Juan 19
19
1Tuꞌnpetziꞌn, etz tzyuꞌn Pilat Jesús, ex xi tqꞌmaꞌn tuꞌn tok bꞌyet. 2Ayetziꞌn xoꞌl qꞌaqꞌ kubꞌ kyxpatxꞌiꞌn txꞌiꞌx, ex jax kyqꞌoꞌn toj twiꞌ Jesús tzeꞌnku jun toj twiꞌ nmaq kawil. Ex ok kyktxuꞌn tukꞌa jun xbꞌalin kyaq kaꞌyin, tzeꞌnkuxjo kye nmaq kawil, me noq te xmaybꞌil tiꞌj. 3Ex i bꞌaj xi laqꞌe tkꞌatz, ex xi kyqꞌmaꞌn te: ¡Nimxit tbꞌiꞌy, ay, nmaq kawil kye aj Judiy!
Exsin bꞌaj okx kytzꞌajchin toj twutz.
4Ex etz juntl majl Pilat toj ja te kawbꞌil, ex xi tqꞌmaꞌn kye Judiy: Kykaꞌyintza, ma tzꞌetz wiꞌn tzaluꞌn, tuꞌntzin tel kynikyꞌa te; qa ntiꞌ jun til ma knet wuꞌn.
5Atzaj teꞌ tetz Jesús tukꞌaꞌ toj twiꞌ, exsin t-xbꞌalin otaq tzꞌok qꞌoꞌn, a kyaq kaꞌyin, xi tqꞌmaꞌn Pilat kye: Lu ichin lo.
6Atzaj teꞌ tok kykaꞌyiꞌn kynejil pale exqetziꞌn xqꞌuqil tja Dios ikyjo, bꞌeꞌx i ok ten ẍchꞌil: ¡Pejkꞌinksa twutz cruz! ¡Pejkꞌinksa twutz cruz tuꞌn tkyim! chi chiꞌ.
Xi tqꞌmaꞌn Pilat kye: ¡Kutzin! Kyinxa, ex kypejkꞌinksa twutz cruz, quꞌn ntiꞌ jun til ma knet wuꞌn.
7Xi tzaqꞌwin Pilat kyuꞌn aj Judiy: ¡Mina! Quꞌn at jun qe qkawbꞌil; ex atziꞌn nqꞌmaꞌn qa il tiꞌj tuꞌn tkyim, quꞌn ma tzꞌok tqꞌoꞌn tibꞌ te Tkꞌwal Dios, me tzeꞌnku ntiꞌ qe qoklin tuꞌn tkubꞌ qbꞌyoꞌn jun aj il; qalaꞌ oꞌkqex kyeꞌ.
8Noq teꞌ tok tbꞌiꞌn Pilat ikyjo, bꞌeꞌx tzaj txqantl t-xobꞌil.
9Okx juntl majl Pilat toj ja te kawbꞌil, exsin xi tqanin juntl majl te Jesús: ¿Jaꞌxixsin tumil tzajnintza?
Me ntiꞌx te Jesús xi ttzaqꞌwin.
10Tuꞌnpetziꞌn, xi tqꞌmaꞌn Pilat te: ¿Tiquꞌn mi nchin tzaj ttzaqꞌwiꞌn? ¿Ma mitzin bꞌiꞌn tuꞌn, qa at wokliꞌn tibꞌaja, tuꞌn tjaw pejkꞌita twutz cruz, mo tuꞌn t-xi ntzaqpiꞌn?
11Xi ttzaqꞌwin Jesús te: Ntiꞌxitla te tokliꞌn wibꞌaja, noqit nya Dios saj qꞌonte teꞌy. Tuꞌnpetziꞌn, a xjal saj qꞌon weꞌy toj tqꞌobꞌa ma nimxixtl teꞌ til tzeꞌnku te.
12Texjo paq anetziꞌn, ok ten Pilat jyol tumil tzeꞌn tuꞌn t-xi tzaqpete Jesús. Me ayetziꞌn Judiy i ok ten ẍchꞌilte: Qa ma txi ttzaqpiꞌn, nya wen k-elile toj twutz nmaq kawil, a César. Quꞌn alkye tzꞌok tqꞌoꞌn tibꞌ te nmaq kawil ajqꞌoj tiꞌjjo César, a manyor nmaq kawil toj Rom.
13Atzaj teꞌ tok tbꞌin Pilat ikyjo, xi tqꞌmaꞌn kye, tuꞌn tetz kyiꞌn Jesús tzma peꞌn toj jun kol ja bꞌinchin toj tuꞌn abꞌj, a Gabata n-ele toj kyyol aj Judiy, ex antza kubꞌ qeꞌ tojjo qꞌuqbꞌil te kawbꞌil. 14Ajo qꞌij, a naꞌmtaq chꞌintl tuꞌn tjapin kanin nintz qꞌij te Xjan Qꞌij, ex bꞌalaqa tzmataq kabꞌlaj or. Xi tqꞌmaꞌn Pilat kye Judiy: Lu kynmaq kawila lo.
15Me ayetzin Judiy xi kyẍchꞌiꞌn: ¡Kyimkuj! ¡Kyimkuj! ¡Pejkꞌinksa twutz cruz!
Xi tqꞌmaꞌn Pilat kye: ¿Mej qa ayin weja, tuꞌn njaw pejkꞌinte kynmaq kawila twutz cruz?
Me ayetzin kyeꞌ kynejinel pale xi kytzaqꞌwin: ¿Mejqa at juntl qeja qnmaq kawil? Qalaꞌ oꞌkx César, a nmaq kawilxix toj Rom.
16Tuꞌntzin ikyjo, bꞌeꞌx xi tqꞌoꞌn Pilat Jesús toj kyqꞌobꞌ xoꞌl qꞌaqꞌ, tuꞌn tjaw pejkꞌit twutz cruz.
Tej tjaw pejkꞌit Jesús twutz cruz
(Mt. 27:32-44; Mr. 15:21-32; Lc. 23:26-43)
17Ex bꞌeꞌxsin etz kyiꞌn Jesús iqin tcruz, tuꞌn tkanin toj jun tal txꞌotxꞌ, a Tbꞌaqil twiꞌ kyimnin tbꞌi, a Gólgota tbꞌi toj kyyol aj Judiy. 18Antza jaw kypejkꞌin twutz cruz junx kyukꞌa kabꞌe ichin tukꞌa, junjun toj junjun plaj, ex ante Jesús toj nikyꞌjin.
19Ante Pilat xi tqꞌmaꞌn tuꞌn kypejkꞌit jun tzꞌlan tibꞌaj twiꞌ, tukꞌa jun yol tzꞌibꞌink tiꞌj, a ntqꞌmaꞌn: Jesús aj Nazaret, a Nmaq Kawil kye aj Judiy.
20Nimx Judiy bꞌaj ok uꞌjin teꞌ a yol, tzꞌibꞌink twutz tzꞌlan, quꞌn atziꞌn tal txꞌotxꞌ, a jaꞌ jawe qꞌoꞌne Jesús twutz cruz, nqayintaq taꞌ tkꞌatz tnam, ex atzin yol tzꞌibꞌink twutz tzꞌlan toj oxe yol: Ebrey, Latín ex Griego.
21Tuꞌnpetziꞌn, i aj ajqelin kynejil pale aj Judiy qꞌmalte te Pilat kyjaluꞌn: Mina tzꞌok ttzꞌibꞌiꞌn, qa ax twutzx nmaq kawil kye aj Judiy; qalaꞌ qa ok tqꞌoꞌn tibꞌ nyakuj nmaq kawilch.
22Me ante Pilat xi tqꞌmaꞌn: ¡Mina! Quꞌn a ma kubꞌ ntzꞌibꞌiꞌn, nlay jaw ntxꞌixpiꞌn; qalaꞌ kyijkuj kukxjo.
23Tbꞌajlinxiꞌ kypejkꞌin xoꞌl qꞌaqꞌ Jesús twutz cruz, bꞌaj jaw kychmoꞌn t-xbꞌalin, ex bꞌaj kubꞌ kysipin kyxol te kyaje elnin, junjun te junjun xoꞌl qꞌaqꞌ. Me atx juntl kamiẍj kyij, a ntiꞌ slepinte; qalaꞌ junx chinbꞌinte tkyaqil. 24Ayetziꞌn xoꞌl qꞌaqꞌ, i jaw yolin kyxolx:
Yajtzintlaꞌ mi kubꞌ qlaqin. Wenitla tuꞌn qsaqchan tiꞌj, ankye kkanbꞌilte.
Ikytzin japin bꞌajjo a tzꞌibꞌin toj Tuꞌjil Tyol Dios kyjaluꞌn: Bꞌaj kubꞌ kysipin nxbꞌaliꞌn kyxol, ex i bꞌaj saqchan tiꞌjch.#Sal. 22:18. Ikyxixsin bꞌantjo kyuꞌn xoꞌl qꞌaqꞌ.
25Ayetziꞌn tnana Jesús tukꞌaxjo titzꞌin; ex tukꞌa Mariy, a t-xuꞌjil Cleofas; tukꞌax Mariy aj Xleꞌn, waꞌlqetaq t-xe tqan cruz, a jaꞌ jawe pejkꞌin Jesús. 26Tej tok tkaꞌyin Jesús tnana waꞌltaq junx wukꞌiy, a ayiꞌn jun t-xnaqꞌtzbꞌin, a kꞌuꞌjlinxixtaq tuꞌn, xi tqꞌmaꞌn te tnana: Qya, atzin jaꞌlin, ma tzꞌokjo luꞌn te tala. 27Ex ikyxjo tzaj tqꞌmaꞌnl weꞌy: Ajo qya lo ma tzꞌok te tnaniy.
Ex atxixsiꞌn, bꞌeꞌx tzaj nkꞌmoꞌn tnana toj njaꞌy tuꞌn tok nkaꞌyiꞌn.
Tej tel kyim Jesús
(Mt. 27:45-56; Mr. 15:33-41; Lc. 23:44-49)
28Tbꞌajlinxiꞌ ikyjo, xi tqꞌmaꞌn Jesús: At kꞌwaj wiꞌja.
Xi tqꞌmaꞌn ikyjo tuꞌntzin tjapin bꞌajjo tzꞌibꞌin toj Tuꞌjil Tyol Dios,#Sal. 69:21. quꞌn bꞌiꞌntaq tuꞌn qa il tiꞌj tuꞌn tjapin bꞌajjo tkyaqil otaq tqꞌma Dios.
29Attaq jun xar tkubꞌ antza, nojnin tukꞌa jun wiq vin txꞌamxix wen. Kux kymulin jun bꞌuꞌẍ toj, exsin ok kykꞌloꞌntz tiꞌj jun tqꞌobꞌ tze, tuꞌn tjapin tzma toj ttzi Jesús. 30Xi ttzꞌubꞌin, ex tqꞌma: Ma japin bꞌaj kykyaqilx jaꞌlin.
Tzaj tmutxbꞌiꞌn twiꞌ, ex bꞌeꞌx el kyim.
Tej tok t-xyuꞌn jun xoꞌl qꞌaqꞌ t-xukꞌ Jesús
31Atzin qꞌij anetziꞌn, atxtaq jun qꞌij tuꞌn tjapin kaninjo qꞌij te ajlabꞌl, jaꞌ iltaq tiꞌj tuꞌn tkubꞌ kybꞌinchin tkyaqil, tuꞌn kyikyꞌsin Judiy Xjan Qꞌij. Kykyꞌeꞌtaq tuꞌn tkyij ten kyxmililjo xjal twutz cruz toj qꞌij te ajlabꞌl, quꞌn atzin qꞌij te ajlabꞌl lo, nimxix toklin te kye. Tuꞌnpetziꞌn, bꞌeꞌx i xiꞌ qꞌmalte te Pilat, tuꞌn tok waqꞌit kykuxjo xjal iteꞌkxtaq twutz cruz, tuꞌn kykyim liwey, ex tuꞌn teljo kyxmilil antza. 32Tuꞌnpetziꞌn, bꞌeꞌx i xiꞌ chqꞌoꞌn xoꞌl qꞌaqꞌ bꞌinchilte. Nej, kubꞌ kywaqꞌin tkuxjo tnejil, ex ikyxjo tkabꞌ. 33Me atzaj teꞌ kyxi laqꞌe tkꞌatz Jesús, ok kykaꞌyin qa otaq tzꞌel kyim. Tuꞌnpetziꞌn, mix oke kywaqꞌine tkux Jesús. 34Me atzin jun xoꞌl qꞌaqꞌ jun paqx okx t-xyuꞌn toj t-xukꞌ Jesús tukꞌa jun tbꞌujbꞌil, chꞌut twiꞌ, ex jun paqx, etz ulbꞌin chikyꞌ tukꞌa aꞌ toj.
35Ex ayinku weꞌ in lonte. Tuꞌnpetziꞌn, xi nqꞌmaꞌn twutzxix, quꞌn ankye ma lonte, twutzxix te tyol, tuꞌntzin majqex kye, tuꞌn kyxi niminte. 36Tkyaqiljo lo o bꞌaj, noqx tuꞌn tjapin bꞌaj tkyaqiljo ntqꞌmaꞌn Tuꞌjil Tyol Dios kyjaluꞌn: Ntiꞌx jun tbꞌaqil tuꞌn tok waqꞌit.#Ex. 12:46; Num. 9:12; Sal. 34:20.
37Ex toj juntl tnej Tuꞌjil Tyol Dios ntqꞌmaꞌn: K-okil kykaꞌyiꞌn aj tok kyxyuꞌn.#Zac. 12:10; Tchi. 1:7.
Tej tkux muquꞌn Jesús
(Mt. 27:57-61; Mr. 15:42-47; Lc. 23:50-56)
38Tbꞌajlinxiꞌ ikyjo, attaq jun ichin, Jse aj Arimatey, xi tqanin ambꞌil te Pilat, tuꞌn t-xi tiꞌn t-xmilil Jesús. Atzin teꞌ Jse lipchek toj tanmin tiꞌj t-xnaqꞌtzbꞌil Jesús; me tkyꞌeꞌtaq tuꞌn tel tqanil, noq tuꞌn t-xobꞌil kye Judiy. Ante Pilat xi tqꞌoꞌn ambꞌil te Jse, tuꞌn t-xi tiꞌn t-xmilil Jesús. 39Ikyx te Nicodemjo; a xtaꞌj yolil tukꞌa Jesús toj qnikyꞌin,#Jn. 3:1-2. pon tiꞌn bꞌalaqa qaq alme qꞌanbꞌil te jupsbꞌil, smaꞌn tten tukꞌa mir ex áloe.
40Ikytziꞌn, ate Jse tukꞌa Nicodem, xi kyiꞌn t-xmilil Jesús, ex kubꞌ kybꞌaltzꞌin toj iqbꞌil tukꞌa qꞌanbꞌil te jupsbꞌil, ikyxjo tzeꞌnkuꞌ kyxnaqꞌtzbꞌin aj Judiy, aj tkux muqet jun kyimnin.
41Tojjo txꞌotxꞌ, a jaꞌ jawe qꞌoꞌn Jesús twutz cruz, attaq juntl chꞌlaj te awbꞌil tqan lobꞌj. Ex tojtaqjo chꞌlaj, attaq jun tjul kyimnin otaq bꞌant, a jaꞌ ntiꞌtaq jun kyimnin otaq kuꞌx toj. 42Ex antza kux kyqꞌoꞌne t-xmilil Jesús, quꞌn nqayin taꞌtaqjo jul, ex chꞌixtaq t-xi xkyeꞌ qꞌij te ajlabꞌl, jaꞌ mix aꞌl jun bꞌaꞌn tuꞌn tbꞌinchin jun tiꞌ.
Currently Selected:
Juan 19: mamC
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.