Joni 20
20
Na i Bulubulu Lala
(Maciu 28.1-8; Mari 16.1-8; Luke 24.1-12)
1Ena mataka caca ena i matai ni siga ni macawa, ni sa butobuto tu ga na vanua, sa lako ki na i bulubulu o Maria na yalewa ni Makitala, ka raica ni sa kau tani tu na vatu mai na i bulubulu. 2Sa mani cici sara ka lako vei rau o Saimoni Pita kei na tisaipeli kadua, o koya ka dau lomana o Jisu, ka kaya vei rau, “Era sa kauta tani na Turaga mai na i bulubulu, ia keitou sa sega ni kila na vanua era sa la'ki vakotori koya kina!”
3E rau sa qai lako o Pita kei na tisaipeli kadua, ka rau lako sara ki na i bulubulu. 4E rau a cici ruarua vata kina, ka mani sivi Pita na tisaipeli kadua, ka liu sara ki na i bulubulu. 5E a cuva sobu o koya ka rai ki loma, ka raica na i sole lineni ni koto kina; ia sa sega ga ni curu ki loma. 6Sa qai yaco talega yani o Pita, ka curu sara ki na i bulubulu, ka raica na i sole lineni ni tu e kea, 7kei na i tavoi ka a viviraki ena ulu i Jisu. E sega ni koto vata kei na i sole lineni, ia sa lobi tani koto ga vaka i koya ena dua na vanua. 8Sa qai curu talega na tisaipeli kadua, o koya ka a liu ki na i bulubulu, ka a raica talega, ka vakabauta. 9E rau a sa sega tikoga oqo ni kila na i Vola Tabu ni kaya tiko ni sa dodonu me tu cake tale mai na mate o koya. 10Oti o ya e rau sa qai lesu tale na tisaipeli ki na nodrau i tikotiko.
Na Rairai nei Jisu vei Maria na Yalewa ni Makitala
(Maciu 28.9-10; Mari 16.9-11)
11E a mani tu voli ga o Maria ena taudaku ni bulubulu, ka tagi tiko. Ia ni sa tagi tikoga, a mani cuva sobu ka rai ki loma ni bulubulu; 12ka qai raica e lewe rua na agilosi e rau vaka i sulu vulavula ka rau dabe toka ena vanua ka a koto kina na yago i Jisu, e dua ki uluna ka dua ki yavana. 13E rau sa qai kaya mai vua, “Yalewa, a cava o tagicaka tiko?”
Sa kaya vei rau o koya, “Ni ra sa kauta tani na noqu Turaga, ka'u sega ni kila se ra vakotori koya evei.”
14Ni sa vosa oti vaka o ya, sa qai vuki ka raici Jisu ni sa tu e kea, ka sega ga ni kila ni sai Jisu o ya. 15Sa qai kaya vua o Jisu, “Yalewa, a cava o tagicaka tiko? O vakasaqarai cei?”
A nanuma ga o koya ni o ya na dauveiqaravi ni teitei, a sa mani kaya kina vua, “Kevaka o ni sa kauti koya tani, ni tukuna saka vei au na vanua o ni sa vakotori koya kina, me'u na la'ki kauti koya.”
16Sa qai kaya vua o Jisu, “I Maria!”
A sa vuki sara o koya ka kaya vua ena vosavakaiperiu, “Raponai!” (E kena i balebale “Vakavuvuli”.)
17Sa qai kaya vua o Jisu, “Kakua mada ni tarai au, baleta ni'u se bera ni lako cake vei Tamaqu. Ia mo lako ga vei iratou na taciqu, ka tukuna vei iratou ni'u sa lesu tiko vua sa Tamaqu ka sa Tamadratou, vei koya sa noqu Kalou ka sa nodratou Kalou.”
18Sa qai lako o Maria na yalewa ni Makitala ka kaya vei iratou na tisaipeli ni sa raica na Turaga, ka tukuna tale vei iratou na veika sa tukuna vua o Jisu.
Na Rairai nei Jisu vei Iratou na Nona i Tisaipeli
(Maciu 28.16-20; Mari 16.14-18; Luke 24.36-49)
19Ena yakavi ni siga o ya, na i matai ni siga ni macawa, a sa sogo tu ga na katuba ni vale e ratou a tiko kina na tisaipeli baleta ni ratou sa rerevaki ira na Jiu. Sa qai lako yani o Jisu ka la'ki tu ena kedratou maliwa, ka kaya vei iratou, “Me nomudou na vakacegu!” 20Ni sa tukuna oti oqo, sa qai vakaraitaka vei iratou na ligana kei na sarisarina. E ratou sa marau na tisaipeli ni ratou raica na Turaga. 21Sa qai kaya tale vei iratou o Jisu, “Me tiko vei kemudou na vakacegu. Ia me vaka sa talai au mai o Tamaqu, au sa talai kemudou talega vakakina.” 22Ni sa vosa oti vaka o ya, a sa qai ceguvi iratou, ka kaya vei iratou, “Dou ciqoma na Yalo Tabu. 23Kevaka dou sa vosota na nodra i valavala ca na tamata, era na vosoti; kevaka dou sa sega ni vosoti ira, era sa sega ga ni vosoti.”#Maciu 16.19; 18.18
O Jisu kei Tomasi
24E dua vei iratou na lewe tinikarua ka yacana o Tomasi (sa vakatokai talega o koya na Drua), a sa sega ni tiko vata kei iratou ena gauna sa lako yani kina o Jisu. 25E ratou a mani kaya vua o iratou na vo ni tisaipeli, “Keitou sa raica na Turaga.”
Ia sa qai kaya vei iratou o Tomasi, “Kevaka au na sega ni raica na we ni vako ena ligana, ka daramaka na noqu i qaqalo ki na we ni vako, ka daramaka na ligaqu ki na sarisarina, au na sega ni vakadinata.”
26Ni oti e walu tale na siga, e ratou a tiko tale e loma ni vale na tisaipeli, ka sa tiko vata kina kei iratou o Tomasi. Sa qai lako yani o Jisu, ni a sogo tu ga na katuba, ka la'ki tu ena kedratou maliwa, ka kaya, “Me tiko vei kemudou na vakacegu.” 27Sa qai kaya vei Tomasi, “Dodoka mai na nomu i qaqalo, ka raica na ligaqu; mo qai dodoka mai na ligamu ka daramaka ki na sarisariqu. Sa rauta na vakatitiqa, mo vakabauta ga!”
28A sa sauma o Tomasi ka kaya, “Noqu Turaga, ka noqu Kalou!”
29Sa qai kaya vua o Jisu, “O sa vakabauti au li baleta ni o sa raici au? Sa kalougata o ira era sa vakadinata ga ia era sa sega ga ni raici au.”
Na i Naki ni Vola oqo
30A sa vuqa tale na veicakacaka mana sa cakava o Jisu ena matadratou na nona tisaipeli, ka ra sa sega ni volai ena i vola oqo. 31Ia era sa volai ga na veika oqo mo dou vakabauta kina ni sai Jisu na Mesaia, na Luve ni Kalou, ka mo ni rawata kina na bula ena yacana ena vuku ni vakabauta.
Currently Selected:
Joni 20: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.