Éxodo 16

Manáta y codornizta Tayta Dios kamaripashqan

1Elim partipita aywakurmi Sin niyashqan sunyaq jirkaman Israel runakuna chäyarqan. Say kaykan Elimpita Sinaíman aywaqchömi. Sayman chäyarqan Egiptupita yarquyashqanpita juk killa mas chunka pisqa junaqtami. 2Say sunyaq jirkachömi Israel runakuna Moiséspa y Aarónpa contran sharkur 3niyarqan: <<Egiptulachöna Tayta Dios wanusimash alimi kanman karqan. Saychöqa pacha juntami mikurqansi. Aysapis mankansikunacho manami pishirqansu. Qamkuna mikanaypita wanusiyämänaykipaqmi kay sunyaq jirkaman pushayämashkanki>>.

4Sayno niyaptinmi Moisésta Tayta Dios nirqan: <<Jana pasapitami mikuyta imayka tamyatanöraq shikwasimushaq.#Juan 6.31. Sayta runakuna waran waran shuntayäsun say junaq mikuyänanpaq tupuylata. Nishqä tupula shuntayaptinmi musyashaq cäsukayämashqanta. Nishqäpita masta shuntayaptinmi isanqa musyashaq mana cäsukayämashqanta. 5Soqta kaq junaqchöqa ishkay junaq mikuyänanpaqtano shuntayanqa>>.

6Saymi Moiséswan Aarón Israel runakunata niyarqan: <<Kanan tardimi musyayanki Egiptupita kikin Tayta Dios jorqayämushushqaykita. 7Saynölami waray tutapis Tayta Dios munayyuq kashqanta rikayanki. Pay musyanmi contran parlaykäyashqaykita. ¡Noqakunapa conträ parlayänaykipaqqa pitaq kayä!>>

8Mastapis Moisés nirqan: <<¿Imanirtaq conträ parlaykäyanki? Manami noqakunapasu conträ parlaykäyanki, sinöqa Tayta Diospa contranmi. Paymi musyan contran sharkuyashqaykita. Sayno kaptinpis kanan tardimi mikunansipaq aysata kamaripämäshun. Waray tutanami mikuyta kamaripämäshun>>.

9Nirkurmi Aarónta Moisés nirqan: <<Tayta Dios wiyashqami Israel runakuna contran parlayashqanta. Kanan Israel runakunata wilay Tayta Diospa nawpanman shuntakäyänanpaq>>.

10Israel runakunata Aarón parlapaykaptinmi sunyaq jirkalächo Tayta Diospa chipipiyninta pukutaycho rikayarqan.

11Moiséstami Tayta Dios nirqan: 12<<Wiyashkämi Israel runakuna conträ parlaykäyashqanta. Kanan paykunata wilay: <Tardipami aysata mikuyankipaq. Tutapanami pachayki juntashqanyaq mikuyta mikuyankipaq. Saynöpami musyayankipaq Tayta Diosniki kashqäta> >>.

13Say tardimi aska codornizkuna Israel runakunapa campamentun kashqanman juntarqan. Pasa wararkuptinnami campamentu nawpankunapapis yuraqayparaq shulyash warämurqan.#Núm. 11.31-32. 14Shulya sakirkuptinnami imayka rashta niraq pampacho karqan. 15Sayta rikar Israel runakuna ima kashqantapis manami musyayarqansu. Saymi jukninpis jukninpis <<¿imaraq kay?>> niyarqan.#1Cor. 10.3.

Saymi Moisés nirqan: <<Kay kaykan Tayta Dios kamaripämashqansi mikuymi. 16Tayta Diosmi nish: <Cada junaq mikuyänaykipaq tupula shuntayanki. Aykaqpis tolduykicho kayashqaykipita cada ünuykipaq ishkay caldu mati juntatanöla shuntayanki> >>.

17Say nishqannölami Israel runakuna shuntayarqan. Saymi walkaqla karqa walkalata shuntayarqan y askaq karqa askata shuntayarqan. 18Matiwan tupuylapami shuntayarqan. Askata shuntayaptinpis manami pusurqansu. Walkalata shuntayaptinpis manami pishirqansu.#2Cor. 8.15. Cada ünun shuntayarqan say junaq mikuyänanpaqtanölami.

19Saymi Moisés nirqan: <<Ama mayqaykipis waraypaqqa mikuyta pusüsiyankisu>>.

20Sayno nikaptinpis wakinqa mana cäsukurmi waraynin junaqpaq mikuyta pusüsiyarqan. Say pusüsiyashqan mikuyta waraynin junaq rikaykuyänanpaqmi pasaypa kurush asyaykänaq. Saymi mikuy pusüsiqkunata Moisés fiyupa olqutuparqan.

21Saypitaqa mikuyta ushayänanpaq tupulanami cada tuta jukninpis jukninpis shuntayarqan. Mana shuntashqan kaqtaqa shanaymi sulurasiq. 22Soqta kaq junaqchömi isanqa ishkay junaq mikuyänanpaq shuntayarqan. Saymi cada ünunpaq chusku mati juntata shuntayarqan. Sayno shuntayaptinmi mayor runakuna aywayarqan Moisésta wilayänanpaq. 23Saymi Moisés nirqan: <<Sayno shuntayänanpaqmi Tayta Dios nish. Waray junaqqa Tayta Diosta adoranansipaq jamay junaqmi kaykan.#Éxo. 20.8-11. Saymi yanukuyänaykipaq kaqta waraypaqwan yanukuyanki y timpusiyänaykipaq kaqtapis kananlana timpusiyanki. Pusuq kaqtaqa churayanki waraynin junaq mikuyänaykipaq>>.

24Moisés nishqannölami yanukurir churayarqan waraynin junaq mikuyänanpaq. Waraynin junaq rikaykuyänanpaq say churayashqan mikuy manami kururqansu ni asyarqansu.

25Saypitanami Moisés nirqan: <<Kanan junaq Tayta Diosta adoranansipaq jamay junaqmi kaykan. Saymi qanyan churayashqayki mikuylatana mikuyanki. Mikuy shuntaq yarqurpis manami imatapis tariyankisu. 26Soqta junaqlami shuntayänaykipaq mikuy kanqa. Qanchis kaq junaqchöqa jamay junaq kaptin manami imatapis tariyankisu>>.

27Sayno nikaptinpis wakin runakuna jamay junaq mikuy shuntaq yarqur manami imatapis tariyarqansu. 28Saymi Moisésta Tayta Dios nirqan: <<¿Imayyaqta mandamientükunata y leynïkunata cäsukuyankisu? 29Ama qonqäyaysu jamay junaqcho jamayänaykipaq nishqäta. Jamay junaqpaqwanmi soqta kaq junaqcho mikuyta kamaripaykä. Saymi qanchis junaqchöqa maypapis mana yarquylapa jamapäyanki>>.

30Sayno niptinmi qanchis kaq junaqcho lapan runakuna jamayarqan.

31Israel runakuna shuntayashqan mikuy karqan culantrupa murunnömi. Isanqa say mikuy yuraqmi karqan. Say mishkirqan abëjapa mishkinwan rurash tantanömi. Saytami Israel runakuna maná niyarqan.#Núm. 11.7-9. 32Saypitanami Israel runakunata Moisés nirqan: <<Tayta Diosmi nin: <Qamkunapita miraqkuna rikayänanpaq ishkay matitano manáta churayay. Saynöpami paykuna reqiyanqa Egiptupita jorqamur sunyaq jirkacho kamaripashqä mikuyta> >>.

33Nirkurmi Aarónta Moisés nirqan: <<Ishkay mati tupuyta juk canastaman manáta winarkur Tayta Diospa nawpanman churay.#Heb. 9.4. Saycho churaranqa Israel runakunapita miraqkuna reqiyänanpaqmi>>.

34Saymi Moisésta Tayta Dios nishqannöla canastaman manáta winarkur Pactu Babul nawpanman Aarón churarqan. 35Canaánpa lindërunman chäyashqanyaqmi chusku chunka (40) watantin Israel runakuna manáta mikuyarqan.#Jos. 5.12.

36Ishkay mati manáta canastaman winashqanqa ishkay kïlunömi karqan. Say tuputami gomer niyaq.

Currently Selected:

Éxodo 16: qvhB

Highlight

Copy

Compare