Juan 9
9
Qapra runata Jesús aliyäsishqan
1Jerusaléncho Jesús purirmi rikarqan yurishqanpita pasa qapra runata. 2Saymi discïpulunkuna tapur niyarqan: <<Rabí, ¿imanirtaq kay runa qapra yurish? ¿Kikinpa jusanpitaku o mamanpa y taytanpa jusanpitaku?>>
3Sayno tapuyaptinmi Jesús nirqan: <<Manami kikinpa ni mamanpa ni taytanpa jusanpitasu kay runa qapra yurish, saypa trukanqa Tayta Dios aliyäsishqanta runakuna musyayänanpaqmi. 4Inti kashqanyaq kachamaqnï munashqanta rurashun#9.4a Wakin griego copiakunachöqa rurashaq niyanmi.. Pasa sakaptinqa manami pipis aruyta kamäpakunnasu.#9.4b Inti kashqanyaq nirqa kay pasacho kaykashqäyaq nirqanmi. Pasa sakashqanpaq parlarqa wanuyninpaqmi parlarqan. Saynöpami Jesucristo nirqan kay pasacho kashqanyaq Tayta Dios lapan munashqanta cumplinanpaq kashqanta. 5Kay pasacho kashqäyaqqa aksimi kaykä>>.#9.5 Aksi kashqanta nirqa runakunata salvaq kashqanta y Dios munashqanno kawananpaq tantiyasiq kashqantami Jesús nirqan.#Sal. 27.1; 119.105; Prov. 6.23; Isa. 49.6; Juan 8.12.
6Sayno nishpanmi toqayninwan mituta ruraskir say qapra runapa nawinta Jesús lashtaparqan. 7Nirkurmi nirqan: <<Siloé kitaman#9.7 Wakin runakunaqa estanquiman niyanmi. aywaykur maylakamuy>>.
(Siloé ninanqa kachamush ninanmi.)
Jesús nishqanno maylakuskirmi rikaykarna kutirqan. 8Saymi vecïnunkuna y payta reqiqkuna niyarqan: <<¿Manaku kay runaqa caridäta manakuq qapra runa kaykan?>>
9Wakin niyarqan: <<Aw, paymi>>.
Wakinnami niyarqan: <<Manami paysu. Isanqa pay niraqmi>>.
Sayno niyaptinmi kikin nirqan: <<Noqami say runa kaykä>>.
10Saymi tapuyarqan: <<¿Imanöpataq nawiki aliyaykush?>>
11Tapuptinmi nirqan: <<Jesús jutiyuq runami mituta ruraskir nawïta lashtapämash. Nirkurnami maylakunäpaq Siloé kitaman kachamash. Nimashqanno maylakuskirmi kananqa rikaykäna>>.
12Saymi tapuyarqan: <<¿Maychötaq say aliyäsishuqniki runa kaykan?>>
Saymi nirqan: <<Manami musyäsu>>.
Aliyash runata fariseukuna tapuyashqan
13Saypitanami qapra kashqanpita aliyash runata fariseukunaman pushayarqan. 14Mituta ruraykur Jesús aliyäsishqan junaqqa jamay junaqmi karqan. 15Saymi imanöpa aliyashqantapis aliyash runata fariseukuna tapuyarqan. Paynami nirqan: <<Juk runami nawïta mituwan lashtapämash. Maylakuskirmi kananqa rikaykäna>>.
16Saymi wakin fariseukuna niyarqan: <<Say runaqa manami Tayta Dios kachamushqan runasu. Tayta Dios kachamushqan karqa jamay junaqcho jamanmanmi>>.
Wakin fariseukunanami niyarqan: <<Yarpäyashqaykino jusayuq karqa ¿imanöpataq aliyäsinman?>>
Sayno ninakurmi kikinpura apänakuyarqan.
17Saymi aliyash runata yapay tapur niyarqan: <<Say aliyäsishuqniki runa ¿pï kashqantataq qam yarpanki?>>
Saymi nirqan: <<Payqa profëtami>>.
18Sayno niptinmi Israel runakunapa autoridäninkuna say runa qapra kashqanta criyiyarqansu. Saymi mamantawan taytanta qayaykasimur 19tapuyarqan: <<¿Kay runa surikiku? ¿Rasunpaku qapra yurirqan? ¿Imanöpataq aliyash?>> nir.
20Saymi maman taytan niyarqan: <<Aw, wamrämi. Rasunpaypami yurishqanpita pasa qapra kash. 21Isanqa manami musyayäsu imanöpa aliyashqantapis ni pï aliyäsishqantapis. Payqa yäpanami. Kikinta tapuyay>>.
22Sayno niyarqan autoridäkunata mansakuyashpanmi. Autoridäkunaqa wilanakuyashnami kaykäyarqan mayqanpis <<Jesúsqa Tayta Dios kachamushqan Cristumi>> niq kaqtaqa sinagögapita qarquyänanpaq.#9.22 Sinagögapita autoridäkuna pitapis qarquyaq imaypis manana kutinanpaqmi. Saymi manana kutiqnasu Tayta Diosta adorananpaq ni runakuna sesionta ruraptin parlananpaqpis. 23Sayta mansakurmi maman taytan niyarqan: <<Payqa yäpanami. Kikinta tapuyay>>.
24Saymi qapra kashqanpita aliyash runata autoridäkuna yapay qayaykasir tapuyarqan: <<Tayta Diospa nawpanchömi nikäyä. Rasun kaqta wilayämay. Musyayämi say aliyäsishuqniki runa jusasapa kashqanta>>.
25Saymi say runa nirqan: <<Noqa manami musyäsu jusasapa kashqanta o jusaynaq kashqantapis. Isanqa musyä qapra kashqäpita alina rikashqätami>>.
26Sayno niptinmi yapay tapuyarqan: <<¿Imatataq rurash nawiki aliyänanpaq?>>
27Niyaptinmi nirqan: <<Maynami qamkunata wilashkäna. Wilaptïpis manami criyiyämankisu. ¿Imanirtaq yapay tapuyämanki? ¿Qamkunapis paypa discïpulun kaytaku munaykäyanki?>>
28Sayno niptinmi rabyakuyashpan niyarqan: <<Qamchir paypa discïpulunqa kaykanki. Noqakunaqa Moiséspa discïpulunkunami kaykäyä. 29Musyayämi Moisésta Tayta Dios parlapashqanta. Say aliyäsishuqniki runapaqqa ni maypita shamushqantapis manami musyayäsu>>.
30Sayno niyaptinmi nirqan: <<Say runa nawïta aliyaykäsimaptinqa ¿imanirtaq tantiyayankisu Tayta Diospita shamushqanta? 31Musyansimi jusasapakunataqa Tayta Dios mana cäsupashqanta. Payta mansapakur munashqanno kawaqkunatami isanqa yanapan.#Prov. 15.29. 32Manami imaypis wiyashkansisu yurishqanpita pasa qapra runata pipis aliyäsishqanta. 33Say runa Tayta Diospita mana shamush karqa manami ima milagrutapis ruranmansu>>.
34Sayno niptinmi autoridäkuna niyarqan: <<¡Qamqa seqaypa jusayuqmi yurishkanki! ¿Sayno kaykarku yachasiyämaytarä munaykanki?>>
Sayno niyashpanmi sinagögapita say runata qarquyarqan.
Jesústa mana chaskikur qaprano kayashqan
35Say aliyäsishqan runata sinagögapita qarquyashqantami Jesús musyarqan. Say runawan tinkuykurnami nirqan: <<¿Runapa Surinman#9.35 Wakin griego copiakunachöqa Tayta Diospa Surinman niyanmi. criyinkiku?>>
36Niptinmi nirqan: <<Taytay, ¿pitaq say runa? Wilaykalämay payman criyinäpaq>>.
37Saymi Jesús nirqan: <<Maynami rikashkanki. Say runaqa noqami kaykä>>.
38Sayno niptinmi Jesústa adorarqan: <<Qamman yärakulämi, Taytay>> nir.
39Sayno niptinmi Jesús nirqan: <<Kay pasaman noqa shamushkä runakunata juzganäpaqmi. Juzgaptïmi qaprakuna rikayanqa y rikaqkuna qaprayäyanqa#9.39 Sayno nirqa Jesús kaynömi nirqan: Juzgaptïmi mana tantiyaqkuna tantiyakuyanqa y yachaqkunanami tantiyakuyanqasu.>>.#Isa. 6.10; 42.19; Mar. 4.12; Juan 12.40.
40Sayno nishqanta wiyayashpanmi saycho kaykaq wakin fariseukuna niyarqan: <<Sayno kaptinqa ¿noqakunapis qaprachi kaykäyä?>>
41Saymi Jesús nirqan: <<Qapra kayashpaykiqa manami jusayuqsu kayankiman. Rikayashqaykita nirmi jusayuq kaykäyanki>>.#9.41 Fariseukuna yachaq karqa tantiyakuyanmanmi karqan Jesústa Tayta Dios kachamushqanta. Mana tantiyarmi jusayuq kayarqan. Yachaq kaykarpis mana tantiyakuyaptinmi qapra runaman Jesucristo tinkusirqan.
Currently Selected:
Juan 9: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.