Apocalípsis 1
1
Libru qalaykunan
1Kay libruchömi qelqaraykan Jesucristuta Tayta Dios revelashqan. Jesucristumi angilninta kachamur say revelacionta sirviqnin Juanta revelarqan. Sayno revelarmi sirviqninkunata imapis päsananpaqna kaqkunata tantiyasirqan. 2Juannami say revelacionta qelqar Tayta Dios nishqankunata, Jesucristo nishqankunata y lapan rikashqankunata qelqash.
3Kushishqami kayanqa kay qelqaraykaqkunata liyiqkuna y liyipashqanta wiyar cäsukuqkunaqa. Kay qelqaraykaqkuna cumplikänanpaqnami kaykan.
Qanchis iglesiakunacho shuntakaykaq wawqi panikunata winchikushqan
4Asia provinciacho kaykaq qanchis iglesiakunacho shuntakaq wawqi panikuna:
Noqa Juanmi qamkunaman qelqaykämü. Unaypita kawaq, kananpis kaykaq y shamunanpaq kaykaq Tayta Dios y trönunpa nawpancho kaykaq qanchis espïritukunapis#1.4 Qanchis espïritukunaqa qanchis angilkuna kashqanpis o Espíritu Santu kashqanpis manami musyakansu. kuyapäyäshushpayki ali kawayänaykipaq yanapaykuyäläshunki.#Apoc. 4.5.
5Jesucristupis ali kawayänaykipaq qamkunata yanapaykuyäläshunki. Paymi Tayta Dios munashqannöla wilakuyninta wilakush y wanushkunapita puntata kawarimush.#Hech. 26.23; Col. 1.18. Kay pasacho lapan reykunapitapis mas munayyuqmi kaykan.#Sal. 89.27. Paymi kuyamashpansi yawarninta jichar lapan jusansita maylamashkansi.
6Mandamaqninsi rey kashpanmi makincho kanansipaq shuntamashkansi. Saynöpis Papänin Tayta Diosta sirviq cürakuna kanansipaqmi churamashkansi.#Éxo. 19.6; Isa. 61.6; 1Ped. 2.5, 9; Apoc. 5.10; 20.6. ¡Jesucristo imaypis alabash kaykuläsun! ¡Pay japalan mandamaqninsi kaykuläsun! Amén.
7¡Pukutay jananchömi Jesucristo kutimunqa!#Dan. 7.13; Mat. 24.30; Mar. 13.26; Luc. 21.27; 1Tes. 4.17.
Kutimuqtami lapan runakuna rikayanqa.
Payta tuksir wanusiqkunapis rikayanqami.#Zac. 12.10; Juan 19.34, 37.
Kutimuqta rikarmi maysaychöpis runakuna waqayanqa.
Saynömi kanqa. Amén.
8Unaypita kawaq, kananpis kaykaq y shamunanpaq kaykaq munayyuq Tayta Diosmi nin: <<Alfa y Omegami noqa kaykä.#1.8 Alfa nishqanqa griego alfabëtucho punta kaq letrami kaykan. Omega nishqanqa ultimu kaq letrami kaykan. Saymi Alfa y Omegami noqa kaykä nishqanqa qalaykunan y ushananmi kaykä ninan. [Qalaykunan y ushananmi kaykä]>>.#Isa. 41.4; 44.6; Apoc. 1.17; 22.13.
Jesucristuta Juan rikashqan
9Noqaqa Jesucristuman yärakuq mayiki Juanmi kaykä. Qamkunanölami Jesucristo mandaykashqancho kaykä. Nakasiyäshushqaykinölami noqatapis Jesucristuman yärakushqäpita nakasiyäman. Qamkunanölami mana ajayaypa shuyakuykä paypa nawpanman chänäpaq. Tayta Diospa wilakuyninta wilakushqäpita y Jesucristo salvamaqninsi kashqanta wilakushqäpitami Patmos islacho prësu kaykä.
10Saycho kaykarmi domingu junaq Espíritu Santupa munaynincho kashpä wiyarqä cornëta tukamuqnöraq qepächo kayno nimuqta: 11<<[Alfa y Omegami noqa kaykä. Qalaykunan y ushananmi kaykä.] Revelacioncho rikasishqäkunata juk rölluman qelqarkur apasiy [Asia provincia] qanchis markakunacho kaykaq iglesiakunaman. Say markakuna kaykäyan Éfeso, Esmirna, Pérgamo, Tiatira, Sardis, Filadelfia y Laodiceami>>.
12Qepächo sayno parlamuqta wiyarmi tikrarqä pï kashqantapis rikanäpaq. Saychömi rikarqä qoripita rurash qanchis candelabrukuna sariraykäyaqta.#Éxo. 27.21; Lev. 24.1-4; Zac. 4.10. 13Say candelabrukuna chawpinchömi rikarqä runapa surin niraq kaykaqta.#Dan. 7.13. Paymi chaki puntanyaq mödanan jatish kaykarqan. Qasqunpami#1.13 Wakin runakunaqa pëchunpami niyan. qoripita rurash wachkuwan wataraykarqan.#Dan. 10.5. 14Aqsanpis yuraq milwano y rashtano yuraqmi karqan.#Dan. 7.9. Nawinnami ninanöraq asikyarqan. 15Chakinkunapis waylash broncinöraqmi chipipirqan.#Dan. 10.6. Parlashqanpis aska yaku aywar qaparaqnöraqmi karuman wiyakarqan.#Eze. 1.24; 43.2. 16Aluq kaq makinchömi qanchis qoyllarkunata sarararqan. Shiminpitanami ishkan lädunpa afilash espäda yarqamurqan. Qaqlanpis intinöraqmi chipipirqan.
17Payta rikaykurmi puntanman wanushno ishkiskirqä. Saymi aluq kaq makinwan yataykamar nimarqan: <<Ama mansamaysu. Noqami qalaykunan y ushanan kaykä.#Isa. 41.4; 44.6-8; 48.12; Apoc. 1.8; 2.8; 22.13. 18Imayyaqpis kawaqmi kaykä. Imayyaqpis kawanäpaqmi wanusiyämashqanpita kawarimushkä. [Amén.] Noqami sararaykä wanushkunapa almankuna kaykäyashqan llävita.#1.18 Wanushkunapa almankuna kaykäyashqan llävita sararaykashqanta nirmi Jesucristo tantiyasirqan wanushkunata kawarisimunanpaq munayyuq kashqanta. 19Lapan rikashqaykita qelqay. Kanan päsaykashqanta y päsananpaq kaqkunatapis lapanta qelqay.
20<<Kananmi tantiyasishayki aluq kaq makïcho rikashqayki qanchis qoyllarkuna y qoripita qanchis candelabrukuna ima kashqantapis. Qanchis qoyllarkuna kaykäyan say qanchis iglesiakunapa angilninkunami. [Rikashqayki] qanchis candelabrukuna kaykäyan say qanchis markakunacho kaykaq iglesiakunami>>.
Currently Selected:
Apocalípsis 1: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.