou me ra kitaka na veika ca vakasisila kecega era rawa ni vakasamataka. 29Era sa vakasinaiti ena veika ca kecega, na veika dukadukali, na kocokoco, na veicati, na vuvu, na laba, na veivala, na lasu, na yalo cudrucudru kei na dauvakaucaca. 30Era veikaseti vakataki ira, era cata na Kalou, veivakasewasewani, dokadoka ka qaciqacia; era sa dau vakasamataka e vuqa na sala me ra cakava kina na ka ca, ka ra sa sega ni muria na nodra vosa na nodra i tubutubu. 31Era sa yalowai; era sega ni dau vakayacora na nodra vosa ni yalayala, ka sega ni dau veikauwaitaki se lomani ira na tani. 32Era sa kila na lewa ni Kalou ni sa dodonu me ra mate o ira na tamata vakaoqo. Ia e sega walega ni ra cakava tikoga, era vakadonui ira talega na tani era vakayacora tiko.
Currently Selected:
Roma 1: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.