Romanos 11
11
Wakin Israel runakunala salvakuyashqan
1Israel runakunata ¿Tayta Dios kachariykushsuraq? ¡Manami! Noqapis Abraham ayllu kar Benjamín trïbupita Israel runami kaykä.#Fil. 3.5. 2Israel runakunata Tayta Dios manami kachaykushsu. Paykunataqa unaypita pasami akrash kuyashqan runakuna kayänanpaq. ¿Manaku musyayanki Tayta Diospa palabran Elíaspita imata nishqantapis? Israel mayinkunata acusarmi Tayta Diosta manakur Elías nirqan: 3<<Tayta Dios, lapan profëtaykikunatami wanusiyash. Altarnikikunatapis juchusirmi ushayash. Japalänami kawaykar quëdashkä. Kananqa noqatapis wanusiyämänanpaqnami ashiykäyäman>>.#1Rey. 19.10, 14.
4Elías sayno niptinmi Tayta Dios nirqan: <<Manami yarpashqaykinösu kaykan. Qanchis waranqa (7,000) runakunatami akrashkä Baalta imaypis mana adorayänanpaq>>.#1Rey. 19.18.
5Elías kawashqan wisannölami kananpis wakin Israel runakuna Tayta Diosta sirviykäyan. Sayno sirviykäyan Tayta Dios kuyapar akrashqanpitami. 6Manami imatapis alita rurayashqanpitasu paykunata akrarqan, saypa trukanqa jusayuq kayaptinpis kuyapäkuq karmi akrarqan. Imatapis alita rurayashqanpita akrarqa manami kuyapäkuq karsu akranman karqan.
7Saymi akrashqan kaq Israel runakunala salvacionta tariyan. Wakin kaq Israel runakunaqa salvacionta ashirpis manami tariyansu. Paykunapa shonqunkunatami Tayta Dios chukruyäsirqan wilakuyninta mana cäsuyänanpaq. 8Tayta Diospa palabranchöpis kaynömi qelqaraykan:
<<Pasaypa mana tantiyakuq kayänanpaqmi Tayta Dios upatakäsish.
Saymi kananyaqpis paykunaqa rikaykarpis mana rikaqno kaykäyan
y wiyaykarpis mana wiyaqno kaykäyan>>.#Deut. 29.4; Isa. 29.10.
9Sayno kaqkunapaqmi rey Davidpis Tayta Diosta manakur kayno nirqan:
<<Banquëtita mikuyashqanpis paykunapaq trampa kaykuläsun.
Bendicionnikita churamunaykipa trukan castigaykulay.
10Paykunapa nawinkunapis qaprayäsun.
Imaypis mana derechakäyänanpaq waqtankunapis kurkuyäsun>>.#Sal. 69.22-23.
Mana Israel runakunapis salvakuyashqan
11Israel runakuna ¿manasuraq imaypis Jesucristuta chaskikuyanqa? ¡Aw, chaskikuyanqami! Mana Israel runakunata Tayta Dios salvaykaqta rikarmi Israel runakunapis tantiyakuyanqa Jesucristuta chaskikuyänanpaq. 12Sayno kaptinpis Jesucristuta mana chaskikuyaptinmi mana Israel runakunana Jesucristuta chaskikur salvakuykäyan. Paykuna salvakuykäyashqan kushikuypaq kaptinpis Israel runakuna salvakuyaptinqa masraqmi kushikuypaq kanqa.
13Mana Israel runakuna, shumaq tantiyakuyay. Tayta Dios churamash apostolnin kar mana Israel runakunaman imaykanöpapis ali wilakuyninta apanäpaqmi. 14Saymi wilakü mana Israel runakuna salvakuqta rikayashpan Israel mayïkuna wakilanpis Jesucristuta chaskikur salvakuyänanpaq. 15Israel runakuna Jesucristuta mana chaskikuyaptinpis mana Israel runakunaqa maysaychömi Jesucristuta chaskikuykäyan. Paykunapis salvash karmi wanushno kayashqanpita kawarimushnöna kaykäyan.
Mana Israel runakuna mana alabakuyänanpaq yäsishqan
16Mäsapita rakirkur primiciata Tayta Diospaq apaptinqa lapan mäsapis sagrädumi kaykan. Saynölami jachapa jaqwan#11.16 Wakin runakunaqa sapin o japin niyanmi. sagrädu kaptinqa rämankunapis sagrädu kaykan. 17Israel runakunapis sagrädu kaykarmi Jesucristuta mana chaskikuyashpan olïvu jachapita muturishno kaykäyan. Qamkunaqa olïvu jachaman injertashnönami kaykäyanki. Saymi icha olïvupa rämankunano kaykarpis say ali olïvu jachapa jaqwanpita salvacionta chaskiykäyanki.#11.17 Jachapa jaqwanqa Abraham, Isaac y Jacobmi kaykäyan. Paykunata promitishqanta cumplirmi Jesucristuta Tayta Dios kachamurqan runakunata salvananpaq.
18Olïvu jachaman injertashno kaykarqa ama alabakuyaysu Israel runakunapita mas väliq kayashqaykita yarpar. Manami rämasu jachata kawayta qon, sinöqa jaqwanmi. 19Capazchir qamkuna nikäyanki: <<Imano kaptinpis Israel runakunaqa mutush rämakunanölami kaykäyan. Paykunata salvananpa trukanqa noqakunatanami Tayta Dios salvaykäyäman>>.
20Aw, niyashqaykinölami kaykan. Sayno kaptinpis muturish rämano kaykäyan Jesucristuman mana yärakuyashqanpitami. Qamkuna injertashno kaykäyanki Jesucristuman yärakuyashqaykipitami. Qamkunapis Tayta Diosta mana wiyakurqa cuidä mutush rämano rikakuyankiman. 21Legïtimu olïvupa rämanno kaykäyaptinpis mana wiyakuq Israel runakunata Tayta Dios manami salvansu. Paykunatapis mana salvaykarqa qamkunatapis mana wiyakuyaptikiqa manami salvayäshunkisu.
22Tayta Dios kuyapäkuq y castigakuq kashqanta tantiyakuyay. Mana wiyakuqkunataqa castiganmi. Wiyakuqkunatami isanqa kuyapar salvan. Kuyapäyäshushpaykipis mana wiyakuyaptikiqa qamkunatapis rämatanömi muturiyäshunki. 23Saynölami Israel runakuna Jesucristuman yärakuyaptinqa jachaman injertash rämano kayänanpaq Tayta Dios kuyapar salvanqa. Pay munayyuqmi kaykan jachaman yapay injertananpaqpis.
24Mana Israel runa karmi qamkunaqa icha olïvupa rämanno kaykäyanki. Sayno kayaptikipis Jesucristuta chaskikuyaptikimi Tayta Dios salvayäshushkanki. Israel runakuna legïtimu olïvupa rämanno kaykäyaptinqa Jesucristuta chaskikuyaptin paykunatapis salvanqami.
Israel runakunapis salvakuyänanpaq nishqan
25Wawqi panikuna, mana alabakuyänaykipaqmi runakuna mana musyayashqanta kanan wilashayki. Wakin Israel runakuna kanan chukru shonqu karpis manami saynölasu imayyaqpis kayanqa. Paykuna sayno kayanqa mana Israel runakunapita Tayta Dios akrashqankunata salvashqanyaqlami. 26Saypitanami lapan Israel runakunapis salvakuyanqa. Tayta Diospa palabranchöpis kaynömi qelqaraykan:
<<Salvakuqmi Siónpita shamunqa.
Jacobpita miraqkunatami jusankunata kachariyänanpaq tantiyasinqa.#Isa. 59.20.
27Jusalikuyashqanta perdonarmi paykunawan pactuta rurashaq>>.#Jer. 31.33-34.
28Sayno kaptinpis kananqa Israel runakuna Jesucristupa ali wilakuyninta manami chaskikuyta munayansu. Tayta Diospa contran kayaptinmi paykunapa trukan qamkunatana salvaykäyäshunki. Tayta Diospa contran kanan kaykäyaptinpis Abrahamta, Isaacta y Jacobta promitishqanta cumplirmi Israel runakunata imaypis kuyaykan. 29Tayta Dios imatapis promitirqa cumplinmi. Pitapis salvananpaq akrarqa imaypis salvanmi.
30Nawpataqa manami Tayta Diosta wiyakuyarqaykisu. Kananqa Israel runakunanami wiyakuyansu. Saymi paykunapa trukan Tayta Dios qamkunatana kuyapaykäyäshunki. 31Sayno kuyapaykäyäshunki Israel runakunapis tantiyakuyaptin Tayta Dios kuyapar salvananpaqmi. 32Saymi juk tiempucho Israel runakuna mana wiyakuq kayänanpaq yarpayninkunata Tayta Dios upatakäsirqan y juk tiempuchönami mana Israel runakunapis mana wiyakuq kayänanpaq yarpayninkunata upatakäsirqan. Saymi Israel runakunatapis y mana Israel runakunatapis kuyapäkuq kayninwanraq salvan.
33¡Tayta Dios seqaypa yachaq y tantiyaqmi kaykan!
¡Pay yarpashqankunata y rurashqankunata manami pipis tantiyayta kamäpakunsu!#Isa. 55.8-9.
34Tayta Dios yarpashqankunata ¿pilaqa musyansuraq?
Yachaq kananpaq ¿pilaqa payta yachasinsuraq?#Isa. 40.13; 1Cor. 2.16.
35Diosta mandananpaq ¿piraq munayyuq kanman?#Job 41.11.
36Lapantapis Tayta Diosmi kamash.
Pay munaptinmi lapan imaykapis kaykan.
Lapanpis paylapami kaykan.#1Cor. 8.6; Efe. 4.6; Col. 1.16.
¡Imayyaqpis Tayta Dios alabash kaykuläsun!
Amén.
Currently Selected:
Romanos 11: qvhB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
