2 Pedro 1
1
Pedro Toya Co̱se'e Hua Saicohua'ina
1Yë'ë, Simón Pedropi iye toya ja'hua toyayë, mësaruni caquë, Jesucristo jo'yaëpi i̱ jëjo daoquëpi. Maija'quë nuñerepa yo'oquëpi cui'ne Jesucristo pa̱ire huasoquëpi, yëquë cuasayeje̱ pa'ye Maija'quë pa'iji cuasayere de'oyere pare cuasa ti̱'añe i̱sisicohua'ina toyayë. 2Maija'quë coa i̱siye cui'ne jo'cua de'oye pa'iyepi mësarute jerepa pa'ija̱quë, mai Ëjaë Jesucristore cui'ne Maija'quëre mësaru cuasa ti̱'a do'ipi.
Cristore Tuicohua'i Yo'oye
3Maire Maija'quëpi soipi, i̱ jerepa pa'iyepi cui'ne i̱ de'oyerepa yo'oyepi. Ja̱je pa'ina, Maija'quëpi i̱ tutupi maire i̱sipi, si'aye caraye peoyerepa, nuñerepa de'oyerepa yo'ojë pa'i ja̱'ñere, i̱te mai cuasayepi. 4Ja̱ co'amaña do'ija̱'a jaiye i̱ ca nëose'e ai de'oyere pare jai do'ire maina i̱sipi, maipi iye yeja pa̱i ëaye nëiñepi co'a de'oyena sayere cati saisicohua'ipi pa'ijë i̱ pa'iye ayere ti̱'ani pa'ija̱jë caquë. 5Ja̱je pa'ina, mësaru ai se̱ña maca payere cajë tutu yo'oye pa'iji. Ja̱je pa'ina, mësaru Maija'quë pa'iji cuasayepi de'oyese'e yo'oyere se mëojë'ë. De'oyese'e yo'oyepi ta̱'ñe cuasayere se mëojë'ë. 6Ta̱'ñe cuasayepi yëyere co'ye quëco ti̱'añere se mëojë'ë. Yëyere co'ye quëco ti̱'añepi yo'o jujama'pë quëcoyere se mëojë'ë. Yo'o jujama'pë quëcoyepi nuñerepa cuasayese'e se mëojë'ë. 7Nuñerepa cuasayepi Maija'quë do'ijëre oiyere se mëojë'ë. Maija'quë do'ijëre oiyepi, si'aohua'ire pa̱ire oiyere se mëojë'ë.
8Ja̱je mësarupi iye co'amañare pajë se mëoto mësaru pa'iye do'i quë'ye pasipi, coa pa'iye peojë. Cui'ne mësaru Cristore cuasase'ere se mëoñe pa'iji. 9Ja̱je pa'iquëta'are iye co'amañare peoquë cato ñama'quëje̱ pa'i api. Pa̱nita'a ñaco poreije̱ pa'i api. I̱ ja̱'në co'aye yo'ose'e tsoa to̱caise'ere hua̱nëyesiquë api. 10Ja̱je pa'ina, Maija'quë do'ijë, mësarute Maija'quë sahuani i̱ tse̱cohua'ire nese'ere i̱ñoñu'u cajë ai cuasajë yo'ojë̱'ë. Mësarupi ja̱je yo'oni co'aye yo'oyena ta̱iñe ti pa̱ja'cohua'i a'ë. 11Ja̱je cui'ne maire huasoquë Jesucristo cua̱ñe te̱'tepi mai cacaja̱'a eta sa'ro jaicorepa hui'yocaisicopi pa'ija̱'coa.
12Ja̱je pa'ina, mësarupi ta̱'ñe cuasajë nuñere pare o̱cue pa'i macarepa pa'itoje̱ ja̱ yë'ta'api yë'ë cato mësarute ca sëtoquë pasi'i si'aye mësarute ye'yase'ere. 13Ja̱je pa'ina, yë'ë cato iye nuñere pa'ë cuasayë. Ja̱ yë'ta'a yë'ë huajëquë pa'i maca cato mësarute yëhuo sëtoquë pasi'i caquë. 14Ja̱je pa'iquëta'are mai Ëjaë Jesucristopi yë'ëre quëa i̱ñopi, më'ë esa iye yeja pa'iye je̱oja'quë a'ë caquë. 15Ja̱je pa'ina, yë'ë ju̱'isi jeteyo'je yë'ë ca sëtosi co'amañare si'anë cuasa cua̱ñoñe pa'ija̱quë caquë, yë'ë ai cuasaye ja'ye yo'oyë.
Mai Ëjaë De'oyere Ñañe
16Mai Ëjaë Jesucristo daiye cui'ne i̱ tutu quë'irepa pa'iyere yëquë mësarute quëase'e pa̱ise'e coa cuasa huëose'ere quëaye pa̱huë. Yëquë ñaco ca̱re papi jerepa pa'i pa'ina, ñase'ere quëahuë. 17Cui'ne yëquëpi i̱te ñajë cui'ne asahuë, Maija'quëpi Jesure de'oquëre pani, jerepa pa'ini sihuaquë ma'tëmopi de'o yë'orepa “iquë api, yë'ë mamaquë, yë'ë oiquërepa. I̱ni ai sihuaquë pa'iyë,” caquëna. 18Ja̱je asahuë, ma'tëmopi yë'ose'e Maija'quë caye jutaquëna, jeto de'o cu̱tihuëre Ëjaë ja̱'re co̱ni pa'i maca.
19Ja̱je cui'ne payë, maire jerepa care paye necai cocaje̱. Ja̱ cato Maija'quëre quëacaicohua'i toyajë pa'ise'ere cayë, ja̱re mësaru de'oyerepa asacaiye pa'iji, toa tsë̱o pë ñami miacaiyeje̱ pa'ye mësarute miacaiyere. Ja̱je miacai pasipi, mësaru joñoana, ñata ma'ñocore papi miacaiye ti̱'a macaja̱'a. 20Ja̱je pa'ina, mësaru cato cuasaye pa'iji. Maija'quë coca toyase'e cato pa̱i quëase'e peoye a'ë. 21Ja̱je pa'ina, Maija'quëre quëacaicohua'i cato i̱ohua'i cuasayepi huëojë caye pa̱'ahuë'ë. Coa ai jerepa Maija'quë joyopi quëaquëna, Maija'quë yëyere ca'a̱huë'ë.
Currently Selected:
2 Pedro 1: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.