YouVersion Logo
Search Icon

Esera 1

1
Vakarota o Sairusi me Ra Vakasukai mai na Veivakabobulataki na Jiu
1Ena i matai ni yabaki ni veiliutaki nei Sairusi na tui Perisia, a sa vakayacora kina o Jiova na veika sa vosa oti kina vei Jeremaia na parofita. A sa vakauqeti Sairusi me kacivaka na i vakaro oqo, ka me vola ka kauta wavoki me wiliki vakadomoilevu ena veivanua kece sara ena nona matanitu:#Jere 25.11; 29.10
2“Oqo na i vakaro veikauyaki i Sairusi na Tui Perisia: Sa solia oti vei au o Jiova, na Kalou ni lomalagi, me'u lewa na veimatanitu kecega e vuravura, ka sa vakacolata vei au na i tavi me'u tara e dua na valenisoro me nona mai Jerusalemi e Juta.#Aisea 44.28 3Me tiko vata kei kemuni na Kalou, vei kemuni kece o ni sa nona tamata. Mo ni lako ki Jerusalemi ka tara vou tale na Valenisoro i Jiova, na Kalou ni Isireli, na Kalou sa dau qaravi mai Jerusalemi. 4Kevaka eso vei ira na nona tamata era se tu vakavesu ka gadreva na veivuke me baleta na i lakolako lesu, ia me ra qai solia na veivuke oqo o ira na tamata era tiko veivolekati. Me ra solia vei ira na siliva, kei na koula, kei na i yau, kei na manumanu me ra dreke i yaya, ka vakakina na i solisoli loloma me la'ki cabo ki na Valenisoro ni Kalou mai Jerusalemi.”
5Era sa qai vakarau o ira na turaga ni mataqali vei ira na Juta vata na Penijamini, kei ira na bete vata na Livai, kei ira kecega sa vakauqeta na lomadra na Kalou me ra lako cake ki Jerusalemi ka tara vou tale na Valenisoro i Jiova. 6Era sa ia na veivukei o ira era tiko veivolekati ena nodra solia e levu na ka: na i yaya siliva kei na koula, kei na i yau, kei na manumanu, kei na i yau talei, kei na i solisoli loloma ki na Valenisoro.
7A sa solia lesu tale o Sairusi vei ira na bilo kei na beseni eso ka taura mai o Nepukanesa na tui mai na Valenisoro e Jerusalemi, ka sa la'ki biuti ira tu ena loma ni bure ni nodra veikalou. 8A qai solia o koya na i yaya kece oqo vei Mitiretaci, o koya ka dauqarava na i yau vakatui, ka sa wilika na kedra levu ka vakaivolataka me soli vei Sesipasa na kovana ni Juta. 9Sa vakaoqo na kedra i wiliwili: e 30 na beseni koula ni vakacaboisoro, e 1,000 na beseni siliva ni vakacaboisoro, e 29 na veimataqali beseni tale eso, 10e 30 na bilo koula lalai, e 410 na bilo siliva lalai, kei na 1,000 na i yaya tale eso.
11A kena i wiliwili kece e 5,400 na i yaya koula kei na i yaya siliva, vata kei na i yaya tale eso, ka sa kauta voli yani o Sesipasa ena gauna sa biuti Papiloni kina me lesu tale ki Jerusalemi vata kei ira na vo ni bobula.

Currently Selected:

Esera 1: FNVDC12

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy