Matey 6
6
T-xnaqꞌtzbꞌil Jesús tiꞌjjo qbꞌinchbꞌin tbꞌanilx
1Kykaꞌyink kyibꞌa; mi kubꞌ kyyekꞌiꞌn kynimbꞌila kywutzxjal, noq tuꞌn kyjawku kaꞌylaj kyiꞌja.#Mt. 23:5. Quꞌn qa ma kubꞌ kybꞌinchiꞌn ikyjo, nlay tzaj qꞌoꞌn jun oyaj kyeꞌy tuꞌn qMan at toj kyaꞌj. 2Tuꞌnpetziꞌn, aj qa ma chi oniꞌn kyiꞌjjo ntiꞌx chꞌin at kye, mi kubꞌ kybꞌinchiꞌn noq tuꞌn telku kyqanila kyxolilexjal, tzeꞌnku nbꞌant kyuꞌn xmiletzꞌ, ayeꞌ nimsil kyibꞌ, kyojileꞌ ja te kꞌulbꞌil ex kyxolileꞌ tnam, noq tuꞌn tkubꞌ kyyolinku xjal qa tbꞌanilqex. Twutzx kxel nqꞌmaꞌn kyeꞌy, qa kyinxla chꞌin chojbꞌiljo ktzajil qꞌoꞌn tiꞌj. 3-4Qalaꞌ, aj t-xi kyqꞌoꞌn jun onbꞌil kye yaj, kyqꞌonxa toj ewajil, tuꞌntzin mix aꞌl jun aku lonte, mixpela jun kyukꞌaxixa kbꞌilte. Quꞌn a te qMan Dios, a nkaꞌyin kyiꞌja toj ewajil, ktzajil qꞌonte t-xel kyeꞌy tiꞌjjo lo.
T-xnaqꞌtzbꞌil Jesús tiꞌjjo naꞌj Dios
(Lc. 11:2-4)
5Ex aj kynaꞌn Dios, mi chi oka tzeꞌn kye xmiletzꞌ, a waꞌlqenaj nchi naꞌn Dios toj ja te kꞌulbꞌil ex toj xkyꞌich bꞌe toj tnam, noq tuꞌn kyokku kaꞌyin kyuꞌnxjal, ex tuꞌn kyjaw nimsin.#Lc. 18:10-14. Me twutzxix kxel nqꞌmaꞌn kyeꞌy, qa tiꞌjjo ikyjo, kyinxla chꞌin chojbꞌiljo tiꞌj. 6Qalaꞌ, aj kynaꞌn Dios, ku kyokxa tuja, ex kyjpumitz kyjaꞌy. Exsin kux chi naꞌntza Dios kyjunala toj ewajil, quꞌn ate Dios nkaꞌyin kyiꞌja toj ewajil, ex ax ktzajil qꞌoꞌnte chojbꞌil kyeꞌy tiꞌj. 7Ex aj kyok ten naꞌl Dios, nya noq tiꞌchaqku kchi okil ten qꞌmalte, tzeꞌnku nbꞌant kyuꞌnxjal, a nya ojtzqiꞌn Dios kyuꞌn. Quꞌn toj kywutz, nyakuj noq tuꞌn ikyjo, kchi tzajil bꞌiꞌn tuꞌn Dios; qalaꞌ tukꞌax jun jteꞌ yol, me qa nkynaꞌn toj kyanmiꞌn. 8Mitzin chi oka tzeꞌnqekuꞌ xjal xmiletzꞌ anetziꞌn, quꞌn noqtzin chi oktza tzeꞌnqe nya nimil. Quꞌn ex ojtzqiꞌnl te kyMan tuꞌn, naꞌmxtaq txi kyqaniꞌn alkye ntiꞌ kyeꞌy.
9Tuꞌnpetziꞌn, iky chi naꞌla Diosjiꞌy kyjaluꞌn:
Ay qMan Dios, ate toj kyaꞌj, noqit tzꞌel kynikyꞌxjal qa xjanxixjo tbꞌiy.
10Noqit tkuꞌtzjo Tkawbꞌila tzaluꞌn twutz txꞌotxꞌ,
tuꞌntzintla tbꞌantjo tajbꞌila tzaluꞌn,
tzeꞌnkuxjo nbꞌant toj kyaꞌj.
11Qꞌontzjiy qwaꞌy nimxix te qꞌij jaꞌlin.
12Ex najsimjiy qila, a o bꞌant quꞌn,
tzeꞌnku qeꞌ, nkubꞌ qnajsiꞌn kyilxjal nchi bꞌinchin mibꞌin qiꞌja.
13Mi ttziyiy tuꞌn qkubꞌ tzꞌaqa toj jun joybꞌil, aj ttzaj qiꞌja;
qalaꞌ qo tkloma toj tqꞌobꞌ tajaw il.
Quꞌn tex te tkyaqil Tkawbꞌil, ex nimx te tipin, ex jniꞌ tqoptzꞌajiyila jaꞌlin, ex te jun majx.#1Cr. 29:11.
14Quꞌn qa ma kubꞌ kynajsiꞌn kyiljo nchi ok lipin kyiꞌja, ex ikyxjo te qMan Dios, a at toj kyaꞌj, kꞌwel tnajsin kyila.#Mr. 11:25. 15Me qa mix kubꞌ kynajsiꞌn kyiljo nchi ok lipin kyiꞌja, ex ikyxjo te qMan Dios, mi kubꞌ tnajsin kyila.#Mr. 11:26.
T-xnaqꞌtzbꞌil Jesús tiꞌjjo tuꞌn qpaꞌn waꞌyaj
16Ajtzin tkubꞌ kypaꞌn waꞌyaj tuꞌn kynaꞌn Diosa, mi kubꞌ kyyekꞌiꞌn qa nqꞌaqꞌin kykꞌuꞌja, ex mi chi jaw bꞌisiꞌn, tzeꞌnku nbꞌant kyuꞌn xmiletzꞌ, ayeꞌ nimsil kyibꞌ, noq tuꞌn telku kynikyꞌtzajil qa nchi paꞌn waꞌyaj. Twutzx kxel nqꞌmaꞌn kyeꞌy, qa oꞌkx chꞌin chojbꞌiljo tiꞌjjo lo. 17Qalaꞌ, aj kypaꞌn waꞌyaj tuꞌn kynaꞌn Dios, kybꞌinchim kyibꞌa, kytxjomil kywutza, ex chi tzeꞌjiꞌy, 18tuꞌntzin mi tzꞌele kynikyꞌxjal kyeꞌy, qa nchi paꞌn waꞌyaj; qalaꞌ oꞌkx kyMaꞌn, ex ax ktzajil qꞌonte chojbꞌil kyeꞌy.
A qqꞌinimil toj kyaꞌj
(Lc. 12:33-34)
19Mi kubꞌ kychmoꞌnjiꞌy kyqꞌinimila tzaluꞌn twutz txꞌotxꞌ, a jaꞌ taꞌye pokꞌ tuꞌn tyuchꞌj, ex jaꞌ aku tzꞌoke jun tiꞌ kyiꞌj, ex a jaꞌ aku chi okxi ileqꞌ elqꞌilte.#Sant. 5:2-3. 20Qalaꞌ kychmomjiꞌy kyqꞌinimila toj kyaꞌj, noq tuꞌn kybꞌinchbꞌiꞌn bꞌaꞌn, tzeꞌnku taj Dios, quꞌn nlaypen kubꞌ pokꞌix teꞌ, nlay qꞌayj, ex nlay tzꞌex tuꞌn ileqꞌ. 21Quꞌn jaꞌ taꞌyex kyqꞌinimila, axsa kxele lipeye kyanmiꞌn.#Lc. 12:34.
Ajo tzaj te qxmilil
(Lc. 11:34-36)
22Ajo kywutza tzeꞌnku jun tzaj te kyxmilila ex te kyanmiꞌn. Qa wen kywutza, at spikyꞌin toj kyanmiꞌn tuꞌn tel kynikyꞌa tiꞌj tkyaqiljo wen. 23Me qatzin ma txi kyqꞌoꞌn ambꞌil te kywutza noq tuꞌn kykaꞌyiꞌn tiꞌjjo nya wen, ex ikyxjo ok k-okil kyanmiꞌn te nya wen, ex toj qxopin. Mi qe kykꞌuꞌja tiꞌj jun kyanmiꞌn nya wen, quꞌn kchi kꞌwel sbꞌuꞌn tuꞌn, tuꞌn kyxi qꞌiꞌn toj manyor qxopin.
T-xnaqꞌtzbꞌil Jesús tiꞌjjo pwaq
(Lc. 16:13)
24Mix aꞌl jun aku tzꞌajbꞌin te kabꞌe tajaw aqꞌuntl. Quꞌn k-elil tiꞌjliꞌn tnejil, ex k-okil tkꞌuꞌjliꞌn tkabꞌ; mo k-okilj tzꞌaqle tukꞌa tnejil, me bꞌeꞌx aku tzꞌel tiꞌjlinljo tkabꞌ. Nlayx bꞌant tuꞌn tokin te Dios ex te pwaq.#Lc. 16:13.
Nchi ok tkaꞌyinte Dios tkꞌwal
(Lc. 12:22-31)
25Tuꞌnpetziꞌn, kxel nqꞌmaꞌn kyeꞌy, mi chi bꞌisiꞌn tiꞌj tzeꞌn tten tuꞌn kyanqꞌiꞌn: Qa tiꞌj kywaꞌy mo tiꞌj kykꞌwaꞌy, mo tiꞌj kyxbꞌaliꞌn. ¿Ankye nej; a kywaꞌy mo a kychwinqilja? ¿Ex atzin kyxbꞌaliꞌn mo a kyxmililja? 26Quꞌn kykaꞌyinqektzinjiꞌy tal pichꞌ nchi lipin twutz kyaꞌj; mi nchi awan, mi nchi kꞌuꞌn kyawal. ¿Ma tzuꞌntzin nchi kyim? Mina, quꞌn a kyMaꞌn, a at toj kyaꞌj, kꞌaꞌchilkye. ¿Ma nyatzin aye kyeꞌ nim kyoklin tzeꞌnqekuꞌ tal pichꞌ? 27Quꞌn mixpetzin tuꞌn chi ja meljtza, ¿Ma akutzin txi nimix toj kychwinqiltza nipela jun or?
28¿Ex tiquꞌn tzunx chi bꞌisinxa tiꞌj kyxbꞌaliꞌn? Kykaꞌyinktziꞌn tzeꞌn nchi chꞌiyeꞌ jniꞌ t-xmakil kꞌul. Mina nchi aqꞌnin, ex mina nchi chubꞌin. 29Me kxel nqꞌmaꞌn kyeꞌy, qa a qtzan nmaq kawil Salomón ojtxe, tukꞌa tkyaqil tqꞌinimil, s-ok tktxuꞌn tibꞌ tukꞌa t-xbꞌalin tbꞌanilx wen, me mix kanine tqoptzꞌajiyil t-xbꞌalin, tzeꞌn kaꞌyiꞌn jun tal t-xmakil kꞌul.#1Re. 10:4-7; 2Cr. 9:3-6. 30Qatzin qa nchi ok tktxuꞌn Diostzjo tal t-xmakil kꞌul ikyjo, a loqe tzunx nchi milinx toj kojbꞌil jaꞌlin, me meljo nchiꞌj bꞌeꞌx kchi kꞌwel bꞌolj tuꞌn qꞌaqꞌ; ¿Yajxsila kyetza? ¿Nyapela kchi okil ktxuꞌn kyeꞌ tuꞌn Dios? Quꞌn qa noq oꞌkxtza nchi bꞌisiniꞌy tiꞌjjo tkyaqiljo lo, antza nyekꞌine qa noq tal chꞌin kynimbꞌila.
31Tuꞌntziꞌn, mi chi bꞌisiꞌn, ex mi kyqꞌmaꞌy: ¿Tiꞌ kxel qwaꞌn, mo qa tiꞌ kxel qkꞌwaꞌn, mo qa tzeꞌn tten qxbꞌalin tuꞌn tok? qa chi chijiꞌy. 32Quꞌn ayetzin kyeꞌ txqantl xjal, a nya nimil, nimx nchi jaw melj kyeꞌ tiꞌj tkyaqiljo lo. Me metziꞌn kyetza, at jun kyeꞌ kyMan toj kyaꞌj, a ojtzqiꞌn tuꞌn alkye atx taj kyeꞌy. 33Tuꞌnpetziꞌn, kyjyomtziꞌn Tkawbꞌil qMan toj kyaꞌj te tnejil, ex kybꞌinchinkujiꞌy a tzꞌaqle toj twutz, ex okpetzin ktzajil kykꞌmoꞌntza tkyaqiljo txqantl. 34Mi chi bꞌisin kyeꞌ tiꞌjjo nchiꞌj, quꞌn nchiꞌjxi teꞌ, ex tex teꞌ tkyaqiljo kbꞌajil toj. Quꞌn toj jun qꞌij nimku aku bꞌaj.
Currently Selected:
Matey 6: mamC
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.