Éxodo 23

Runakunata imano arreglayänanpaqpis tantiyasishqan

1<<Manakaqkunata pitapis ama jitapäyankisu.#Éxo. 20.16; Lev. 19.11; Deut. 5.20. Saynöpis lutan ruraqkunapa favornin ama sharkuyankisu.

2<<Wakin runakuna lutanta rurayaptinpis qamkuna ama rurayankisu. Testïgu karqa rasuntanöraq wakin parlayaptinpis qamkunaqa rasun kaqlata parlayanki. 3Lutanta rurash kaptinqa ni pobri kaptinpis ama favornin sharkuyankisu.#Lev. 19.15.

4<<Chikinakuyashqaykipa oqrakash törunta o ashnunta tarishpaykiqa ämunman kutisiyanki. 5Chikishuqnikipa ashnun cargantin jitaraykaqta rikarqa sharkarkasiyanki.#Deut. 22.1-4.

6<<Pobri kaptinpis demandakuptinqa shumaq arreglayanki.

7<<Manakaqkunata pitapis tumpaptinqa ama cäsupäyankisu. Jusaynaq runata ama wanusiyankisu. Jusayuq kaqtaqa manami perdonashaqsu.

8<<Autoridä karqa ama äshukuyta chaskiyankisu. Äshukuyta chaskipakuq autoridäqa manami shumaq arreglansu, saypa trukanqa chaskipashqan runapa favornin sharkurmi runakuna ali yäsiyashqantapis chaskinsu.#Lev. 19.15; Deut. 16.19.

9<<Juk nacionpita shamuq runata ama nakasiyankisu. Qamkunapis Egiptucho jäpa kash kar musyayankimi juklä nacioncho kaway imano kashqantapis.#Éxo. 22.21; Lev. 19.33-34; Deut. 24.17-18; 27.19.

Chakrapis runapis jamayänanpaq nishqan

10<<Soqta wata chakraykita murur wayushqanta shuntayanki. 11Qanchis watachöqa say chakraykita jamasiyanki. Saycho shiwa winamuptinqa kachaykuyanki muchuqkuna shuntakuyänanpaq y munti uywakuna mikuyänanpaq. Sayno rurayanki üva chakra kaptinpis#Lev. 25.1-7. y olïvu chakra kaptinpis.

12<<Lapan aruyänaykipaq kaqta soqta junaqcho aruyanki. Qanchis junaqchöqa jamayanki. Töruykikunatapis, ashnuykikunatapis, ashmaynikikunatapis y arupakuq jäpa runakunatapis jamasiyanki.#Éxo. 20.9-11; 31.15; 34.21; 35.2; Lev. 23.3; Deut. 5.13-14.

13<<Noqa nishqäkunata lapanta cumpliyanki. Juklä runakuna yärakuyashqan dioskunata ama manakuyankisu. Say dioskunapataqa ni jutinkunatapis ama joqariyankisu.

Watacho kimsa fiestata rurayänanpaq tantiyasishqan

Éxodo 34.18-26; Deuteronomio 16.1-17

14<<Noqata adorayämashpayki cada watacho kimsa kuti fiestata rurar adorayämanki.

15<<Levadüraynaq Tantata Mikuna fiestata rurayanki. Nishqänöla say fiestacho levadüraynaq tantata#Éxo. 12.14-20; Lev. 23.6-8; Núm. 28.17-25. qanchis junaq mikuyanki. Abib killacho Egiptupita yarqamush karmi say killacho fiestata rurayanki. Pipis noqata adoramänanpaq shamurqa manami jinaylaqa shamunmansu.

16<<Saypita saki mikuy cosëchata qalaykur Saki Mikuy Cosëcha fiestata#23.16a Saki Mikuy Cosëcha fiestapa jukaq jutinmi Semäna fiesta kaykan. Sayta musyanaykipaq liyinki Éxo. 34.22. rurayanki.

<<Wata ushanancho cosëcha shuntayta ushaskirna#Lev. 23.15-21; Núm. 28.26-31. Cosëcha Ushay fiestatapis#23.16b Cosëcha Ushay fiestapa jukaq jutinmi Ramäda fiesta kaykan. Sayta musyanaykipaq liyinki Deut. 16.13. rurayanki.#Lev. 23.39-43.

17<<Lapan olqu kaqkuna cada watacho say kimsa fiestakunaman adorayämänanpaq aywayanqa.

18<<Uywakunata noqapaq sacrificiuta rupasirqa yawartawan levadürayuq tantata talurkur ama rupasiyankisu. Wirantapis warayninpaqqa ama churayankisu.

19<<Murupakuyashqaykipita primiciata wayïman apayämunki.#Deut. 26.2.

<<Cabra malwapa aysantapis mamanpa lichinwan ama yanuyankisu.#Éxo. 34.26; Deut. 14.21.

Israel runakunata Tayta Diospa angilnin pushashqan

20<<Angilnïtami kachamushaq imapitapis sapäyäshushpayki kamarishqä nacionman chäsiyäshunaykipaq. 21Paymi trukä yanapäyäshunki. Sayno kaykaptinqa contran ama sharkuyankisu. Pay niyäshushqaykita lapantapis cäsukuyanki. Jusalikuyaptikiqa manami perdonayäshunkisu. 22Pay niyäshushqaykita lapanta cäsukuyaptikiqa chikishuqnikikunapa contranmi sharkushaq. Saynölami nakasishuqnikikunatapis nakasishaq.

23<<Angilnïmi pushayäshunki amorreo runakuna, heteo runakuna, ferezeo runakuna, cananeo runakuna, heveo runakuna y jebuseo runakuna täyashqan nacionman. Say runakunata lapantami elaqäsishaq. 24Paykuna jusalikuyaptinpis qamkunaqa ama jusalikuyankisu. Yärakuyashqan dioskunamanpis ama qonqurpakuyankisu ni sirviyankisu. Adorayashqan wankakunatapis y lapan ïdulunkunatapis shalur ushakäsiyanki.

25<<Noqa Tayta Diosniki kaptï noqalata sirviyämanki. Sayno kawayaptikimi bendicionnïta qoyäshayki mikuypis ni yakupis mana pishïyäshunaykipaq. Ima qeshyapitapis noqami sapäyäshayki. 26Qamkuna täyashqaykichöqa manami pï warmipis shulunqasu ni qoluqpis kanqasu. Awkin kayashqaykiyaqmi kawayankipaq.

27<<Mayqan nacionpa päsayaptikipis noqami yanapäyäshayki saycho taq runakuna mansariyashpan qeshpir aywakuyänanpaq. 28Sayno yanapaptïmi heveo runakuna, cananeo runakuna y heteo runakunapis qamkunapita qeshpir aywakuyanqa. 29Sayno kaptinpis manami juk watalachösu say runakunata qarqushaq. Jukla qarquptïqa chakrakuna purunyäyanqami y munti uywakunapis mirar ushayäshunkimi. 30Saymi qamkuna mirayashqaykiman tupu paykunata walka walkala qarqushaq. Saynöpami lapan chakrankuna qamkunapana kanqa.

31<<Nacionnikipa lindërunmi kanqa Puka Lamarpita filisteo runakunapa lamarninyaq.#23.31 Filisteo runakunapa lamarninqa Mediterráneo Lamarmi kaykan. Saynöpis lindëruyki kanqa sunyaq jirkapita Éufrates mayuyaqmi. Qamkunatami yanapäshayki saycho taq runakunata qarquyänaykipaq. 32Say runakunawan ni diosninkunawan ima pactutapis ama rurayankisu. 33Say runakunata ama kachapäyankisu täyashqayki nacioncho täyänanpaq. Qamkuna kaqcho tarqa mana cäsukayämänaykipaqmi shimita qoyäshunki. Saynöpami paykuna yärakuyashqan dioskunata adorayaptiki mana kuyapaypa castigayäshayki>>.

Currently Selected:

Éxodo 23: qvhB

Highlight

Copy

Compare