1 Corintios 1
1
Carta qalaykunan
1Jesucristupa apostolnin kanäpaq Tayta Dios qayamash kaptinmi noqa Pablo wawqinsi Sósteneswan cartakaykäyämü.
2Corinto markacho#Hech. 18.1. Tayta Dios kuyashqan yärakuq mayikuna: Qamkunapaqmi Tayta Dios kayno nirqan: <<Paykunaqa Jesucristucho santumi kaykäyan>>. Sayno kayaptikimi qayayäshushkanki pay munashqanno santu kawayänaykipaq. Saynölami maycho täyaptinpis payman lapan yärakuqkunata qayash. Saymi Jesucristuqa paykunapapis y noqansipapis Señorninsi kaykan. 3Papäninsi Tayta Dios y Señor Jesucristo kuyapäyäshushpayki ali kawayänaykipaq yanapaykuyäläshunki.
Tayta Diosta Pablo agradëcikushqan
4Tayta Diostami qamkunapaq imaypis agradëcikü. Jesucristuwan juklaylano kayaptikimi kuyapäyäshushpayki imaypis yanapaykäyäshunki. 5Lapanchöpis yanapäyäshuptikimi tantiyaykäyanki y ali wilakuykäyanki. 6Jesucristupa wilakuyninta chaskikuyänaykipaq yanapäyäshushqaykinölami kananpis yanapaykäyäshunki. 7Saymi Señor Jesucristo kutimushqanyaq shuyakuyaptiki ima yachaynikikunapis pishïyäshunkisu. 8Paymi yanapaykäyäshunki kutimur pay munashqanno kawaykaqta tariyäshunaykipaq. 9Tayta Diosqa promitishqanta imaypis cumplinmi. Paymi Surin Señorninsi Jesucristuwan juklaylano kawayänaykipaq qayayäshushkanki.
Juk shonqula kawayänanpaq yachasishqan
10Wawqi panikuna, Señor Jesucristupa jutinchömi qamkunata ruwä mana chikinakuypa juk shonqula y say yarpayla kawayänaykipaq. 11Paninsi Cloé ayllukuna shamurmi wilayämash kikikikunapura chikinakur rimanakur kawaykäyashqaykita. 12Wakinnikishi noqata qatiräyämashqaykita nikäyanki, wakinnikishi Apolusta#Hech. 18.24. qatiräyashqaykita nikäyanki, wakinnikishi Cefasta#1.12 Cefasqa Pedrupa jukaq jutinmi karqan. qatiräyashqaykita nikäyanki y wakinnikinashi Jesucristuta qatiräyashqaykita nikäyanki.
13Sayno nirqa lutantami nikäyanki. ¿Jesucristuqa askaman rakikashsuraq kaykan? ¿Noqasuraq qamkuna rayku cruzcho wanushkä? ¿Noqapa jutïchösuraq bautizakuyashkanki? 14Tayta Diostami agradëcikü qamkuna kaqcho kar Crisputawan#Hech. 18.8. Gayulata#Hech. 19.29; Rom. 16.23. bautizashqäpita. 15Sayno kaptin manami mayqaykipis niyankimansu noqapa jutïcho bautizakuyashqaykita. 16Saynöpis Estéfanaspa#1Cor. 16.15. ayllulantami bautizashkä. Saypita mastaqa manami pitapis bautizashqäta yarpaqsu. 17Manami runakunata bautizar purinäpaqsu Jesucristo kachamash, saypa trukanqa ali wilakuyninta wilakur purinäpaqmi. Wilakuyninta wilakurqa manami yachaq kashqäta runakuna yarpäyänanpaqsu wilakü. Yachaq tukur wilakurqa Jesucristo cruzcho wanushqantami manakaqman churäman.
Jesucristupa wilakuyninta chaskikuqkunata Tayta Dios salvashqan
18Jesucristo cruzcho wanushqanta wilakuptïmi infiernuman qaykush kayänanpaq kaqkunaqa niyan manakaqkunata wilakushqäta. Sayno niyaptinpis salvash kaqkunapaqqa say wilakuy Tayta Diospa poderninmi kaykan.#Rom. 1.16. 19Tayta Diospa palabranchöpis kaynömi qelqaraykan:
<<Yachaq runakunapa yarpayninkunatami upatakäsishaq.
Tantiyakuqkunapis mana tantiyakuyänanpaqmi kamakäsishaq>>.#Isa. 29.14.
20Sayno kaptinqa yachaqkuna yachayashqanpis ¿imapaqtaq välin?#Job 12.17; Isa. 19.12. Ley yachasiqkuna yachayashqanpis ¿imapaqtaq välin? Kay pasacho yachaqkuna apänakushqanpis ¿imapaqtaq välin? Jesucristuta mana chaskikuq runakuna yachayashqanpis Tayta Diospaq manakaqlami kaykan.#Isa. 44.25. 21Paymi yachaq kar kamakäsirqan runakuna yachaq kayninwan payta mana reqiyänanpaq. Saymi wilakuynin manakaq kashqanta yarpäyaptinpis wilakuyninta chaskikuqkunataraq salvan.
22Israel runakunaqa Jesucristuta chaskikuyänanpaq milagrukunataraqmi rikayta munayan. Griego runakunanami yachaqkuna niyashqanno Diospa wilakuynin kananta munayan. 23Sayno munayaptinpis noqakunaqa Jesucristo noqansi rayku cruzcho wanushqantami wilakuyä. Sayno wilakuyaptïmi Israel runakuna rabyakuyan.#1.23 Israel runakuna yarpäyarqan Dios kachamushqan Cristo imayyaqpis mandaq kananpaq kashqantami. Wanushqanta wilakuyaptinmi rabyakuyarqan. Mana Israel runakunanami manakaqkunata wilakuyashqäta yarpäyan. 24Tayta Dios qayashqan kaqkunami isanqa Israel runa karpis mana Israel runa karpis tantiyakuyan Jesucristo Tayta Diospa podernin y yachaynin kashqanta.#1.24 Jesucristo Tayta Diospa podernin kashqanta nirqa Jesucristuta chaskikuqkunata Tayta Dios munayninwan salvashqantami nikan. Jesucristo Tayta Diospa yachaynin kashqanta nirqa Jesucristo cruzcho wanushqanpita payta chaskikuqkunata Tayta Dios salvashqantami nikan. 25Saymi wilakuyashqä upa runakunalapaq kashqanta yarpäyaptinpis yachaq runakunapa yarpayninpita mas ali kaykan. Saynömi Jesucristo cruzcho wanushqanta manakaqman churayaptinpis payman yärakuqkunataqa Tayta Dios munayninwan salvaykan.
26Wawqi panikuna, Tayta Dios qayashushqayki wisan imano kayashqaykitapis yarpäyay. Qamkunaqa juk ishkaylami yachaq kayarqayki, juk ishkaylami munayyuq kayarqayki y juk ishkaylami rïcu kayarqayki. 27Mana yachaq kayashqaykita runakuna yarpäyaptinpis qamkunatami Tayta Dios akrayäshushkanki yachaqkuna tantiyakur penqakuyänanpaq. Saynölami munayniynaq kayashqaykita yarpäyaptinpis Tayta Dios akrayäshushkanki munayyuq runakuna tantiyakur penqakuyänanpaq.#1.27 Manami yachaq kayashqanpitasu ni munayyuq kayashqanpitasu runakunata Tayta Dios salvan, sinöqa Jesucristuman yärakuyashqanpitami. Sayta tantiyarmi runakuna penqakuyanqa yachaq kayashqanman y munayyuq kayashqanman atiënikuyashqanpita. 28Manakaqman churayashqan runakunata salvananpaq Tayta Dios sayno akraptinmi musyansi pipis yachaq kayninpaqa ni munayyuq kayninpaqa mana salvakunanpaq kashqanta. 29Sayno kaptinqa Tayta Diospa nawpancho manami pipis alabakunqasu.
30Qamkunataqa Jesucristucho kayänaykipaqmi Tayta Dios salvayäshushkanki. Noqansi raykumi Jesucristuta Tayta Dios churarqan yachayninsi kananpaq, salvamaqninsi kananpaq, perdonamaqninsi kananpaq y rantimaqninsi kananpaqpis. 31Sayno kaykaptinqa ama alabakushunsu. Tayta Diospa palabranchöpis kaynömi qelqaraykan: <<Pipis alabakunanpa trukanqa Tayta Diosta alabasun>>.#Jer. 9.23-24.
Currently Selected:
1 Corintios 1: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.