Udite 1
1
Nodrau vala o Nepukanesa kei Afakisate
1Sa ikatinikarua ni yabaki ni veiliutaki nei Nepukanesa na Tui Asiria e na koro levu o Ninive. A Tui Mitia tiko kina e Ekipatana o Afakisate, 2o koya na tui asa viria na bai kei Ekevatana e na vatu ceuti tolu na kiupiti kena vavaku, ono na kiupiti kena balavu; na bai vitusagavulu na kiupiti kena cere, limasagavulu na kiupiti kena raba; 3asa viria e na matamata na valeniyadra e dua na drau na kiupiti kena cere, onosagavulu na kiupiti na raba ni vuna; 4na kena matamata e vitusagavulu na kiupiti kena cere, vasagavulu na kena raba, me rawa nira curu vakalewelevu mai kina na nona mataivalu, taisautaki koya mai na mataivalu taubale. 5Qori na gauna a valuti Tui Afakisate kina o Tui Napukanesa e na buca levu e na iyalayala kei Rakai. 6Era tovata kei koya na kaicolo kece kei ira na vakaitikotiko e na bati ni Iuferetisi, na Taikirisi, kei na Aitasipesi, kei ira na lewe ni bucabuca era vakarorogo vei Arioki nodra tui na kai Elimaisi. E levu na matanitu era tovata kei ira na kai Kalidia.
7Sa qai tala mata o Nepukanesa na Tui Asiria vei ira kece na kai Peresia, na kai Ra, na kai Silisia, Tamasiko, Lepanoni, Adilepanoni kei ira kece na kai baravi, 8o ira na kai Karamelo, Kiliati, Kaleli e cake, kei na buca levu o Esidrailoni, 9o ira kece na kai Samaria kei na veikoro volekata e taudaku ni Joretani, yaco sara i Jerusalemi kei Pecani, o Jelousi, Katesi, kei na wailevu o Ijipita, o Tapanesi kei Ramisesi, kei na vanua taucoko o Qoseni, 10e taudaku sara kei Tanisi, o Memifiri kei ira kece na kai Ijipita me yacova sara na iyalayala kei Eciopea. 11Ia o ira kece na lewenivanua qo era sega ni kauaitaka na ivakaro nei Nepukanesa na Tui Asiria, ra bese ni tovaki koya e na ivalu, era douvaki koya; era beci koya, ra mani vakasukai ira lala na nona italai e na madua levu.
12Na levu ni nona katakatataki ira na veivanua ya o Nepukanesa, sa mani bubuluitaka e na nona idabedabe vakatui kei na nona matanitu ni na sauma vei ira na vanua kece o Silisia, Tamasiko kei Siria, ni na ravuti ira e na iselewau na lewe i Moapi, na kawa i Amoni, o ira kece na kai Jutia kei ira na lewe i Ijipita – o ira kece mai na Wasa i Loma me yaco i na Toba o Peresia.
13E na ikatinikavitu ni yabaki, a liutaki ira yani kina na nona mataivalu, ravuti Tui Afakisate, vakadruka na nona mataivalu taucoko, nona mataivalu vodo ose kei na mataivalu vodo qiqi. 14Sa mani kovea na nona koro kece, yaco i Ekevatana, botea na kena valeniyadra, yanaraka na kena veimakete, vakaqeyavutaka na koro lagilagi ya. 15A vesuki Afakisate e na colo kei Rakai, cokacokai koya e na moto, mani mate vakadua kina e na siga ya. 16Sa qai yauta na itokinivalu, qai lesu vata mai kei na nona mataivalu, na mataivalu vakaitamera duikaikai; era mai vakacegu kina bogi dua na drau ruasagavulu e na kana magiti kei na marau.
Currently Selected:
Udite 1: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.