Ebereus 1
1
Deus tse babata.
1Tapara Deus taparaktsa bo ziknapamykysoko iharere ziwabykynaha. Hawa hatsa myzotsa Sudeutsa bo ziknapamykysokonaha. Deus sohokotsa taparaktsa bo iharere ziknatsasokonaha. 2Abaka Deus tatse mybo zipeha, atahi Deus harere mybo motsasoko. Atahi mybarawy nizukni Deus harere eze. Deus isuknihibyize ipe:
— Mybarawy tsizubarẽna abo nyny my — niy. 3Atahi imysapyrẽnikita my. Atahi imykyzonikita my. Deus wata my, hawa Deus mykara mymywatawyky. Iharere humo mybarawy ezektsa bo pisapywyky. Mybarawy iharere humo wasani mykara. Atahi mysapyzeky nihyrikosokda iwaze mymysapybyitsa tsikykaranaha tsimoewynahaze atahi mymyokzohik. Iwaze bijoikpe bo nido. Deus humo ba hawa tohi zikaha ibaze tadyhy. Deus tihi:
— Kapanuryk taba dyhyty — niy.
Deus tse bijoikpe iknyktsitsa ahatsa soho.
4Atahi taparakta my. Bijoikpe iknyktsitsa Deus tsumuẽhĩtsitsa simysapyrẽtsa maha atakta tsimysapyrẽta babata my. Deus bijoikpe iknyktsitsa soho — Ikiahatsa katsumuẽhĩtsitsa tsimaha — my.
Deus ipe niy: — O katse babata tsimy — my 5Ba bijoikpe iknykta soho Deus ipe: — Ikia katse tsimy. Aba azo mozik — niy.
Ana harere ty hi batu tyso. Iwaze tihi: — Ikia kape kazo asopyk.
Utakta ipe katse my — niy.
Anaharere batu bijoikpe iknyktsa bo ziky.
6Iwaze Deus tse babata estuba zubata mybarawy bo zipehaze Deus tihi:
— Bijoikpe iknyktsitsa sizubarẽtsa katsumuẽhĩtsitsa ibo mynasakibazikiknahaktsa!
“Ikiakta tsamysapyrẽta. Ahumo mykurẽtsa hỹ” tsimaha — niy.
7Deus harere papeu humo bijoikpe iknyktsa soho botu ziwatahakanaha.
— Bijoikpe iknyktsitsa katsumuẽhĩtsitsa maha.
Mysipehaze aidytsa mykaranaha zopok waha.
Deus harere bo ma mykaranaha.
Asaktsa imysapybara izo hyrity watsa — niy.
8Itse soho zuba Deus harere papeu humo tihi:
— Ikia zuba mybarawy ezektsa tysipehakakta.
Awahi abazubata tsimy.
Hawa tsimykara ba zimyi wasani tsimykara.
9Hawa ha ty tisapyrẽna hyỹ tynakara, hawa ha ty batu isapy batu hỹ tynakara.
Iwatahi Deus zawatawyhik ba iakyri tabo zikozonaha.
Atuktsa sakurẽtsa moziknaha, ikia zuba akubabata — niy.
10Deus harere niwatihi papeu humo:
— Ikia abazubata koikny bakta tu mybarawy tsikzukni.
Ikia hi bijoikpe tsikzukni wytyk tsikzukni.
11Mybarawy mopykba. Ikiakta awahi tsimynapykyk ba zikokza.
Mybarawy mysuk isapy barawa mozik.
Hawa mysuk mysykbaikze mopapykiknaha.
Anawahi mybarawy mysapybyrize mohokda.
Iwaze Deus usa mybarawy isapyzeky mozokni.
12Hawa mysuk ty zozozo tsimaha iwaze usta mysuk tsikorobyknaha.
Ikia mybarawy mopykze iwaze usa mybarawy isapyzeky mozokni.
Ikia zuba koikny baktatu astatu tsimy, ba zik tsaikba.
Awahi amysapyrẽta — niy.
13Deus bijoikpe iknykta humo batu ziky iwatahi batu ipe my:
— Kabaze dyhy ty! Kapanuryk taba dyhy ty!
Bykyze kazikwy humo asukyrytsitsa aharere bo hyỹ mykaranaha — niy.
14Bijoikpe iknyktsitsa hawa mykaranaha. Asaktsa sihyrikosotsa maha. Deus tsumuẽhĩtsitsa maha. Deus tyryktsa bo mysiakzoko, mysitsumuẽhĩnaha. Deus tyryktsa Sesus Kiristu humo simysapyrẽtsa moziknaha, iwaze sibo Deus bijoikpe iknyktsitsa mysiakzoko.
Currently Selected:
Ebereus 1: rkb
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.