Joni 12
12
Lumuti o Jisu mai Pecani
(Maciu 26.6-13; Mari 14.3-9)
1Ni sa vo e ono na siga me qaravi kina na solevu ni Lakosivia, sa qai lako o Jisu ki Pecani, ki na vanua ka tiko kina o Lasarusa, na tamata ka sa vakatura cake tale mai na mate o koya. 2Eratou a qai cakava kina e dua na kena i vakayakavi, ka veiqaravi kina o Marica; a sa dabe vata toka kei Jisu ena teveli o Lasarusa. 3Sa qai taura mai o Maria e veimama na lita na waiwai talei sara sa caka mai na narita dina, ka lumuta kina na yava i Jisu, ka quata na yavana ena drauniuluna; a sa curuma na loma ni vale taucoko na i boi kamica ni waiwai.#Luke 7.37,38 4Sa qai kaya o Jutasa Isikarioti, e dua vei iratou na nona tisaipeli, o koya ka a qai bukiveretaki koya e muri, 5“A cava e sega ni volitaki kina na waiwai oqo ena 300 na tiki ni siliva, ka me qai soli na kena i lavo vei ira na dravudravua?” 6E sega ni kaya o ya o koya ena nona nanumi ira na dravudravua, ia sa kaya ga vaka o ya baleta ni sa daubutako o koya. A sa dau taura voli na taga ni lavo o koya, ka dau butakoca na ka e tiko kina.
7Ia sa kaya o Jisu, “Laivi koya ga! Laivi koya me maroroya tikoga na veika sa tiko vua me baleta na siga ka'u na bulu kina. 8Era na dau tiko ga kei kemudou na dravudravua, ia oi au, au na sega ni tikotiko ga kei kemudou.”#Vrua 15.11
Na Bukiveretaki i Lasarusa
9Era a rogoca e lewe vuqa sara na Jiu ni tiko e kea o koya, ka ra sa mani lako sara kina. Era sega ni lako kina ena vuku i Jisu ga, ia me ra bau raici Lasarusa talega, o koya ka a vakatura cake mai na mate o Jisu. 10Era a mani bosea vata kina na bete levu me ra vakamatei Lasarusa talega; 11ka ni ra sa lewe vuqa na Jiu era sa gole tani ena vukuna, ka vakabauti Jisu.
Na Curu Vakatui ki Jerusalemi
(Maciu 21.1-11; Mari 11.1-11; Luke 19.28-40)
12Ena siga ka tarava, era sa qai rogoca e vuqa sara na tamata era sa lako tiko ki na Solevu ni Lakosivia ni sa lako tale tikoga yani ki Jerusalemi o Jisu. 13Era sa qai taura na drau ni niusawa ka la'ki tavaki koya, ka ra kacivaka, “Me vakalagilagi na Kalou! Sa vakalougatataka na Kalou na tamata sa lako mai ena yaca ni Turaga! Sa vakalougatataka na Kalou na nodra Tui na Isireli!”#Same 118.25,26; 1M 13.51
14Sa qai kunea e dua na asa o Jisu ka sa vodoka, me vaka ga sa volai ena i Vola Tabu,
15“Kakua ni rere, o iko na koro o Saioni!
Raica, sa lako mai oqo na nomu tui,
Ka sa vodoka tiko na luve ni asa.”#Saka 9.9
16E ratou a sega ni kila na i balebale ni veika oqo na nona tisaipeli, ia ni sa lesu oti o koya ki na nona i tikotiko lagilagi, e ratou sa qai nanuma ni a sa volai tu na veika oqo me baleti koya, ka sa vakayacori oti talega vua.
17Era a sa mai talanoataka oti o ira na lewe vuqa ka ra a tiko vata kaya ena nona a kacivi Lasarusa mai na i bulubulu, ka vakaturi koya cake tale kina mai na mate. 18O ya na vuna era a la'ki tavaki koya kina na lewe vuqa, baleta ni ra sa rogoca ni a cakava o koya na cakacaka mana o ya. 19Era a qai kaya vakai ira o ira na Farisi, “Dou sa raica, sa sega ni dua na ka eda sa rawata! Raica, era sa gole kecega vua na tamata!”
Era Vakasaqarai Jisu Eso na kai Kirisi
20Era a bau tiko talega ena kedra maliwa na la'ki soro ki Jerusalemi eso na kai Kirisi. 21Era sa qai lako o ira na kai Kirisi vei Filipe (na kai Pecisaita mai Kalili) ka kerei koya, “Keitou mai via raici Jisu saka.”
22Sa qai lako sara o Filipe, ka tukuna vei Adriu. E rau sa qai lako ruarua o Adriu kei Filipe ka la'ki tukuna vei Jisu. 23Sa qai kaya vei rau o Jisu, “Sa qai yaco mai na gauna me vakalagilagi kina na Luve ni Tamata. 24Au sa tukuna vakadodonu sara vei kemudrau, kevaka ena sega ni mate na vua ni sila ni sa lutu ki na qele, ena tiko duadua ga; ia kevaka sa mate, ena vua vakalevu. 25O koya sa lomana na nona bula, ena vakayalia; ia o koya sa cata na nona bula e vuravura oqo, ena maroroya ki na bula tawamudu.#Maciu 10.39; 16.25; Mari 8.35; Luke 9.24; 17.33 26Kevaka sa via qaravi au e dua na tamata, me muri au; ka me na tiko talega o koya ena vanua au sa tiko kina. Kevaka sa qaravi au e dua na tamata, ena vakalagilagi koya o Tamaqu.”
Sa Tukuna Tiko na Nona Mate o Jisu
27“Sa rarawa na lomaqu; ia a cava li me'u na kaya? Me'u na kaya li, ‘I Tamaqu, ni vakabulai au mai na gauna oqo?’ Ia sai koya ga oqo na vu ni noqu lako mai, o ya me mai yaco vei au na rarawa ena tiki ni gauna oqo. 28I Tamaqu, mo ni vakalagilagia na yacamuni!”
Sa qai rogo mai e dua na vosa mai lomalagi, ka kaya, “Au sa vakalagilagia oti, ka'u na vakalagilagia tale.”
29Era a rogoca na vosa o ira na lewe vuqa era tiko e kea. Eso vei ira era a kaya ni domo ni kurukuru; eso tale era a kaya, “E vosa vua e dua na agilosi.”
30Sa qai kaya o Jisu, “E a sega ni lako mai na vosa o ya ena vukuqu, ena vukumuni ga. 31Sa yaco mai oqo na gauna me lewai kina o vuravura, me sa biu laivi kina na tui ni vuravura oqo. 32Ia ni'u sa na laveti cake mai vuravura, au na vakayarayarataki ira mai vei au na tamata kecega.” 33(A sa kaya oqo me vakatakila kina na mataqali i matemate ena mate kina o koya.)
34Era sa qai kaya vua na lewe vuqa, “Keimami sa rogoca mai na Lawa ni na bula ka tawamudu na Mesaia. Ia, o qai kaya ga vakacava ni na laveti cake na Luve ni Tamata? O cei sara mada na ‘Luve ni Tamata’ oqo?”#Same 110.4; Aisea 9.7; Isi 37.25; Tani 7.14
35Sa qai kaya vei ira o Jisu, “Ena tiko vakadede vakalailai ga kei kemuni na rarama. Mo ni lako voli ga ni se tiko na rarama, me kakua kina ni yacovi kemuni na butobuto. 36Ni se tiko ena kemuni maliwa na rarama, mo ni vakabauta sara na rarama, ka mo ni yaco kina mo ni tamata ni rarama.”
Nodra Tawa Vakabauta na Jiu
Ni sa cavuta oti na veika oqo o Jisu, sa qai lako sara ka vunitaki koya mai vei ira. 37E dina ga ni a vakayacora e matadra o koya e vuqa na cakacaka mana, ia era a sega ga ni vakabauti koya. 38Sa vakayacori sara kina na vosa i Aisea na parofita, ni sa kaya,
“Turaga, o cei sa vakabauta na neitou i tukutuku?
Ka sa vakatakila na Turaga kivei cei na nona kaukauwa?”#Aisea 53.1 (LXX)
39A ka oqo era sa sega kina ni vakabauta rawa, baleta ni sa kaya talega o Aisea:
40“Sa vakamatabokotaka na matadra na Kalou
Ka sa sogota na nodra vakasama,
Me kakua kina ni rai na matadra,
Ka sega ni kila rawa na lomadra,
Ka ra na sega ni saumaki mai vei au, sa kaya na Kalou,
Me'u vakabulai ira oi au.”#Aisea 6.10 (LXX)
41Sa kaya na veika oqo o Aisea baleta ni sa raica na lagilagi i Jisu ka tukuna na veika me baleti koya.
42Ia sa bau lewe levu talega vei ira na nodra i liuliu na Jiu era sa vakabauti koya; ia ena vukudra ga na Farisi, era a sega kina ni vakaraitaka ena matadra na lewe levu, de ra na qai vakasivoi mai na nodra valenilotu. 43Era sa vinakata vakalevu cake ga na veivakadonui ni tamata mai na nona veivakadonui na Kalou.
Na Veilewai mai na Vosa i Jisu
44Sa qai kaci o Jisu, ka kaya, “O koya sa vakabauti au, sa sega ni vakabauti au ga, sa vakabauti koya talega ka talai au mai. 45O koya talega sa raici au, sa raici koya ka talai au mai. 46Au sa lako mai ki vuravura me'u mai kena rarama, me kakua kina ni tiko ena butobuto o koya yadua sa vakabauti au. 47Ia kevaka sa rogoca na noqu vosa e dua na tamata ka sega ni vakabauta, au na sega ni cudruvi koya, ni'u a sega ni lako mai me'u vakarusai vuravura, ia me'u vakabulai vuravura ga. 48O koya e sega ni vinakati au ka sega ni vakabauta na noqu vosa, sa tiko e dua me na lewai koya; na vosa ga au sa tauca oti ena qai veilewaitaki koya ena i otioti ni siga. 49Ni'u sega ni dau vosa vakataki au ga, ia o Tamaqu ga ka talai au mai sa vakarota vei au na ka me'u kaya ka vosataka. 50Ka'u sa kila ni sa kauta mai na bula tawamudu na nona i vakaro. Na veivosa kece sara ka'u sa tukuna sa cavuti me vaka na ka sa vakarota vei au o Tamaqu.”
Currently Selected:
Joni 12: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.