Romanos 1
1
Pablo Romano Sehuosicohua'ire Toyaye
1Yë'ë Pablo, Jesucristo jo'yaë'ë. Maija'quëpi yë'ëre soini cui'ne i̱ jëjo daoquëre nepi, yë'ëre i̱ huaso cocare quëaja̱'quëre.
2Maija'quëpi ja̱ huaso coca ai tsoe ca nëoquëna, i̱re quëacaicohua'ipi i̱ de'o toya pëpëna toyaa̱huë'ë. 3Maija'quë mamaquë Jesucristo ayere Jesucristo pa̱i de'oni judío pa̱i ëjaë David tsëcapë aquë paji'i. 4Pa̱i pa'iquëta'a Maija'quë mamaquë tutu quë'ire papi asayë, i̱ de'o joyo tutupi yo'oquëna, ju̱'isiquëpi huëni i̱ñouna. 5Ja̱je pa'ina, Jesucristo do'ipi Maija'quë yëquëre i̱ mamipi i̱ jëjo daocohua'ire nepi, si'a yeja pa'icohua'ipi sehuoni cui'ne i̱ case'ere necaicohua'i pa'ija̱jë caquë. 6Mësaruje̱ ja̱ohua'i acohua'ipi Maija'quë soisicohua'i pa'iyë, Jesucristo tse̱cohua'i pa'ija̱jë caquë.
7Si'aohua'i Roma daripë acohua'i Maija'quë soisicohua'ire caquë toyayë, mësarute. Maija'quë oi soipi, mësarupi i̱na i̱sisicohua'ipi de'oye pa'ija̱jë caquë. Soisicohua'ipi de'oye pa'ijë̱'ë, Diusu Maija'quëpi cui'ne Jesucristopi de'oye pa'iye i̱siquëna.
Romana Pablo Do'i Sai Ëaye
8Du'ru macarepa Jesucristo do'ire yë'ë ja'quëre sihuayë, si'aohua'ire mësaruni cuasaquë. Mësaru Maija'quëre cuasajë pa'iye si'a hue̱'ña pa'icohua'ire de'oye quëajëna, sihuayë. Sihuaquë de'oji cayë, Maija'quëna. 9Yë'ë si'a joyorepa cuasaquë Maija'quëre necai pa'iyë, i̱ mamaquë cocarepa quëacaiquëpi. Maija'quë api, i̱ti ñasiquë si'anë yë'ë mësarute cuasaquë se̱cacaiye. 10Si'anë Maija'quëre se̱ñë, i̱ yëyepi pa'ina, yë'ë ja̱ro do'i sasi'i caquë. 11Ja̱je pa'ina, co̱caiye yëyë, mësarute joyo pa'iye, ai jerepa tutu quë'iohua'i pa'ija̱'cohua'ire. 12Ñeje caquë cayë: Maija'quëre mai cuasayere sa̱'ñe co̱caiyere caquë yë'ëpi mësaru cuasayere se co̱caina, mësarupi yë'ë cuasayere co̱caijë̱'ë. Ja̱je yo'ojë sa̱'ñe co̱caiye pa'iji.
13Maija'quë do'ijë yë'ë mësaru quë'ro sasi'i si'anë caquëta'a yureje̱ ja̱ yë'ta'a saiye pa̱ñere asajë̱'ë caquë quëayë. Hueare tëayeje̱ pa'ye mësaruja̱'a Maija'quë joyo ayere sani tëasi'i caquë cuasahuë, yequë hue̱'ña judío peocohua'ija̱'a tëayeje̱ pa'ye. 14Ja̱je pa'ina, yë'ë sehuosi do'ire ta̱ñe asacohua'ire, huesëcohua'ire, ëjaohua'ire cui'ne ëjaohua'i peocohua'ire, si'aohua'ire quëaye pa'iji. 15Ja̱je yo'oquë cui'ne mësaru Roma pa'icohua'ireje̱ Maija'quë coca quëacaiye yëyë.
Maija'quë Coca Tutu Quë'i
16Maija'quë huaso coca quëaye yë'ëre huajëya'ye nëiñe pa̱ji. ¿Maija'quë tutu quë'i cocarepa me yë'ëre huajëya'ye nëico'ni? Si'aohua'ire i̱te sehuocohua'ire huaso ja̱'ñe a'ë, judío pa̱ire cui'ne judío pa̱i peocohua'ireje̱. 17Ja̱je pa'ina, necaire paye pa'iji cuasa do'ire Maija'quëpi nuñerepa pa'icohua'ire neñere quëaji, de'o cocapi: “Nuñerepa pa'iquë cato, Maija'quëpi necaire paye pa'iji cuasayepi pasipi” caji tsoe toyase'e.
Do'i Quë'iohua'i Pa'iye
18I̱ohua'i co'aye yo'oyepi Maija'quë coca ye'yayere sa̱ñope yo'oyë. Ja̱je yo'osicohua'ire Maija'quëpi ma'tëmore papi i̱ohua'i yo'osi do'i co'ayere papi sa̱i ja̱'ñe jëjo dao ja̱'ñere i̱ñopi, maire. 19Ja̱ohua'i tsoe asayë, ta̱'ñe Maija'quë ayere. Ja̱je pa'ina, i̱pi ja̱ohua'ire du'ru i̱ñopi, i̱ ayere ña ja̱'ñe. 20Si'aye iye yeja pa'iye i̱pi de'huapi. I̱ de'huani pa'i macapi huëoni i̱ nese'ere ñajë Maija'quë pa'iye asayë, i̱te ñama'pë pa'inije. Ja̱je pa'ina, Maija'quë tutu quë'ipi cui'ne ti pani huesëquë pa'iye asajëta'a de'oye yo'oye pa̱si do'ire, ca de'huani jëa ti̱'añe peoji, ja̱ohua'i. 21Ja̱je Maija'quë pa'iye asacohua'ipi Maija'quëre papi cajë i̱te oiye pa̱huë. Cui'ne yequeje̱ de'oquëre papi caye pa̱huë. Coa ai jerepa yeque ti do'i peoyere cuasahuë. Cui'ne i̱ohua'i huesë joñoapi nea hue̱'ñana ne huesëhuë, co'a joñoa hue'e do'ire. 22Ja̱je pa'ina, ta̱'ñe pa'iohua'i a'ë cacohua'ita'a coa ai jerepa huesëohua'i pa'iyë. 23Maija'quë de'oquërepa pa'iquëta'are ti̱ñere se̱ñë, ju̱'icohua'ije̱ pa'iohua'ire de'huase'ere, pa̱ije pa'ire, pi̱'aje pa'ire, nëicohua'ije̱ pa'ire cui'ne a̱ñaje pa'ire de'huase'ere.
24Ja̱je pa'ina, se̱ñajë mësaru yëyeje̱ yo'ojë pa'ijë̱'ë caquë je̱ocopi, Maija'quë. Ja̱je caquë je̱ocouna, huajëya'ye sa̱'ñe yo'ohuë, i̱ohua'i ca̱pëje̱ ti oiye peoyerepa. 25Nuñerepa Maija'quë cocare asaye yëma'pë coa ai jerepa cosoyere asahuë. Cui'ne ja̱je yo'ojë Maija'quë de'huasi co'amañare se̱i'ë, de'oquëre pa'ë cajë. Maija'quëre pare se̱ma'pë cui'ne Maija'quëre pa'ë caye pa̱huë. Maija'quë cato ti de'oquëre pa'ë caye pa'iji, si'anë. Ja̱je pa'ija̱quë.
26Ja̱je pa'ina, Maija'quëpi je̱ocopi, co'aye si'sire yëcohua'ini coequë. Ja̱je pa'ina, nomiohua'ije̱ Maija'quë cua̱ñese'e je̱oni sa̱'ñe nomiohua'ija̱'a ë̱mëre yo'oyeje̱ yo'ohuë, si'si. 27Cui'ne ja̱je ë̱mëohua'ije̱ nomiohua'ire yo'oye je̱oni sa̱'ñe ë̱mëohua'ija̱'a yo'ohuë. Ë̲mëohua'ipi huajëya'ye yequë ë̱mëohua'ini yo'o do'ire i̱ohua'i ca̱pë̱api ai yo'oyë, i̱ohua'i co'aye yo'o do'ire sa̱i cua̱ñojë.
28Ja̱je pa'ina, i̱ohua'ipi Maija'quëre asaye coeye sëte, i̱je i̱ohua'ire je̱ocopi, joyo huesëohua'i pa'ijë i̱ohua'i yëyeje̱ co'ayere pa'ija̱jë, caquë. 29De'oye nuñerepa pa'iye peocohua'ipi co'ayese'epi ti̱mësicohua'ipi pa'iyë, si'si yo'oye, nomi yëye, ëa ñañe jaiye tayo yo'oye. Co'amañare ëa ñajë co'aye cuasaye, huani je̱oñe, uihuaye, cosoye, co'a merepa co'acohua'ipi cui'ne co'a coca caroja̱icohua'i pa'iyë. 30Yecohua'ini co'acohua'i a'ë cayë, Maija'quëreje̱ coecohua'i a'ë, jo̱sa yo'ocohua'i a'ë, coa pa̱ipi ne ti̱'añe pa'iji cuasacohua'i a'ë, cui'ne yë'ëpi jerepa pa'i a'ë cuasacohua'i a'ë. Co'ayere ai jerepa se cuasa huëocohua'ipi cui'ne pëca ja'quëohua'ireje̱ de'oye sehuoma'cohua'i a'ë. 31Yëhuoye asa ti̱'añe coecohua'i a'ë. I̱ohua'i ca nëose'eje̱ yo'o ti̱'ama'cohua'i a'ë. I̱ohua'i sihuama'cohua'i a'ë. Yecohua'ireje̱ sa̱ñope yo'ose'ere sa̱i de'huama'cohua'i a'ë. Ai yo'ocohua'ire teaye pa'iohua'ire yecohua'ire ñama'cohua'i a'ë. 32Ja̱ohua'i cato Maija'quë cua̱ñese'e si'aye asacohua'i a'ë. Cui'ne asacohua'i a'ë, iye yo'osicohua'i pani do'i quë'iohua'ipi pa'ijë ju̱ni huesëye pa'iji case'eje̱. Ja̱je asacohua'ita'a ai jerepa co'ayere yo'ojë pa'iyë. Cui'ne yecohua'ipi co'aye yo'ojëna, sihuajë yëjë ñañë.
Currently Selected:
Romanos 1: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.