Maciu 5
FNVDC12

Maciu 5

5
Na Vunau mai na Ulunivanua
1Ni sa raici ira na lewe vuqa o Jisu, sa cabe cake ki na ulunivanua. Ni sa dabe sobu, e ratou sa qai lako mai ki vua na nona tisaipeli, 2sa qai tekivu vosa o koya, ka vakatavulici iratou, ka kaya:
Na Kalougata Dina
(Luke 6.20-23)
3“Sa kalougata o ira era sa yalo malumalumu,
Ni sa nodra na matanitu vakalomalagi.
4“Sa kalougata o ira era sa dautagi;
Ni ra na vakacegui.#Aisea 61.2
5“Sa kalougata o ira era sa yalomalua;
Ni ra na taukena na vanua.#Same 37.11
6“Sa kalougata o ira era via kania ka via gunuva na ka e dodonu;
Ni ra na vakamamautaki.#Aisea 55.1,2; Sr 24.21
7“Sa kalougata o ira era dauloloma;
Ni ra na lomani.
8“Sa kalougata o ira era sa yalo savasava;
Ni ra na raica na Kalou.#Same 24.3,4
9“Sa kalougata o ira era dau sasagataka na veivinakati,
Ni ra na vakatokai me ra luve ni Kalou.
10“Sa kalougata o ira era vakacacani ena vuku ni ka e dodonu;
Ni sa nodra na matanitu vakalomalagi.#1Pita 3.14
11“Dou sa kalougata ni dou sa vakasewasewani, ka vakacacani, ka vosa vakacacataki vakailasu ena ka kecega e ca ena vukuqu.#1Pita 4.14 12Dou reki ka marau vakalevu, ni sa levu na kemudou i sau mai lomalagi, ni sa vakaoqo na nodra vakacacani na parofita era sa bula e liu vei kemudou.#2Vei 36.16; Caka 7.52
Na Masima kei na Rarama
(Mari 9.50; Luke 14.34-35)
13“Oi kemudou na masima kei vuravura. Ia kevaka sa seavu mai na masima na kena tuituina ena qai vakatuituinataki tale ena cava? Sa na qai sega ni yaga ena dua na ka, me sa biu tani ga, me ra buturaka na tamata.#Mari 9.50; Luke 14.34,35
14“Oi kemudou na rarama kei vuravura. Na koro sa toka e delana ena sega ni tabonaki rawa.#Joni 8.12; 9.5 15E sega talega ni ra dau vakacaudreva oti na cina na tamata, ka ra qai biuta ena ruku ni kato; ia sa biu ga ena kena i tutu, me vakararamataki ira kecega era tiko ena loma ni vale.#Mari 4.21; Luke 8.16; 11.33 16Me cila vakakina na nomudou rarama e matadra na tamata, me ra raica rawa na nomudou cakacaka vinaka, ka vakarokorokotaka na Tamamudou sa tiko mai lomalagi.#1Pita 2.12
Na i Vakavuvuli me baleta na Lawa
17“Dou kakua ni nanuma ni'u sa lako mai me'u taba bokoca na Lawa kei na nodra i vakavuvuli na parofita, au sega ni lako mai me'u taba bokoca, ia me'u vakataucokotaka sara. 18Ni'u sa kaya vakaidina vei kemudou, ena sega sara ni takali rawa mai na Lawa e dua na i toqa se tikina lailai sara ka yacova ni sa takali o lomalagi kei vuravura, ena vakayacori kece mada ga.#Luke 16.17 19O koya oqo, ena vakatokai kina me lailai sara ena matanitu vakalomalagi o koya sa talaidredre ki na dua vei ira na i vakaro lalai oqo ka vakatavulici ira vakakina na tamata. Ia o koya ga ena muria ka vakatavuvulitaka, ena vakatokai me levu ena matanitu vakalomalagi. 20Au sa kaya kina oqo vei kemudou, kevaka sa sega ni uasivi cake na nomudou i valavala dodonu mai na nodra na daunilawa kei na Farisi, dou na sega sara ni curu ki na matanitu vakalomalagi.
Na i Vakavuvuli me Baleta na Cudru
(Luke 12.57-59)
21“Dou sa rogoca ni sa tukuni vakaoqo vei ira na tamata e liu, ‘Mo kakua ni laba; o koya sa laba e dodonu me lewai ena mataveilewai.’#Lako 20.13; Vrua 5.17 22Ia au sa kaya vei kemudou oqo, o koya ga sa cudruva na wekana ena lewai ena mataveilewai; kei koya e vosa beca na wekana ena lewai ena matabose e cake, kei koya sa rulaka na wekana ena lewai ena buka mai eli. 23O koya oqo, kevaka o sa vakarau cabora na nomu i solisoli ena i cabocabonisoro, ka qai nanuma mai kea ni dua na ka e cati iko tiko kina na wekamu, 24mo biuta laivi tu yani na nomu i solisoli me cabori, ka la'ki veivinakati mada e liu kei na wekamu, ka qai lesu tale mo la'ki cabora na nomu i solisoli vua na Kalou.
25“Drau veivinakati vakatotolo kei koya e beitaki iko ni drau sa lako vata tikoga e gaunisala, de na qai soli iko yani o koya e beitaki iko ki vua na turaganilewa, na turaganilewa ki vua na ovisa, ia o na qai biu ki na valeniveivesu. 26Au sa kaya vakaidina vei iko, o na sega ni sereki mai kea me yacova ni o sa sauma vakaoti na i sau ni kemu i totogi.
Na i Vakavuvuli me baleta na Dauyalewa
27“Dou sa rogoca ni a kainaki, ‘Mo kakua ni dauyalewa.’#Lako 20.14; Vrua 5.18 28Ia au sa kaya vei kemudou oqo, o koya ga e rai vua na yalewa ka sa gagano kina, sa dauyalewa kaya oti e lomana. 29Kevaka sa vakacalai iko na matamu i matau, mo leuta tani ka biuta laivi vei iko; ni sa vinaka cake vei iko me yali e dua na tikimu, ia me kakua ga ni biu ki eli na yagomu taucoko.#Maciu 18.9; Mari 9.47 30Ia kevaka sa vakacalai iko na ligamu i matau, muduka tani ka biuta laivi vei iko; ni sa vinaka cake vei iko me yali e dua na tikimu, ia me kakua ga ni biu ki eli na yagomu taucoko.#Maciu 18.8; Mari 9.43
Na i Vakavuvuli me Baleta na Veisere
(Maciu 19.9; Mari 10.11-12; Luke 16.18)
31“Sa tukuni talega, ‘O koya sa biuta tani na watina, e dodonu me solia vua na i vola ni vakadinadina ni veibiu.’#Vrua 24.1-4; Maciu 19.7; Mari 10.4 32Ia au sa kaya vei kemudou oqo, na tagane sa biuta na watina baleta eso tale na vuna ka segai ena vuku ni dautagane, sa baleti koya na cala ni dautagane nei watina kevaka sa la'ki vakawati tale; ka sa coriti talega ena cala ni dauyalewa na tagane e rau sa qai vakawati kaya.#Maciu 19.9; Mari 10.11,12; Luke 16.18; 1Kori 7.10,11
Na i Vakavuvuli me Baleta na Bubului
33“Dou sa rogoca talega ni a kainaki vei ira e liu, ‘Mo kakua ni bubului vakailasu; ia, mo vakayacora sara vua na Turaga na ka o sa bubului kina.’#Vsoro 19.12; Tiko 30.2; Vrua 23.21 34Ia au sa kaya vei kemudou oqo, kakua sara ni bubului; kakua ki lomalagi ni sai tikotiko vakatui ni Kalou,#Jeme 5.12; Aisea 66.1; Maciu 23.22 35kakua ki vuravura ni sai tutu ni yavana, kakua ki Jerusalemi ni sa nona koro na Tui levu.#Aisea 66.1; Same 48.2 36Kakua talega ni bubului ki ulumu ni o sa sega ni vukica rawa e dua na drauna me vulavula, se loaloa. 37Ia me Io na Io ka Sega ga na Sega na nomudou vosa, ia na ka sa kuria oqo sa mai vua na vunica.
Na i Vakavuvuli me Baleta na Veisausaumitaki ni Ca
(Luke 6.29-30)
38“Dou sa rogoca ni sa tukuni vakaoqo, ‘Me i sau ni mata na mata, ka me i sau ni bati na bati.’#Lako 21.24; Vsoro 24.20; Vrua 19.21 39Ia au sa kaya vei kemudou oqo, dou kakua ni vorati koya sa caka ca vei kemudou. Ia, kevaka e dua sa sabica na balumu i matau, vagolea talega vua na kena i karua. 40Ia kevaka e dua sa via veilewaitaki iko, ka taura vakavesu na nomu sote, mo laiva talega yani vua na nomu kote. 41Ia kevaka e dua sa vakasaurarataki iko mo lakova e dua na maile, lakova vata kaya na i karua ni maile. 42Solia vua sa mai kerekere vei iko; ka kakua ni vuki tani mai vua sa via mai dinau vei iko.
Na Nodra Lomani na Meca
(Luke 6.27-28,32-36)
43“Dou sa rogoca ni sa tukuni talega vakaoqo, ‘Mo lomana na kai nomu ka cata na nomu meca.’#Sr 12.4-7 44Ia au sa kaya vei kemudou oqo, dou lomani ira na nomudou meca ka masulaki ira era vakacacani kemudou, 45mo dou luvena kina na Tamamudou mai lomalagi. Ni sa vakacabea o koya na nona matanisiga vei ira na tamata ca kei ira na tamata vinaka, ka vakatauca na uca vei ira na yalododonu kei ira na tawa yalododonu.#Sr 4.10 46Ia kevaka dou sa dau lomani ira ga era dau lomani kemudou, na cava ena kemudou i sau? Era sega li ni dau cakava vakakina na daukumuni i vakacavacava? 47Ia kevaka dou sa vakabula walega vei ira na wekamudou, a cava dou sa cakava me uasivi cake kina mai vei ira na tani? Era sega li ni dau cakava vakakina na veimatanitu tani? 48O koya oqo, mo dou vinaka sara kina me vaka ni sa vinaka sara na Tamamudou vakalomalagi.#Vsoro 19.2; Vrua 18.13

Fijian New Version including Deuterocanonical Books © Bible Society of the South Pacific, 2012.


Learn More About Vakavakadewa Vou kei na iVola tale eso