YouVersion Logo
Search Icon

Juan 11

11
Lázaro wanushqan
1Betania markachömi Lázaro jutiyuq runa pasaypa ansa kaykarqan. Saychömi panin Maríawan y Martawan täyarqan.#Luc. 10.38-39. 2(Maríami Jesúspa chakinman perfümita winaparkur aqsanwan sakisiparqan.)#Juan 12.3. 3Lázaro ansa qeshyaptinmi paninkuna juk runata Jesúsman kachakuyarqan: <<Kuyanakuyashqayki Lázarumi pasaypa ansa qeshyaykan, taytay>> nir wilananpaq.
4Sayno wilayaptinmi Jesús nirqan: <<Lázaruta say qeshya manami wanushlancho usharänanpaqsu sarish, sinöqa Tayta Diospis y Surinpis munayyuq kayashqanta runakuna tantiyakuyänanpaqmi>>.
5Martawan, Maríawan y Lázaruwanpis seqaypami Jesús kuyanakuyarqan. 6Sayno kaykarpis Lázaro qeshyaykashqanta wilaptin manami juklasu aywarqan. Saypa trukanqa kaykashqan kaqlachömi ishkay junaq qoyäkurqan. 7Saypitanami discïpulunkunata nirqan: <<Judea provinciapa yapay aywashun>>.
8Saymi discïpulunkuna niyarqan: <<Rabí, qanyankunaraqmi saycho runakuna samqaypa wanusiyta munayäshushkanki.#Juan 10.31, 39. ¿Sayno kaykaptinku kutiyta munaykanki?>>
9Saymi Jesús nirqan: <<¿Manaku juk junaqcho chunka ishkay höra kaykan? Junaqpa purirqa aksita rikashpan runakuna manami ishkiyansu.#Juan 8.12; 9.5. 10Sakaypa purirmi isanqa imamanpis takakar ishkiyan. Sayno ishkiyan paycho aksi mana kaptinmi>>.#11.10 Saykunata parlar Jesús nirqan: Hörä manaraq chämuptinqa manami wanusiyämanqaraqsu. Saynöpis qamkunawan kaykaptïqa manami imapis päsayäshunkisu.
11Nirkurnami nirqan: <<Kuyanakushqansi Lázaruqa punukashlami kaykan. Rikchasinansipaq aku aywashun>>.
12Sayno niptinmi discïpulunkuna niyarqan: <<Punukashla karqa aliyanqami, taytay>>.
13Lázaro punuykashqanta nirpis wanush kashqantami Jesús tumasipaylapa nirqan. Sayno niptin discïpulunkuna mana tantiyarmi punuykashlanta yarpäyarqan. 14Sayno yarpäyaptinmi Jesús nirqan: <<Lázaro wanushqami kaykan. 15Sayno kaptinpis saycho mana kashqäpita kushikümi. Kananmi noqaman mas criyiyämanki. Aku aywashun>>.
16Saymi Milish niyashqan Tomás discïpulu mayinkunata nirqan: <<Jesúsnintinta wanunansipaq kaptinpis paywan aywashun>>.
Wanushkunata kawarisimunanpaq munayyuq Jesús kashqan
17Betaniaman Jesús chaykuptinnami chusku junaqna Lázaro pamparaykashqanta wilayarqan. 18Jerusalénpita Betaniaman media lëwanöla kaptinmi 19aska runakuna aywayarqan Martata y Maríata shoqayänanpaq. 20<<Jesúsmi shamuykan>> niqta wiyarmi Marta taripaq aywarqan. Maríami isanqa wayicho quëdakurqan. 21Jesúswan tinkuskirmi Marta nirqan: <<Kaycho kaptikiqa turï manami wanuykunmansu karqan, taytay. 22Imano kaptinpis musyämi lapan manakushqaykitapis Tayta Dios rurananpaq kashqanta>>.
23Sayno niptinmi Jesús nirqan: <<Turiki kawarimunqami>>.
24Saymi Marta nirqan: <<Aw, musyämi juiciu finalcho wanushkuna kawariyämuptin turïpis kawarimunanpaq kashqanta>>.#Dan. 12.2.
25Niptinmi Jesús nirqan: <<Noqami wanushkunata kawarisimuq kaykä.#Rom. 6.4-5; Col. 2.12; 3.1. Noqaman yärakamaq kaqtaqa wanuptinpis kawarisimushaqmi. 26Kawaqkunapis noqaman yärakamarqa mana ushakaq kawaytami tariyanqa. ¿Sayta criyinkiku?>>
27Sayno niptinmi Marta nirqan: <<Aw, taytay, noqa criyïmi Tayta Diospa Surin kashqaykita. Qamqa kay pasaman shamunanpaq kaq Cristumi kaykanki>>.
Lázarupaq Jesús waqashqan
28Sayno nirkurmi nanan Maríata qayaq Marta kutirqan. Chaykurmi rinrilancho nirqan: <<Jesúsmi chämush. Paymi qayaykäshunki>>.
29Saymi María jukla aywarqan. 30Jesús manaraqmi markaman charqanraqsu, sinöqa Martawan tinkushlanchöraqmi kaykarqan. 31Wayipita María jukla yarquqta rikayashpanmi saycho kaykaq runakuna qepanta aywayarqan: <<Turin pamparaykashqanmanchir waqaq aywaykan>> nir.
32Jesús kaqman María chaykurmi puntanman qonqurpakuykur nirqan: <<Qam kaycho kaptikiqa manami turï wanunmansu karqan, taytay>>.
33Maríata y walkiqnin runakunatapis waqaykäyaqta rikarmi Jesúspis fiyupa lakikurqan. 34Saymi tapurqan: <<¿Maymantaq pampayashkanki?>> nir.
Paykunanami niyarqan: <<Rikasiyänäpaq aywashun, taytay>>.
35Saymi Jesúspis waqarqan. 36Waqaptinmi wakin runakuna niyarqan: <<Rikay, Lázaruta seqaypachir kuyarqan>>.
37Wakinnami niyarqan: <<Qapra runatapis aliyaykäsirqa ¿manasuraq Lázarutapis aliyäsinman karqan?>>
Lázaruta Jesús kawarisimushqan
38Fiyupa lakishqami Jesús charqan Lázaro pamparashqan machayman. Punkunnami jatun rumiwan sapararqan. 39Saychömi Jesús nirqan: <<Saparaykaq rumita witisiyay>>.
Sayno niptinmi Lázarupa panin Marta nirqan: <<Chusku junaqnami pamparaykan, taytay. Seqaypanachir asyaykan>>.
40Sayno niptinmi Jesús nirqan: <<¿Manaku nishkä noqaman yärakamar Tayta Dios munayyuq kashqanta rikanaykipaq?>>
41Sayno niptinmi saparaykaq rumita witirasiyarqan. Jesúsnami jana pasapa rikärir nirqan: <<Manakushqäta wiyamashqaykipitami qamta agradëcikamü, papä. 42Musyämi imaypis wiyamashqaykita. Sayno kaptinpis runakuna wiyay manakamü kachamashqaykita tantiyakuyänanpaqmi>>.
43Sayno nirkurnami Jesús sinchipa nirqan: <<¡Lázaro, yarqamuy!>>
44Sayno niptinmi kawarirkamur uman wankush y makin chakin pitush yarqamurqan. Saymi Jesús nirqan: <<Purinanpaq paskayay>>.
Jesústa wanusiyänanpaq mandaq cürakuna wilanakuyashqan
Mateo 26.1-5; Marcos 14.1-2; Lucas 22.1-2
45Lázaruta kawarisimushqanta rikaykurmi Maríata walkiq runakuna Jesúsman askaq criyiyarqan. 46Wakin kaqnami fariseukunaman aywaykur Lázaruta Jesús kawarisimushqanta wilayarqan. 47Sayta wiyaykurmi mandaq cürakunawan fariseukuna lapan Sanedrín juezkunata qayaykasir niyarqan: <<Say runa askatanami milagrukunata ruraykan. Sayno kaptinqa ¿imatataq rurashun? 48Imatapis mana rurashqaqa lapan runakunami payman criyiyanqa. Sayta wiyaykurqa Roma soldädukuna shamurmi templunsita juchusir noqansitapis chipyaq wanusimäshun>>.
49Sayno niyaptinmi mas mandaq cüra Caifás nirqan: <<¡Qamkuna manami imatapis musyayankisu! 50Lapansi wanunansipa trukanqa mas alimi kanman juk runala wanuptin. ¿Imanirtaq sayta tantiyayankisu?>>
51Caifás manami kikinpa yarpaylanpitasu sayno nirqan, saypa trukanqa say wata mas mandaq cüra kaptinmi Tayta Dios tantiyasirqan lapan runakunapa trukan Jesús wanunanpaq kashqanta. 52Manami Israel runakunalapaqsu wanunan karqan, sinöqa Diospa wamrankuna maysaychöpis mashtakash kaykaqta shuntamunanpaqmi. 53Say junaqpitami autoridäkuna wilanakuyarqan Jesústa wanusiyänanpaq.
54Saymi Israel autoridäkunapa rikananchöqa Jesús purirqannasu. Jerusalénpita discïpulunkunawan Efraín markaman aywakurmi saycho qoyäyarqan. Say markaqa sunyaq jirka nawpalanchömi kaykan.
55Israel runakunapa Pascua fiestan qalaykunanpaqna kaykaptinmi markankunapita aska runakuna purificakuyänanpaq Jerusalénman aywayarqan. 56Jesústa ashirmi templu patiucho jukninpis jukninpis ninakuyarqan: <<Qamkuna ¿imatataq yarpäyanki? ¿Fiestapaq Jesús shamunqasuraq?>> niyashpan.
57Mandaq cürakuna y fariseukuna runakunata maynami nish karqan: <<Jesústa maychöpis rikashpaykiqa prësu sarisiyänäpaq jukla wilayämanki>> nir.

Currently Selected:

Juan 11: qvhB

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy