Éxodo 17

Qaqapita yaku pashtamushqan

1Sin niyashqan sunyaq jirkacho taykäyashqanpitami Tayta Dios nishqannöla Israel runakuna posädakur posädakur Refidim partiman chäyarqan. Saychöpis yaku manami karqansu. 2Saymi runakuna Moisésta rabyash niyarqan: <<¿Ima yakutataq kaycho upuyäshaq?>>

Niyaptinmi Moisés nirqan: <<Yaku mana kaykaptinqa reclamayämaptikipis ¿imatataq rurashaq? ¿Imanirtaq Tayta Diosta obligayta munaykäyanki yakuta kamaripäyäshunaykipaq?>>

3Moisés sayno niptinpis runakuna fiyupa yakunäyashpanmi qayapar niyarqan: <<¿Kayno nakasiyämänaykipaqku Egiptupita jorqayämarqayki? ¿Lapan wamräkunapis uywäkunapis yakunaypita wanuyänäpaqku jorqayämashkanki?>>

4Runakuna sayno niyaptinmi Tayta Diosta manakur Moisés nirqan: <<Kay runakunawan ¿imatataq rurashaq, Taytay? Saynöla karqa samqarpis saripakayämanqanachir>>.

5Saymi Moisésta Tayta Dios nirqan: <<Juk ishkay Israel mayor runakunata pushakurkur lapan runakunapa nawpanta ayway. Paykunawan aywar mayuta wepyashqayki tukruykita apay. 6Horeb#17.6 Horebqa Sinaí jirkapa jukaq jutinmi karqan. jirkacho kaykaq qaqachömi shuyaraykäshayki. Say qaqata tukruykiwan wiruptikimi yaku yarqamunqa lapan runakuna upuyänanpaq>>.

Saymi Tayta Dios nishqannöla Moisés rurarqan Israel mayor runakuna rikaykäyaptin.

7Say partita jutisirqan Masah#17.7a Masah ninanqa probaq ninanmi. jutin kananpaq y Meriba#17.7b Meriba ninanqa reclamay ninanmi. jutin kananpaqpis. Say jutikunata churaparqan Israel runakuna descontentu kar <<¿noqansiwan Tayta Dios kaykanku o manaku?>> niyashqanpitami.

Amalecita runakunata vinciyashqan

8Israel runakuna Refidimcho taykäyaptinmi amalecita runakuna atacaq aywayarqan. 9Saymi Josuéta Moisés nirqan: <<Runakunata akray amalecita runakunawan pelyaq aywanaykipaq. Waray tutalami jirka puntacho kaykäshaq Tayta Dios <apay> nimashqan tukruta aptash>>.

10Moisés nishqannölami runakunata akrarkur amalecita runakunawan pelyaq Josué aywarqan. Moisés, Aarón y Hurnami jirka puntaman wisäyarqan. 11Moisés rikrankunata joqariraptinmi Israel runakuna amalecita runakunata vinciyaq. Rikranta Moisés utikar bäjasiptinnami amalecita runakuna vinciyaq. 12Sayno utikaptinmi Aarónwan Hur rumita churapäyarqan Moisés jamananpaq. Nirkurmi ishkanläpa Moiséspa rikranta joqariräyarqan inti jeqashqanyaq. 13Saynöpami Josué y akrashqan runakuna espädankunawan amalecita runakunata wanusir ushaykuyarqan.

14Saymi Moisésta Tayta Dios nirqan: <<Mana qonqakänanpaq kay pelya kashqanta juk rölluman qelqay. Josuétana wilay amalecita runakunata lapanta ushakäsinäpaq kashqanta>>.#Deut. 25.17-19; 1Sam. 15.2-9.

15Saypitami Moisés juk altarta perqarkur jutisirqan Tayta Diosmi Bandërä nir.#17.15 Hebreo idiömachömi say juti kaykan Yahweh-nissi. 16Nirkurnami nirqan: <<Tayta Diospa contran amalecita runakuna sharkuyashqanpitami paykunawan Tayta Dios imayyaqpis pelyanqa>>.

Currently Selected:

Éxodo 17: qvhB

Highlight

Copy

Compare