Éxodo 21

Ashmaykuna imano kayänanpaqpis tantiyasishqan

Deuteronomio 15.12-18

1<<Kay leykunata Israel runakunata yachasinki: 2Hebreo mayinta ashmaynin kananpaq pipis rantirqa soqta watayaqlami sararanqa. Qanchis watachöqa imatapis mana pägaylapami librina yarqukunqa. 3Ashmaynin kananpaq warmiynaqla yaykush karqa warmiynaqlami yarqukunqa. Warmiyuq yaykush karqa warmintinmi yarqukunqa.

4<<Japala yaykuptin ashmaynin jipashwan patronnin täsiptinqa ashmay kashqanpita say runa yarqukur japalanmi yarqukunqa. Say ashmay warmi y wawankunapis patronninpa makinchömi quëdakuyanqa. 5Patronninta, warminta y wamrankunata say runa kachayta mana munaptinqa 6patronninmi Tayta Diospa nawpanman apanqa.#21.6 Tayta Diospa nawpanman apananpaq nirqa Tinkuna Tolducho kaykaq altarpa nawpanman apananpaqmi nirqan. Wakin traduccionkunaqa juezkunapa nawpanman niyanmi. Saychönami punkupa quiciunninman apaykur rinrinta alisnawan uchkurinqa. Sayno rurarkuptinqa imayyaqpis ashmayninmi kanqa.#Lev. 25.39-46.

7<<Pipis ashmay kananpaq warmi surinta rantikurqa ama yarpäsunsu qanchis wata arushqanpita olqu ashmayno libri yarqukunanpaq kashqanta. 8Say jipashta warminpaq patrón mana munaptinqa ayllunkuna pägaykur shuntakuyanqa. Isanqa warminpaq mana munarpis mana Israel runamanqa manami rantikunmansu. 9Say ashmaynin jipashta surinwan täsirqa kikinpa warmi surintano rikanqa.

10<<Ashmaynin jipash jananman juk warmita ashirqa say ashmay kaq warminta mikuyta y mödanata mana kachaypa kamaripanqa. Saynöla paywanpis pununqa. 11Mikuytapis o mödanatapis mana kamaripar o paywan manana punurqa ashmaynin kananpaq rantishqanpita imatapis mana cobraylapa libri yarqukunanpaq kacharikunqa.

Imano castigananpaqpis tantiyasishqan

12<<Pipis runa mayinta maqaykashqancho wanusiptinqa kikintapis wanusiyanqa.#Lev. 24.17. 13Noqa destinash kaptï mana yarpaypa wanusirqa rikasishqä markamanmi say wanusiq runa qeshpinqa.#Núm. 35.10-34; Deut. 19.1-13; Jos. 20.1-9. 14Yarpaypa runa mayinta wanusiptinmi isanqa altarnïman pakakuptinpis wanusiyanqa.

15<<Pipis mamanta taytanta maqaq kaqqa wanusishqami kanqa.

16<<Pipis runa mayinta suwarkur rantikushna kaptinpis o makincho sararaykaqta taripäyaptinpis say suwaq runa wanusishqami kanqa.#Deut. 24.7.

17<<Pipis mamanta o taytanta mana respitaq kaqqa wanusishqami kanqa.#Lev. 20.9; Mat. 15.4; Mar. 7.10.

18<<Pelyaykashqancho samqaypapis o kutaypapis pasaypa ansa jitaraqpaq maqaptinqa 19say maqaq runa manami wanusishsu kanqa. Isanqa cämanpita tukrulanwanpis say ansa kaykaq runa yarqarkamuptinqa lapan jampikushqanpita y aträsunpitami päganqa.

20<<Mayqan patronpis ashmayninta warmitapis olqutapis wanuqpaq wirur imarqa castigashqami kanqa. 21Maqashqanpita juk ishkay junaq kawaptinqa say patrón mananami castigashnasu kanqa. Sayno kanqa kikinpa ashmaynin kaptinmi.

22<<Ishkaq runa pelyaykäyashqancho qeshyaq warmita päsapakuptin say achäquila shuluptinqa juezman demandakuq aywanqa. Say warmi mana wanuptin imaptinqa warminpa lesionninpita runan manaptin jueznami tantiyaykur pägasinqa. 23Say warmi wanuptinmi isanqa maqaq runatapis wanusiyanqa.

24<<Nawinta jorquptinqa kikinpa nawintapis jorquyanqa. Kirunta jorquptinqa kikinpa kiruntapis jorquyanqa.#Lev. 24.19-20; Deut. 19.21; Mat. 5.38. Makinta pakiptinqa kikinpa makintapis pakiyanqa. Chakinta pakiptinqa kikinpa chakintapis pakiyanqa. 25Rupasiptinqa kikintapis rupasiyanqa. Yawarta jorquptinqa kikintapis yawarta jorquyanqa. Maqaptinqa kikintapis maqayanqa.

26<<Pipis ashmayninta maqaykashqancho nawinta wiskuyäsirqa olqu kaptinpis warmi kaptinpis librina yarqukunanpaqmi kachaykunqa. 27Saynöla ashmayninpa kirun yarquqpaq maqarqa librina yarqukunanpaqmi kachaykunqa.

Elaqpita imapis kaptin imata rurayänanpaqpis nishqan

28<<Olquta karpis warmita karpis töru ashtir wanusiptinqa say töruta samqaypa wanusiyanqa. Aysantapis ama pipis mikunqasu. Ämuntaqa amana demandakunqanasu. 29Ashtikuyta mäñash kar pitapis ashtir wanusiptinqa say törupa ämuntapis wanusiyanqa. Sayno kasun ashtikuq kashqanta musyaykar mana sigurashqanpita. Saynöla töruntapis samqaypa wanusiyanqa. 30Törupa ämun wanuyta mana munar pägayta munaptinqa manashqanta päganqa.

31<<Saynöla kanqa olqu wamrata o warmi wamrata töru ashtiptinpis. 32Ashmaytapis töru ashtiypa wanusiptinqa say töruta samqaypa wanusiyanqa. Ashmay olqu kaptinpis o warmi kaptinpis sayno kanqa. Saynöpis törupa ämun kimsa chunka (30) siclo qellayta päganqa wanuq ashmaypa patronninta.

33<<Mayqanpis pözuta uchkuykur mana sapaylapa kachaykuptin o yaku pözuta mana sapaylapa kachaykuptin sayman töru o ashnu jeqaptinqa 34pözupa duëñun say uywakunapa chaninta päganqa. Wanuq uywapa aysanwanqa pözupa duëñunnami quëdakunqa.

35<<Pipa törunpis juk runapa törunta maqar wanusiptinqa kawaykaq töruta rantikuskir say qellayta pulanpura rakipänakuyanqa. Sayno wanush törupa aysantapis pulanpura rakipänakuyanqa. 36Törun maqakuq kashqanta musyaykar ämun mana siguraptin jukpa törunta wanusiptinqa wanuq törupa trukanta qonqa. Say wanuq törupa aysanwanqa pägaq kaqnami quëdakunqa.

Currently Selected:

Éxodo 21: qvhB

Highlight

Copy

Compare