Éxodo 19

Israel runakuna Sinaí nishqan sunyaq jirkaman chäyashqan

1Egiptupita yarqur kimsa killatami Sinaí sunyaq jirkaman Israel runakuna chäyarqan. 2Sayman chäyänanpaqmi Refidimpita yarqayämush kayarqan. Sinaí sunyaq jirkaman chaykurmi punta chakincho posädakuyänanpaq toldunkunata ichisiyarqan. 3Saypitami Tayta Dioswan tinkuq jirkaman Moisés wisarqan. Say jirka puntapita qayakamurmi Moisésta Tayta Dios nirqan: <<Israel runakunata wilay: 4<Qamkuna rikayashkankimi Egipto runakunata imano ushakäsishqätapis. Musyayankimi makïcho kayänaykipaq qamkunata imano shuntakushqätapis. Wawankunata anka apashqannömi qamkunatapis Egiptupita apamushkä.

5<< <Saymi nishqäkunata wiyakayämar qamkunawan pactu rurashqäta cumpliyaptikiqa wakin runakunapitapis mas kuyayäshayki. Intëru kay pasacho taq runakunata kamash karpis qamkunatami mas kuyayäshayki.#Deut. 7.6; 14.2; 26.18; Tito 2.14. 6Qamkunataqa nacionninpami sirvimaq cürakunano kayänaykipaq churayäshayki. Saymi santu kar noqalata sirviyämanki>.#1Ped. 2.5, 9; Apoc. 1.6; 5.10. Sayno nishqäta Israel runakunata wilay>>.

7Moisés kutiykurnami mayor runakunata shuntaykur wilarqan Tayta Dios nishqankunata. 8Wilaptinmi Israel runakuna juk shimila niyarqan: <<Tayta Dios nishqantaqa lapantami rurayäshaq>>.

Paykuna sayno niyashqantami jirkaman kutiykur Tayta Diosta Moisés wilarqan.#Éxo. 24.3; Deut. 5.27.

9Sayno wilaptinmi Moisésta Tayta Dios nirqan: <<Israel runakuna wiyayänanpaqmi yanawyaykaq pukutay rurinpita parlapäshayki. Saynöpami imaypis criyiyanqa qamta parlapashqäta>>.

Israel runakuna awniyashqanta Tayta Diosta Moisés yapay wilaptinmi 10Tayta Dios nirqan: <<Ayway runakunata wilay kanan junaqpis waray junaqpis purificakuyänanpaq#Éxo. 19.14-15. y mödanankunata taqshakuyänanpaq. 11Kananpita kimsa junaqtami lapan rikaykäyämaptin Sinaí puntaman urämushaq. Saypaq kamarikushla shuyaraykäyämäsun.

12<<Runakuna jirkaman mana wisäyämunanpaq jirka chakinman señalta tumaypa churay. Nirkur wilay sayman pipis mana witiyämunanpaq. Say señalta päsaq kaqtaqa wanusiyanki. 13Runa kaptinpis o uywa kaptinpis karulapita samqaypa o flëchaypa wanusiyanki. Cornëtata tukamushqanta wiyarraqmi say señalarashqanyaq runakuna wisäyämunqa>>.#Heb. 12.18-20.

14 Tayta Dios sayno niptinmi Sinaí jirkapita Moisés urarqan runakunata kamarikasinanpaq. Saymi runakuna kamarikur mödanankunata taqshakuyarqan. 15Saychömi runakunata Moisés nirqan: <<Warantin junaqpaq lapayki kamarikuyay. Say paqaskunaqa warmikitapis ama yatapäyankisu>>.

16Saypita kimsa junaqta pasa wararkuptinnami elqukuypis maqakuypis#Apoc. 4.5. fiyupa karqan. Yanawyaykaq pukutaymi jirkatapis sapakurkurqan. Cornëtata tukamushqanpis wiyakämurqanmi. Saymi lapan Israel runakuna mansariyashpan fiyupa suksukyäyarqan. 17Saypita Tayta Dioswan tinkuyänanpaq runakunata Moisés pushaptinmi jirka chakinman chaykur shuyaräyarqan. 18Sinaí jirkaman nina chawpincho Tayta Dios urämush kaptinmi imayka jornupita sharkuqnöraq yanawyaykaq qoshtay sharkuykarqan.#Deut. 4.11-12; 5.4. Jirkakunapis fiyupami suksukyarqan. 19Cornëtata tukamushqanpis mas fuerti mas fuertimi wiyakämurqan. Saychömi Moisés parlapaptin maqakuynöraq Tayta Dios contestamurqan. 20Sinaí jirka puntaman Tayta Dios urämurmi sayman wisänanpaq Moisésta qayarqan. Saymi jirka puntaman Moisés wisarqan.

21Saychömi Tayta Dios nirqan: <<Kutishpayki runakunata wilay rikayämayta munar señalpita janaman mana päsayämunanpaq. Señalta päsamuq kaqqa lapanmi wanuyanqa. 22Nawpäman shamuq cürakunapis purificakuyäsunraq. Manasayqa paykunatapis wanusirmi ushaykushaq>>.

23Sayno niptinmi Tayta Diosta Moisés nirqan: <<Kikikimi nimashkanki señalta pipis mana päsayämunanpaq. Saymi kay sagrädu Sinaí puntaman runakuna wisäyämunqasu>>.

24Saymi Tayta Dios nirqan: <<Aywar wawqiki Aarónta pushakurkur kutimuy. Cuidätaq cürakunapis runakunapis señal churashqaykita päsamur noqa kaykashqäman wisäyämunman. Päsamuq kaqtaqa lapantami ushakäsishaq>>.

25Saymi jirkapita urarpur Tayta Dios nishqankunata runakunata Moisés wilarqan.

Currently Selected:

Éxodo 19: qvhB

Highlight

Copy

Compare