1 Timoteo 1
1
Pablo Toyase'e, Timoteona
1Yë'ë Pablo, Jesucristo jëjo saoquë a'ë, maire huasoquë Diusu cua̱ñeñepi, cui'ne mai Ëjaë Jesucristo mai utejë pa'iquëpi. 2Maija'quëre pa'ire paji cuasa do'ire yë'ë mamaquë a'ë, më'ë. Ja̱je pa'ina, iye toya ja'hua toyayë, Timoteo më'ëre. Maija'quëpi cui'ne mai Ëjaë Jesucristopi co̱ni më'ëre de'oye necaijë, teaye ñani oiyere, cui'ne jo'cua de'oye pa'iyere i̱sija̱jë.
Tayo Ye'yase'ere De'hua Ñañe
3Nuñerepa ye'yama'pë tayo ye'yacohua'ire më'ëpi, ja̱je ye'yama'pë pa'ija̱jë caquë ja̱ohua'ire yëhuoja̱quë cuasani Efeso daripëna pëajë̱'ë, cua̱ñehuë, yë'ë ja̱ yë'ta'a Macedonia saima'në. 4Aipë coca co̱caiye pa̱ji, Maija'quë pa'ire paji cajë asa ti̱'añe. Ja̱je pa'ina, aipë coca cui'ne aiohua'i pa'ise'e co'ye ye'yama'pë pa'ija̱jë ja̱ohua'i. Ja̱ cato sa̱'ñe pë̱ti coca caye a'ë.
5Yë'ë cato, de'o joyore papi, de'oye cuasayere papi, cui'ne Maija'quë pa'iji nuñerepa asayepi, pa̱i ñape yecohua'ire oijë pa'ija̱jë caquë cua̱ñeñë, iye. 6Iyere yecohua'i yo'oma'pë tayo sani coa cocase'e cacohua'i de'ohuë. 7Ja̱je tayo saicohua'ipi pa̱ire Maija'quë coca ye'yacohua'i pañu'u, cajë. Yo'ojëta'a huesëyë, i̱ohua'i cayeque. Cui'ne asa ti̱'ama'pë pa'iyë, i̱ohua'i care payë cajë ye'yayere. Ja̱je pa'ina, nuñerepa ye'yayë, cuasajë tayoyë.
8Maija'quë Moisésre cua̱ñese'e de'oye a'ë, i̱ti cayeje̱ pa'ye ye'yato. Tayo ye'yatota'a co'aji. 9Ja̱je pa'ina, Maija'quë cua̱ñese'e de'oye yo'ojë pa'icohua'ini caquë pa'iye pa̱ji. Cua̱ñese'e cato, co'acohua'i asa ja̱'ñepi pa'iji. Ja̱ohua'i cato Maija'quëre sa̱ñope yo'ocohua'ipi, cua̱ñese'ere sehuoma'cohua'ipi, si'si yo'ocohua'ipi, yo'o ma'ñere yo'ocohua'ipi, cui'ne Maija'quëre Ëjaëre papi cama'cohua'ipi, coa si'aye Maija'quëre ti̱'añu'u cajë yo'oyere cue'cuecohua'ipi, ja'quëohua'ire huaicohua'ipi, pa̱ire huaicohua'ipi, 10yëquë nomiore, pa̱nita'a yeco ë̱mëre yo'ocohua'ipi, ë̱mëohua'ija̱'a sa̱'ñe yo'ocohua'ipi, pa̱ire tse̱ani yecohua'ina i̱sicohua'ipi, cosocohua'ipi cui'ne care payë cajë coa cosocohua'ipi, cui'ne de'o cocare sa̱ñope cacohua'i asa ja̱'ñepi pa'iji, Maija'quë cua̱ñese'e. 11Maija'quë de'oquëpi iye de'o cocare huaso cocare pare yë'ëpi quëacaija̱quë caquë cua̱ñe nëopi.
Maija'quë Teaye Ñani Co̱caise'e
12De'oji, caquë pëpayë, mai Ëjaë Jesucristore, i̱ co'amaña yë'ëpi tayoma'ë nuñe neja'quë api, caquë tutu i̱siquë, i̱te necaiquëre nesiquëre. 13Yë'ë cato ja̱'në Jesure sa̱ñope caquë, sehuosicohua'ire tse̱aquë, cui'ne co'aye caquë yo'oquë paë'ë. Pa'ina, sehuoma'quëpi huesëquë yo'oji cuasani Maija'quëpi yë'ëre teaye ñani oi co̱caji'i. 14Ja̱je yo'oni mai Ëjaëpi yë'ëre jaiye de'oyere i̱sipi, Maija'quë pa'ire paji cuasayere cui'ne pa̱ire oiyere Cristo Jesús ja̱'re tsioni pa'ijë, mai payere.
15Nuñerepa caye a'ë, Cristo Jesús co'acohua'ire huasosi'i caquë iye yejana daise'ere, si'aohua'i asaye pa'iji. Ja̱je pa'ina, yë'ëre ai jerepa co'aquëni huasopi. 16Ja̱je pa'ina, Maija'quëpi yë'ëre teaye ñani oi co̱caji'i. Ja̱je pa'ina, si'aye Jesucristo yo'o juja ma'ñere i̱ñosi'i caquë yë'ëre huasopi. Ja̱je pa'ina, yure yë'ë jeteyo'je i̱te sehuoja̱'cohua'ire i̱ñoquë a'ë, ti pa'iye ti̱'aja'cohua'ire. 17Ja̱je pa'ina, Ëjaërepa de'oquëre pani ti pani huesë ëjaëre pani sihuajë pañu'u, ju̱ni huesëma'quëni, pa̱ije ñama'quëni, cui'ne te'i Diusure pani. Ja̱je pa'ija̱quë.
18Maija'quëre quëacohua'ipi ai tsoe më'ë yo'o ja̱'ñere case'eje̱ pa'ye de'oye yo'oja̱quë caquë cua̱ñeñë, Timoteo yë'ë mamaquë më'ëre. Ja̱je case'epi co̱caina, Maija'quë pa'ire paji cuasaquëni cui'ne de'oyerepa cuasaquëpi de'oyerepa yo'ojë̱'ë. 19Yecohua'i i̱ohua'i de'oye cuasajë pa'iye quëayere sehuocaima'pë yo'ojë, i̱ohua'i Maija'quë pa'ire paji cuasayere ne huesoni co'a de'ohuë. 20Ja̱je yo'ohuë, Himeneo cui'ne Alejandro. Ja̱je yo'osicohua'ini yë'ëpi Satanásna i̱sihuë, co'aye cacohua'ipi Maija'quëre co'aye caye pa̱ñere ye'yeja̱jë caquë.
Currently Selected:
1 Timoteo 1: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.