San Lucas 9
9
Umi Jesús remimbo'e omyasãi Tupã marandu ha oporomonguera
(Mt 10.5-15; Mc 6.7-13)
1Jesús ombyaty umi 12 hemimbo'e ha ome'ẽ chupe kuéra pokatu ha pu'aka omosẽ haguã opaichagua mba'epochy, ha omonguera haguã opaichagua mba'asy. 2Omondo chupe kuéra oporomomarandu haguã Tupã sãmbyhýre, ha omonguera haguã hasývape. 3He'i chupe kuéra:
--Ani peraha mba'eve tapére guarã, yvyra pende po pegua, vosa, mbujape, viru ha ao jopyru.#Lc 10.4-11. 4Oimeraẽva óga peguahẽhápe, upépe pepyta pesẽtaha árape peve. 5Ha oimérõ táva pene moguahẽse'ỹha, tapeho upégui. Peityvyro yvytĩmbo pende pýgui, ohecha kuaa haguã hikuái upéva maranduha Tupã oinupãtaha chupe kuéra.#Mt 10.14; Hch 13.51.
6Aipórõ osẽ hikuái ha oho umi tava'i rupi, omyasãi marandu porã ha omonguera hasývape.
Herodes ndoikuaái mba'épa ojapóta
(Mt 14.1-12; Mc 6.14-29)
7Mburuvicha guasu Herodes ohendu opaite mba'e oikóva, ha ndoikuaái mba'épa ojapóta, oĩgui he'íva Juan oikove jey hague. 8Ambue katu he'i, ou hague maranduhára*f** Elías, ha ambueve katu, oimeha maranduhára yma guare oikove jeýva.#Mt 16.14; Mc 8.28; Lc 9.19. 9Ha Herodes he'i:
--Cheté ha'e vaekue oñeñaka'õ haguã Juan. Máva piko aipórõ pe hetaite mba'e oñemombe'uha?
Upévare Herodes oñeha'ã ohecha Jesúspe.
Jesús omongaru hetaitereípe
(Mt 14.13-21; Mc 6.30-44; Jn 6.1-14)
10Ojevývo umi apóstol, omombe'u hikuái Jesúspe opa mba'e ojapo vaekue. Ha'e ogueraha chupe kuéra ha'eñóme peteĩ táva hérava Betsáidape. 11Ha umi tavagua oikuaávo, ohopa hapykuéri. Ha Jesús oheja chupe kuéra oguahẽ hendápe. Oñe'ẽ chupe kuéra Tupã sãmbyhýre ha omonguera hasývape. 12Ka'aru etereíguima, umi 12 apóstol oho Jesús rendápe ha he'i chupe hikuái:
--Emondo opavavépe toho topytu'u, ha toheka tembi'u umi táva ha umi oka aguĩháre. Ko'ápe niko ndaipóri véima mba'eve.
13Jesús he'i chupe kuéra:
--Peẽ voi pemongaru chupe kuéra.
Ha'e kuéra katu he'i:
--Roguereko niko 5 mbuja ha mokõi pira, ndorohói mba'érõ rojoguávo tembi'u umívape guarã.
14Oĩ niko hína 5.000 kuimba'e rupi. Ha Jesús he'i hemimbo'e kuérape:
--Pemboguapy 50 rupi aty-atýpe.
15Ha'e kuéra ojapo upéicha ha omboguapy opavavépe. 16Upéi Jesús ojapyhy ipópe umi 5 mbuja ha umi mokõi pira ha, oma'ẽvo yvága gotyo, ojerure Tupã ohovasa haguã. Upéi oipehe'ã umi mbuja ha ome'ẽ hemimbo'e kuérape omoĩ haguã opavave renondépe. 17Maymáva ho'u hyguãtã meve. Ha umi hembývagui omono'õ hikuái 12 ajaka renyhẽ.
Pedro he'i Jesús ha'eha pe Mesías
(Mt 16.13-19; Mc 8.27-29)
18Peteĩ jey, Jesús oñembo'e jave hína ha'eño, ha hemimbo'e kuéra oĩ hendive, oporandu chupe kuéra:
--Mavaha che piko oje'e?
19Ha'e kuéra he'i chupe:
--Oĩ he'íva ndeha Juan Bautista. Oĩ he'íva ndeha Elías, ha oime katu he'íva ndeha peteĩva umi maranduhára yma guare oikove jeýva.#Mt 14.1-2; Mc 6.14-15; Lc 9.7-8.
20Jesús oporandu chupe kuéra:
--Ha peẽ piko mba'e peje, mávapa che?
Ha Pedro he'i:
--Nde hína upe Mesías, Tupã rembiporavo.#Jn 6.68-69.
Jesús omombe'u omanotaha
(Mt 16.20-28; Mc 8.30--91)
21Jesús katu heta he'i hemimbo'e kuérape ani haguã omombe'u upéva avavépe. 22Ha he'i:
--Che, yvypóraicha aju vaekue, ahasa asy mante vaerã, ha ojahéita che rehe umi myakãhára, umi pa'i ruvicha ha umi Moisés rembiapoukapy mbo'eha. Che jukáta hikuái, ha mbohapy ára rire aikove jeýta.
23Upéi he'i opavavépe:
--Oime ramo che moirũséva toñembyesarái ijehegui, tohupi ára ko'ẽre ikurusu ijapére, ha ta che moirũ.#Mt 10.38; Lc 14.27; Jn 12.24. 24Pe hekovére hakate'ỹva, omanóta. Pe omanóva che rehehápe katu, oikovéta.#Mt 10.39; Lc 17.33; Jn 12.25. 25Mba'épa oguenohẽne yvypóra oguerekopárõ opaite mba'e ipópe, térã oñehundi ramo ha'e ipo rupiete? Mba'eve! 26Oimérõ che rerotĩva ha oguerotĩva che ñe'ẽ, che avei, yvypóraicha aju vaekue, atĩne heseve kuéra, ajúvo che Ru mimbipa reheve ha Tupã remimbou*f** marangatu kuéra ndive. 27--Añetehápe ha'e peẽme, ko'ápe oĩva apytépe oĩ nomano mo'ãiva ohecha mboyve Tupã sãmbyhy.
Jesús omimbipárõ guare
(Mt 17.1-8; Mc 9.2-8)
28Upe rire, 8 ára haguépe Jesús he'i rire ko'ã mba'e, oho peteĩ yvyty ru'ãme oñembo'e haguã ha ogueraha hendive Pedro, Santiago ha Juánpe. 29Oñembo'e aja hína, hova iñambuepa ha umi ijao morotĩ sakã ha ojajaipa. 30Ha ojekuaa mokõi kuimba'e oñomongetáva hendive. Umíva Moisés ha Elías, 31omimbipáva avei hikuái ha oñe'ẽva Jesús ohotaháre ko yvy árigui, ojehútava Jerusalénpe. 32Hopehýi etereírõ jepe, Pedro ha iñirũ nguéra ndokéi, ha ohecha hikuái Jesús mimbipa ha umi mokõi oĩ vaekue hendive. 33Umi kuimba'e ohótama jave, Pedro he'i Jesúspe:
--Mbo'ehára, iporãite niko ikatúre ñaime ko'ápe. Reipotárõ ajapóta peẽme pene rendaguã, peteĩ ne mba'erã, peteĩ Moiséspe guarã ha Elíaspe guarã avei.
Pedro katu ndoikuaái pe he'íva. 34Pedro oñe'ẽ aja, ou peteĩ arai omimbipáva ha ojaho'i chupe kuéra. Ha ojechávo pe arai apytépe, okyhyje hikuái. 35Pe araígui oñehendu peteĩ ñe'ẽ ha he'íva: “Kóva ha'e che Ra'y, che aiporavo vaekue. Pehendu chupe”.#2 P 1.17-18.,#Is 42.1; Mt 3.17; 12.18; Mc 1.11; Lc 3.22. 36Oñehendúvo upe ñe'ẽ, Jesús opyta ha'eño. Ha ha'e kuéra oguerokirĩ umi mba'e, ha umíva umi árape avavépe nde'íri umi mba'e ohecha vaekue.
Jesús omonguera peteĩ mitãrusu imba'e pochývape
(Mt 17.14-21; Mc 9.14-29)
37Ambue árape, oguejývo pe yvytýgui, hetaiterei osẽva ohuguãitĩ Jesúspe. 38Ha peteĩ kuimba'e upe apyte guive he'i hatã chupe:
--Mbo'ehára, ema'ẽmína che ra'ýre, ha'e ñoite niko areko. 39Peteĩ mba'epochy ojapyhy chupe, ha ombosapukái, ha oityvyro ha ombojuru ryjuipa. Oguereko asy ha ndopoiséi chugui. 40Ajerure ne remimbo'e kuérape oguenohẽ haguã chugui pe mba'epochy, ha ha'e kuéra ndaikatúi.
41Jesús he'i chupe:
--Há, tekove jerovia'ỹ ha heko añáva! Araka'e peve piko aikóta pende reheve ha pogueropu'aka? Eru ko'ápe nde ra'y.
42Oñemboja jave hína pe mitãrusu, pe mba'epochy oity yvýpe ha oityvyro hatã jey chupe. Jesús katu oja'o pe mba'epochýpe, omonguera pe mitãrusúpe ha ome'ẽ itúvape. 43Ha maymáva opyta ijurujái ha ohecha ramo Tupã mba'e guasueteha.
Jesús omombe'u jey omanotaha
(Mt 17.22-23; Mc 9.30-32)
Opavave ohecha ramo aja hína pe Jesús ojapóva, ha'e he'i hemimbo'e kuérape:
44--Pehendu porã kóva ha ani pende resarái: Che, yvypóraicha aju vaekue, ha'áta hína yvypóra kuéra pópe.
45Hemimbo'e kuérape katu nahesakãi pe he'íva. Ne'ĩra gueteri niko ha'e kuéra oĩ oikuaa haguãicha. Upéi ave, okyhyjeterei hikuái oporandu haguã Jesúspe mba'épa pe he'iséva.
Mávapa tuichave
(Mt 18.1-5; Mc 9.33-37)
46Umíva umi árape, Jesús remimbo'e kuéra oñemoĩ he'i ojupe mávapa pe mba'e guasuvéva ijapytépe kuéra.#Lc 22.24. 47Jesús, ohecha kuaávo mba'épa oguereko hikuái iñakãme, ohenói peteĩ mitãme, omoĩ ijypýpe, 48ha he'i chupe kuéra:
--Che rérape oguerohorýva ko mitãme, chéve che rerohory, ha oguerohory avei pe che mbou vaekuépe.#Mt 10.40; Lc 10.16; Jn 13.20. Upévare, pe michĩvéva pende apytépe, upéva hína upe mba'e guasuvéva.
Opu'ã'ỹva ñande rehe, oĩ ñane ndive
(Mc 9.38-40)
49Juan he'i chupe:
--Mbo'ehára, rohecha kuri peteĩ omosẽva mba'epochy nde rérape, ha rojoko, ndaha'éigui ore ndivegua.
50Ha Jesús he'i chupe:
--Ani pejoko, pe opu'ã'ỹva ñande rehe niko oĩ ñane ndive.
Jesús oja'o Santiago ha Juánpe
51Hi'aguĩmarõ hína ára Jesús ojupi vaerãha yvágape, osẽ oho kyhyje'ỹre Jerusalénpe. 52Omondo hembijokuái tenonderã, ohóva peteĩ tava'i Samaría guápe ohecha haguã chupe hendaguã. 53Umi Samariagua katu, nomoguahẽséi chupe ohecha kuaágui ohoha hína Jerusalénpe. 54Hemimbo'e kuéra Santiago ha Juan ohechávo upéva, he'i chupe:
--Ore Jára, reipotápa ro'e oguejy haguã yvágagui tata ohundi haguã chupe kuéra?#2 R 1.9-16.
55Jesús katu ojere oja'o ha he'i chupe kuéra: Peẽko ndapeikuaáinte mba'e espíritu reheguápa peẽ. Che yvypóraicha aju vaekue ndajúi aporohundívo, aju katu aporopysyrõ haguã 56Ha upéi oho hikuái ambue tava'ipe.
Umi ohoséva Jesús ndive
(Mt 8.19-22)
57Oho aja hikuái, tapére peteĩ kuimba'e he'i Jesúspe:
--Che Jára, che romoirũta mamo rehohápe.
58Jesús he'i chupe:
--Aguara'i niko oguereko ikeha, ha guyra kuéra hupa. Che, yvypóraicha aju vaekue katu, ndarekói mamo ambojeko haguã che akã.
59Jesús he'i ambuépe:
--Eju che ndive.
Ha'e katu he'i:
--Che Jára, che rejána taha raẽ tañotỹmi che ru.
60Jesús katu he'i upévape:
--Eheja umi omanómava toñotỹ umi omanóvape. Nde katu tereho ha emoherakuã Tupã sãmbyhy.
61Ambue katu he'i avei chupe:
--Che Jára, ahase ne ndive, che rejami raẽna taha tamomarandu che róga guápe.#1 R 19.20.
62Jesús ombohovái chupe:
--Pe arádo omoĩva ipópe ha oma'ẽva hapykuévo, naiporãi Tupã sãmbyhýpe guarã.
Currently Selected:
San Lucas 9: GPC2006
Highlight
Share
Copy
Want to have your highlights saved across all your devices? Sign up or sign in
Guarani DC Bible © Sociedad Bíblica Paraguaya, 1996.