Lucas 1
1
1Tayta Teófilo, Jesucristo kay pasacho imata rurashqantapis aska runakunami qelqayash. 2Jesucristuwan qalaykushqanpita pasa puriqkuna wilakuyashqannölami qelqayash. Paywan puriqkuna imata rurashqantapis rikash kayaptinmi wilakuyänanpaq Jesucristo kacharqan. 3Saymi noqapis qalaykushqanpita pasa imano kashqantapis shumaq tapukuykur qampaq lapanta qelqaykämü. 4Kayta liyirmi Jesucristupaq wilapäyäshushqayki rasunpa kashqanta tantiyanki.
Bautizaq Juan yurinanpaq kashqanta ángel wilakushqan
5Judeacho Herodes rey kaykashqan wisanmi juk cüra karqan Zacarías jutiyuq. Payqa Abías cürapita miraq kashpanmi say ayllu cürakunawan Tayta Diosta templucho sirviyarqan.
Zacaríaspa warminpa jutinmi karqan Elisabet#1.5 Wakin traduccionkunachöqa Isabel niyanmi.. Paypis cüra Aarónpita miraqmi karqan.
6Paykunaqa Tayta Dios munashqanno kawarmi mandamientunkunata y leyninkunata imaypis cumpliyaq. 7Elisabet qoluq kaptinmi wawan karqansu. Paykuna ishkanpis chachanami kayarqan.
8Juk kutimi Zacaríaspa y paywan aruq cüra mayinkunapa turnun charqan templucho Tayta Diosta sirviyänanpaq. 9Costumbrinkuna kashqanno cürakuna suertita jitayaptinmi Zacaríasta töcarqan templuman yaykur inciensuwan qoshnisinanpaq.#Éxo. 30.7-9. 10Templucho inciensuwan qoshnisishqanyaqmi waqtacho runakuna Tayta Diosta manakuykäyarqan.
11Inciensuwan qoshniykäsiptinmi altarpa aluq kaq nawpancho Tayta Diospa angilnin Zacaríasta yuriparqan. 12Angilta rikaykurmi Zacarías fiyupa mansakar ima ruraytapis kamäpakurqansu.
13Saymi ángel nirqan: <<Zacarías, ama mansariysu. Manakushqaykita Tayta Dios wiyashushkankimi. Saymi olqu wamrata warmiki Elisabet qeshyakunqa. Paypa jutintami churapanki Juan kananpaq. 14Suriki yuriykuptinmi fiyupa kushikunkipaq. Saynölami wakinpis fiyupa kushikuyanqa.
15<<Tayta Dios munashqannömi suriki kawanqa. Manami vïnuta ni ima shinkäsikuqkunatapis upunqasu.#Núm. 6.1-3. Mamanpa pachancho kashqanpita pasami Espíritu Santupa munaynincho kanqa. 16Tayta Diospa wilakuyninta wilakuptinmi Israel runakuna jusalikuyta kacharir Tayta Dios munashqanno kawayanqa. 17Tayta Diospa munayninwan profëta Elías wilakushqannömi paypis wilakunqa.#1.17 Jesucristo manaraq shamuptin profëta Elíasta Tayta Dios kachamunanpaq kashqanta runakuna shuyakuyarqan (Mal. 4.5-6). Elíaspita masta musyanaykipaq liyinki 1Rey. 17.1—19.21; 2Rey. 2.1-18. Wilakuptinmi warmikunapis wawankunawan y runakunapis surinkunawan kuyanakuyanqa. Mana cäsukuqkunatapis Tayta Dios munashqannöna kawayänanpaqmi yäsinqa. Saynömi runakunata yachasinqa Tayta Dios kachamushqan Cristo shamuptin chaskikuyänanpaq>>.
18Ángel sayno niptinmi Zacarías tapurqan: <<¿Imanöpataq musyäman nimashqaykino kananpaq kashqanta? Noqaqa awkinnami kä. Warmïpis chakwannami>>.
19Saymi ángel nirqan: <<Noqaqa Tayta Diospa nawpancho sirviqnin Gabrielmi kaykä. Paymi kachamash kay ali wilakuyta qamta wilanäpaq. 20Kay wilashqäkuna lapanpis cumplikanqami. Nishqäkunata mana criyishqaykipitami kanan suriki yurishqanyaq shimiki watpash kanki>>.
21Sayyaqmi waqtacho kaykaqkuna shuyarar niyarqan: <<¿Imanirraq kay hörayaq Zacarías yarqamunsu?>>
22Templupita yarqaskamurnami shimin watpash kaptin shuyaraykaqkunata sëñaylapana parlaparqan. Saymi tantiyakuyarqan templu rurincho imapis yuripashqanta.
23Templucho turnunta cumpliskirnami wayinpana Zacarías kutikurqan. 24Saypitanami warmin Elisabet qeshyaq rikakur pisqa killantin wayinpita mana yarquypa täkurqan. Saymi nirqan: 25<<Ima alishi Tayta Dios kuyapämash wawata tarinäpaq. Kananpitaqa mananami pipis jamurpämanqanasu wawaynaq kashqäpita>>.
Jesús yurinanpaq ángel wilakushqan
26Elisabet qeshyaq rikakushqanpita soqta killatanami ángel Gabrielta Tayta Dios kachamurqan Galileacho Nazaret markaman. 27Saychömi virgen María tarqan. Paymi unay rey Davidpa ayllun Joséwan tänanpaq awnishna kaykarqan. 28Chaykurmi ángel nirqan: <<¡Kushikuy, María! ¡Tayta Diosmi akrashushkanki! Payqa qamwanmi kaykan. [Wakin warmikunapita masmi qamta Tayta Dios kuyashunki]>>.
29Sayno niptinmi María mansakash yarpachakur nirqan: <<¿Imanirtaq sayno niman?>>
30Saymi ángel nirqan: <<María, ama mansariysu. Tayta Diosmi kuyashushpayki akrashushkanki. 31Kananpitami qeshyaq rikakunki. Wamrayki yuriptinmi jutinta churanki Jesús jutin kananpaq. 32Seqaypa munayyuq kaptinmi Tayta Diospa Surin kashqanta niyanqa. Unay ayllun Davidno rey kananpaqmi Tayta Dios churanqa. 33Paymi Jacobpita miraq runakunata imayyaqpis mandanqa. Pay mandaykashqanqa imaypis manami ushakanqasu>>.
34Niptinmi María tapurqan: <<Runata manaraq reqiykarqa ¿imanöpataq qeshyaq rikaküman?>>
35Saymi ángel nirqan: <<Espíritu Santu qamman shamuptinmi Tayta Diospa munayninwan qeshyaq rikakunki. Saymi santu wawayki yuriptin Diospa Surin kashqanta niyanqa.
36<<Aylluyki Elisabetpis chakwanna kaykarmi qeshyaq kaykan. Pay qoluq warmi kashqanta nikäyaptinpis soqta killanami qeshyaq kaykan. 37Tayta Diospaqqa manami imapis ajasu>>.
38Saymi María nirqan: <<Noqaqa Tayta Diospa makinchömi kaykä. Nimashqaykino kaykuläsun>>.
Niskirnami ángel aywakurqan.
Elisabetta María watukashqan
39Ángel nishqanpita warayninkunanami Judea provinciapa jalqankunacho kaykaq juk markaman warakayla María aywarqan. 40Chaykurnami Zacaríaspa wayinman yaykuskir Elisabetta winchikurqan. 41Winchikuptinmi Elisabetpa pachancho wamrapis kuyurqan. Elisabetnami Espíritu Santupa munayninwan 42sinchipa nirqan: <<¡Lapan warmikunapitapis masmi qamta Tayta Dios bendicionninta qoshushkanki! ¡Qeshyaq kaykashqayki wawaykitapis bendicionnintami qosh! 43¿Pitaq noqa kä Señornïpa maman kaykar watukaykamänaykipaq? 44Winchikamashqaykita wiyaykurmi pachächo wawäpis kushikuypita kuyush. 45¡Tayta Dios nishushqaykita cumplinanpaq kashqanta criyishqaykipitami kushish kaykanki!>>
Tayta Diosta María alabashqan
46Saymi María nirqan:
<<Lapan shonqüwanmi Tayta Diosta alabä.
47Kushikuypitami salvamaqnï Tayta Diosta alabä.
48Mana cuentash japuy kaykaptïpis kuyapämarmi akramash.
Kananpitaqa imaypis runakuna niyämanqa Tayta Dios bendicionninta noqaman churamushqantami.
49Munayyuq Tayta Dios alimi rikamash.
Payqa santumi kaykan.
50Payta mansapakuqkunataqa imaypis kuyapanmi.
51Pipis mana rurashqankunatami pay ruran.
Yachaq tukuqkunapa yarpayninkunatapis manakaqmanmi churan.
52Nación mandaqkunatapis mandaq kayashqanpitami qarqun.
Qollmi shonquyuq runakunatanami mandaq kayänanpaq churan.
53Muchuqkunataqa nistashqankunata kamaripanmi.
Rïcukunatanami isanqa muchuqyäsin.
54Sirviqnin Israel runakunata kuyapashpanmi imaypis mana qonqaypa yanapan.
55Imayyaqpis sayno yanapämänansipaqmi unay ayllunsi Abrahamta y paypita miraqkunata promitirqan>>.#Gén. 12.1-3; 22.16-18.
56Elisabet kaqcho kimsa killano tarkurnami wayinpana María kutikurqan.
Bautizaq Juan yurishqan
57Elisabetpa killan tinkuskiptinnami olqu wamrata qeshyakurqan. 58Sayta musyaykurmi ayllunkuna y reqinakushqankuna Elisabetman chaykur kushish niyarqan: <<¡Tayta Diosmi kuyapäshushpayki yanapäshushkanki wawayuq kanaykipaq!>>
59Puwaq junaqyuq wamran kaykaptinnami Zacaríaspa wayinman aywayarqan wamranta señalayänanpaq.#Gén. 17.10-12; Lev. 12.3. Saychömi taytan Zacaríaspa jutilanta jutisiyta munayarqan. 60Saymi maman nirqan: <<¡Manami saysu jutin kanqa, sinöqa Juanmi!>>
61Saymi niyarqan: <<Aylluykikuna say jutiyuq mana kaykaptin ¿imanirtaq Juan jutin kananta munaykanki?>>
62Saymi ima jutita churayänanpaqpis sëñaypa Zacaríasta tapuyarqan. 63Tapuyaptinmi takshala tablata manakurir sayman qelqarqan: <<Juanmi jutin kanqa>> nir. Sayta liyirmi lapanpis äyakash rikakuyarqan. 64Say höra shimin pashtarkuptinmi Tayta Diosta Zacarías alabarqan.
65Saykunata rikaykurmi lapan reqinakuyashqankuna espantash rikakuyarqan. Saykuna päsashqantami intëru Judea jalqacho pïmaypis parlayarqan. 66Say wamrata Tayta Dios yanapashqanta parlayaptinmi wiyaqkuna yarpachakur niyarqan: <<Say wamra winarkur ¡imajinanpa munayyuqraq kaykunqa!>>
Tayta Diosta Zacarías alabashqan
67Espíritu Santupa munayninwanmi Zacarías nirqan:
68<<Israel runakunata kuyaq Tayta Dios alabash kaykuläsun.
Salvamänansipaqmi pay shamush.
69Sirviqnin Davidpa ayllunpita munayyuq salvamaqninsi yurinanpaqnami kaykan.
70Sayno yurinanpaqmi unaypita pasa santu profëtakunawan wilakasirqan.
71Contransikunapa makinpita y chikimaqninsikunapa munayninpita jorqamänansipaqmi musyasimarqansi.
72<<Unay ayllunsikunata kuyaparmi sagrädu pactuta cumplinqa.
73Jurashpanmi unay ayllunsi Abrahamta promitirqan
74chikimaqninsikunapa makinpita jorqamänansipaq kashqanta
y mana mansariypa paylatana sirvinansipaq kashqanta.
75Sayno kaykaptinqa mana jusalikuypa pay munashqanno waran waran kawashun>>.
76Wamrantanami Zacarías nirqan:
<<Kuyay surilä, salvamaqninsi shamuptin chaskikuyänanpaqmi nänita kichaq japuy runakunata wilanki.
Saymi munayyuq Tayta Diospa profëtan kashqaykita niyanqa.
77Tayta Dios kuyashqan runakunata perdonar salvananpaq kashqantami wilanki.
78Tayta Diosninsi kuyapämashpansi jana pasapita juk salvadorta kachamunqa.
Sayqa pasa waraqnömi kushikuypaq kanqa.
79Aksino karmi sakäpakushno kawaqkunata y wanuyta mansaqkunata salvanqa.
Paymi tantiyasimäshun jawkala kawanansipaq>>.
80Zacaríaspa surinqa Tayta Dios munashqanno kawananpaq winaylatami shumaq tantiyakurqan. Tayta Diospa wilakuyninta Israel mayinkunata wilapar qalaykushqanyaqmi sunyaq jirkakunalacho tarqan.
Currently Selected:
Lucas 1: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.