1 Corintios 16

Sehuosicohua'ire Co̱cai Curiquëre Quëaye

1Yë'ë Galilea pa̱ire Cristore sehuosicohua'ire ye'yase'eje̱ pa'ye yo'ojë̱'ë. Sehuosicohua'ire co̱cai curiquëre tsi'socohua'i pani, ñeje yo'ojë̱'ë. 2Domingo mu'seña ñape curiquë ti̱rona huajë̱'ë, pa̱i ñape mësaru nese'e sehuosicohua'ire co̱cai ja̱'ñere cajë. Huajë̱'ë, i̱ti ne'ese'e ja'i maña yë'ë saisi maca tsi'so huëoni yo'oye pa̱ja'cohua'i. Mësaruse'e du'ru tsi'sojë pa'ijë̱'ë. 3Yë'ë ja̱ro ti̱'asi maca mësaru tsi'sosi curiquë cui'ne mësaru jëjo saocohua'ire quëa toya ja'o jëjo saosi'i, Jerusalénna, sehuosicohua'ire co'amaña peocohua'ire co̱cai ja̱'ñere. 4Yë'ëreje̱ sati̱'ñe pa'ire nëina, yë'ëpi saiquë pa'ito yë'ë ja̱'re sati̱'ñe pa'iohua'i a'ë, curiquë sacohua'ije̱.

Pablo Sasi'i Cuasaye

5Yë'ë ja̱ro sai maca saiye pa'iji, Macedonia yejaja̱'a. Ja̱ jeteyo'je ja̱ro Corinto yeja ti̱'aja'quë a'ë, mësaru quë'ro. 6Ti̱'ani mësaru ja̱'re ai tsoe maca pati'ñe pa'i a'ë, pa̱nita'a yeque ja̱rona si'a oco tëcahuë pëaja̱'quë pa'ini. Ja̱ maca yureta'a yequë hue̱'ña saija̱'quë a'ë. Saina, mësaru co̱cati'ñe pa'iohua'i a'ë, yë'ë sai ja̱'ñe. 7Mësarute coa sa sai ñañese'e yëye pa̱ñë. Mësaru quë'rona tsoe maca pëani pa'iyere yëyë, mai Ëjaë ja̱je yëto. 8Ja̱je pa'iquëta'are yure cato Efeso daripëna pëaja̱'quë a'ë, Pentecostés mu'se ti̱'a macaja̱'a. 9Efeso daripëna mai Ëjaë co'amaña necaiye jaiye pa'iji. Ja̱je pa'ina, jai pa̱i sehuoja̱'cohua'i a'ë, yë'ë quëa do'ipi cuasayeje̱ pa'ina, jai sa'ro hui'yocaisicoje̱ pa'iopi pa'iji, Ëjaë coca quëaja̱'a sa'ro. Ja̱je pa'iquëta'are jai pa̱i yë'ë ja̱ro saiye ë̱sejë sa̱ñope yo'oyë.

10Timoteopi ti̱'asiquë pa'ito de'oye yo'ojë̱'ë, mësaru ja̱'re sihuaja̱'quëre cui'ne co'a ju̱'iñe pa̱ja'quëre. Ja̱ëje mai Ëjaë co'amaña nequë api, yë'ë neñeje pa'ye. 11Ja̱ do'ire i̱te mësaru acohua'i te'ije̱ co'aye ñama'pë pa'ijë̱'ë. Coa ai jerepa de'oye co̱caijë̱'ë, ai yo'oye peoye dani yë'ëre ñaja'quëre. Maija'quë do'ijë ja̱'re utequë pasi'i, daina, ñasi'i caquë.

12Maija'quë do'iquëpi Apolospi mësarute sehuosicohua'i ja̱'re co̱ni sani ñajaquë caquë ai se̱ina, yure maca saiye pa̱ñë, capi. Ja̱je pa'iquëta'are yequë mu'se sani ñasipi, saiye pa'ina.

Pëpa Tëjiye

13Ca̱ise'eje̱ pa'iohua'i pa'ima'pë pa'ijë̱'ë. Mësaru Maija'quëre necaiquëre pare asayena nuñerepa tse̱asicohua'ipi pa'ijë̱'ë. Ë̲mëohua'irepa do'i quë'iohua'i pa'ijë̱'ë, tutu quë'iohua'i. 14Ja̱je pa'ina, si'aye mësaru neñe pa'ito pa̱ire oiyepi nejë'ë.

15Mësarupi Maija'quë do'ijë tsoe asayë, Acaya yeja pa'icohua'i du'ru macarepa Maija'quë coca sehuosicohua'ipi Estéfanas tsëcapëpi ja̱ohua'ipi Maija'quë do'ijëre co̱caijë pa'iyë, cajë. 16Ja̱je pa'ina, mësarute cayë. Mësarupi ja̱ohua'i cayere cui'ne si'aohua'i iye co'amaña co̱caijë necohua'i cayere sehuocaijë pa'ijë̱'ë. 17Sihuayë, Estéfanasre, Fortunatore cui'ne Acaicore mësaru peo do'ire de'hue daisicohua'ipi pa'ijë yë'ëre co̱catena. 18Ja̱je pa'ina, ja̱ohua'ipi dani yë'ëre joyo sihua ëaye quëa huasohuë. Ja̱je cui'ne mësaruteje̱ sihua ëaye joyona quëa huasosicohua'i a'ë. Ja̱je pa'iohua'ire mësarupi de'oye cuasajë sihuajë ñañe pa'iji.

19Asia yeja pa̱ipi sehuosicohua'ipi mësarute pëpa saoyë, Aquila cui'ne i̱ paco Priscila co̱ni. Cui'ne si'aohua'i ja̱ohua'i huë'ena tsi'sisicohua'ije̱ mësarure pëpa saoyë, mai Ëjaë do'ire cuasajë. 20Si'aohua'i sehuosicohua'i mësarute pëpa saoyë. De'oyere papi cuasajë sa̱'ñe su'cuajë sihuajë pëpajë̱'ë.

21Yë'ë Pabloje̱ yë'ë jë̱tëpi mësarute toyaquë pëpayë.

22Yecohua'ipi mai Ëjaë Jesucristore oima'cohua'i pani nejo cua̱ñosicohua'i pa'ija̱jë. ¡Mai Ëjaë Jesús daijë̱'ë!

23Ëjaë Jesucristopi mësarute jaiye coa i̱sija̱quë, i̱ payere. 24Si'aohua'ire mësarute yë'ë oiye jëjo saoyë, Cristo Jesure oi do'ipi. Ca tëjihuë. Ja̱je pa'ija̱quë.

Currently Selected:

1 Corintios 16: sey

Highlight

Copy

Compare