Juan 12
12
Tej tok tsuꞌnjo qya jupsbꞌil kyiꞌj tqan Jesús
(Mt. 26:6-13; Mr. 14:3-9)
1Noq qaq qꞌijtaq tuꞌn tpon kanin nintz qꞌij te Xjan Qꞌij. Bꞌeꞌx xiꞌ Jesús toj kojbꞌil Betania, a jaꞌ najletaq Lázaro, a otaq jaw anqꞌintl tuꞌn Jesús toj kyime. 2Antza kubꞌe kybꞌinchin jun wabꞌj te aqꞌbꞌil chjonte te Jesús. Ate Mart nsipintaq wabꞌj, ex ajin te Lázaro qꞌuqlektaq waꞌl kyukꞌa tiꞌj meẍ. 3Ante Mariy tzaj tiꞌn jun tkꞌwel qꞌanbꞌil, nardo tbꞌi, a jun wiq jupsbꞌil tbꞌanilxix wen ex wiyilxix. Ex kubꞌ tqꞌoꞌn tkyaqil kyibꞌajjo tqan Jesús, ex jun paqx ok tzqijsin tukꞌa tsmal twiꞌ. Ex tkyaqil toj ja kubꞌ juptzꞌaj tuꞌn tbꞌanil tkꞌokꞌjil.#Lc. 7:37-38.
4Me attaq jun t-xnaqꞌtzbꞌin Jesús antza, a Judas Iscariot tbꞌi, a tuꞌntaq t-xi kꞌayinte toj kyqꞌobꞌ tajqꞌoj. Xi tqꞌmaꞌn te Jesús: 5¿Tiquꞌnil mi xi kꞌayitjo jupsbꞌil lo, a wiyilxix wen, tuꞌn kyxi qmojin tal yajqe?
6Me ante Judas nya nbꞌinsintaq kyiꞌjjo yaj, qalaꞌ kubꞌ tqꞌmaꞌn ikyjo quꞌn ileqꞌtaq. Quꞌn ate Judas toktaq toklin te chmol pwaq qxola, ex tzuntaq jatz telqꞌin chꞌin tiꞌjjo a chmoꞌntaq tuꞌn.
7Xi tqꞌmaꞌn Jesús te: Tenkuj. Quꞌn ma kubꞌ tkꞌuꞌn luꞌn tzmax jaꞌlin, tuꞌn tbꞌant nteꞌn te muqbꞌil weꞌy. 8Quꞌn atzin kye yaj, axsi kchi kꞌwele ten kyxola, ex bꞌaꞌn tuꞌn kyxi kymojiꞌn noq tiꞌ qꞌijil.#Deu. 15:11. Qalatziꞌn weꞌ, nya kukx kchin kꞌwel ten wejiꞌy kyxola.
Tej tok kychmoꞌn nejinel kyibꞌ tiꞌj Lázaro tuꞌn tkyim
9Nimx Judiy i bꞌinte qa antza taꞌye Jesús toj tnam Betania, ex bꞌeꞌx i bꞌaj xiꞌ antza lolte Jesús tukꞌax Lázaro, a otaq jaw anqꞌintl tuꞌn Jesús kyxol kyimnin. 10Ayetziꞌn kynejinel pale bꞌeꞌx i kyij toj wen tuꞌn tkubꞌ bꞌyet Jesús majx Lázaro tukꞌa, 11quꞌn noq tuꞌn tpaj Lázaro, nimx Judiy otaq tzꞌel kypaꞌn kyibꞌ kyiꞌj, noq tuꞌn kyxi lipe tiꞌj Jesús.
Tej tkanin Jesús toj Jerusalén
(Mt. 21:1-11; Mr. 11:1-11; Lc. 19:28-40)
12Nimkutaq xjal otaq txiꞌ ikyꞌsil Xjan Qꞌij toj Jerusalén. Toj junxil qꞌij, ok kybꞌin qa tuꞌntaq tkanin Jesús antza. 13Tuꞌnpetziꞌn, i ok ten txꞌemil txqan t-xaq tze, palma tbꞌi, exsin i bꞌajetz kꞌlelte Jesús, ex i bꞌaj ẍchꞌin kyjaluꞌn:
Nimxit tbꞌi qMan Dios.
Kyꞌiwlinxitjo a tzul kanin toj Tbꞌi qAjaw.
Kyꞌiwlinxitjo a nmaq kawil tibꞌaj Israel.#Sal. 118:25-26.
14El jyet jun tal bur tuꞌn Jesús, ex bꞌeꞌx jax qe tibꞌaj, tzeꞌnkuxtaqjo ntqꞌmaꞌn toj Tuꞌjil Tyol Dios:
15Mi chi jaw xobꞌa,
ayiꞌy najleqe toj tnam Sion.
¡Kykaꞌyinxa! Luꞌ kyNmaq Kawila tzul
qꞌuqlekx chejil tibꞌaj jun tal bur.#Zac. 9:9.
16Te tnejil, mix ele qnikyꞌa tiꞌj tkyaqiljo lo, a awoꞌy t-xnaqꞌtzbꞌin; me yajxi, tej tjax Jesús toj kyaꞌj, bꞌeꞌx bꞌaj ul julkꞌaj toj qkꞌuꞌja tkyaqiljo tzꞌibꞌintaq tiꞌj toj Tuꞌjil Tyol Dios, ex ikyxixsin otaq bꞌajjo.
17Me ayeqetziꞌn xjal iteꞌtaq tukꞌa Jesús, tej ttzaj tqꞌolbꞌin Lázaro toj jul, ex tej tjaw anqꞌintl tuꞌn, tzunx nchi yolintaq tiꞌj kyukꞌa txqantl. 18Tuꞌntziꞌn ikyjo, i bꞌajetz xjal toj tnam kꞌlelte Jesús, quꞌn otaq tzꞌok kybꞌiꞌn techil tipin tbꞌanilxix tiꞌj Lázaro. 19Ex mix ele wenjo luꞌn toj kywutz Parisey. Bꞌaj kubꞌ kyyolin kyxolx: ¡Kaꞌn! Ntiꞌx jun aku bꞌant quꞌn tiꞌj, quꞌn kykaꞌyinxsiꞌn; kykyaqilxjal ma txi lipe tiꞌj.
Tej kyyolin junjun nya Judiy tukꞌa Jesús
20Kyxoljo xjal a otaq chi kanin ikyꞌsil nintz qꞌij toj Jerusalén, attaq junjun xjal aj Grecia. 21Ex attaq jun qukꞌiy, a awoꞌy t-xnaqꞌtzbꞌin Jesús, Lip tbꞌi, tzajnin toj tnam Betsaida toj ttxꞌotxꞌ Galiley. Aye aj Grecia i tzaj laqꞌe tkꞌatz Lip, ex i kubꞌsin kywutz te: Tata, noq same, qajatlaꞌy tuꞌn qyoliꞌn tukꞌa Jesús.
22Bꞌeꞌxsin xiꞌ Lip, ex xi tqꞌmaꞌn te Andrés, ex kykabꞌilx i xiꞌ qꞌmalte te Jesús.
23Xi tqꞌmaꞌn Jesús kye: Chꞌix tul kanin nqꞌijila, ayiꞌn, a Tkꞌwal Ichin, tuꞌn nkyima, tuꞌn njaw anqꞌiꞌn, ex tuꞌn njaxa toj kyaꞌj tukꞌa tkyaqil nqoptzꞌajiyila. 24Quꞌn twutzxix kxel nqꞌmaꞌn kyeꞌy, ikytzin wejiꞌy tzeꞌnku jun twutz triy. Qa mix xkux miqet toj txꞌotxꞌ, nlay chꞌiy, qalaꞌ oꞌkxjo tal junchꞌin ex ntiꞌ tajbꞌin. Me qa ma kux miqet toj txꞌotxꞌ tuꞌn tkyim, ok chmetil txqantl twutz.
25Ankye teꞌ taj noq tuꞌn tok tkꞌuꞌjlin tchwinqil tzaluꞌn twutz txꞌotxꞌ, ok kꞌwel najsin tkyaqil. Me ankye teꞌ kxel qꞌonte tibꞌ toj tqꞌobꞌ Dios, ex mi n-ok tilil tuꞌn tiꞌjjo tchwinqil tzaluꞌn twutz txꞌotxꞌ, apente kkanbꞌil jun tchwinqiljo, a nlay bꞌaj.#Mt. 10:39; 16:25; Mr. 8:35; Lc. 9:24; 17:33. 26Ex ankye jun n-ok tilil tuꞌn, tuꞌn tajbꞌin weꞌy, bꞌaꞌn tuꞌn tok lipe wiꞌja, tuꞌn tten junx wukꞌiy toj tkyaqil. Ex ankye te n-ajbꞌin weꞌy, apente kjawil nimsiꞌn tuꞌn nMaꞌn.
Tej tyolin Jesús juntl majl tiꞌj tkyimlin
27Atziꞌn jaꞌlin, nimx nchyoꞌn wanmiꞌn tuꞌn nbꞌisa. ¿Tiꞌtzila kxel nqꞌmaꞌn? ¿Ma okpela kxel nqꞌmaꞌn: Tata, chin tkloma, tuꞌn mi tzꞌikyxe wuꞌn tkyaqilxjo kbꞌajil wiꞌja? ¡Mina! Quꞌn tuꞌnpen teꞌ luꞌn ẍin uliy. Qalaꞌ kxel nqꞌmaꞌn: 28Tata, nimsinks tbꞌiy wiꞌja.
Tekuxjo xi tqꞌmaꞌn yol anetziꞌn, bꞌijte jun tqꞌajqꞌojil wibꞌaj toj kyaꞌj, a tqꞌma: O jaw nnimsiꞌn nbꞌiy, ex kjawil nnimsiꞌn juntl majla.
29Ayetziꞌn xjal iteꞌtaq tkꞌatz, te kybꞌinte yol luꞌn, xi kyqꞌmaꞌn kyxolile, qa noq jun qꞌankyaq jaw tinin. Me junjuntl qꞌmante qa jun angel tzaj yolin tukꞌa.
30Tuꞌnpetziꞌn, xi tqꞌmaꞌn Jesús kye: Nya noq te qꞌuqbꞌil nkꞌuꞌja saje yolin teꞌ tqꞌajqꞌojil wiꞌbꞌaj; qalaꞌ te qꞌuqbꞌil kykꞌuꞌja wiꞌja. 31Quꞌn atzin jaꞌlin, chꞌixxix tul kanin tqꞌijil te kykyaqil xjal twutz txꞌotxꞌ, tuꞌn kyok toj paꞌbꞌin twutz Dios, ex ilxix tiꞌj tuꞌn tex lajet tajaw il, quꞌn twutzxix kxel nqꞌmaꞌn kyeꞌy, qa kꞌwel tiꞌj wuꞌn te jun majx. 32Quꞌn ajtzin njaw qꞌoꞌn twutz tze tzaluꞌn twutz txꞌotxꞌ, ktzajil nchmoꞌn kykyaqil xjal wuꞌnx wibꞌxa. 33Tukꞌa yol anetziꞌn; nyekꞌin Jesús tzeꞌn tumil tuꞌn tkyime.
34Xi kytzaqꞌwin xjal: ¿Ma nyatzin tzun ntqꞌmaꞌn toj Tuꞌjil Tyol Dios, qa ate Crist il tiꞌj tuꞌn tten te jun majx?#Sal. 110:4; Is. 9:7; Ez. 37:25; Dan. 7:14. ¿Tzeꞌntzin ttentz ntqꞌmaꞌntza, qa ajo Tkꞌwal Ichin il tiꞌj tuꞌn tjaw twutz cruz tuꞌn tkyim? ¿Tzeꞌntzin tzꞌelpineꞌ Tkꞌwal Ichin?
35Xi tqꞌmaꞌn Jesús kye: Ayin weꞌ spikyꞌin loqiꞌn intiꞌnx kyxola. Me noq te jun paql intiꞌn kyukꞌiy. Tuꞌnpetziꞌn, chi lipeka tiꞌjjo spikyꞌin, tuꞌntzin mi chi kyijiꞌy toj qxopin. Quꞌn ankye teꞌ nbꞌet toj qxopin, ntiꞌ bꞌiꞌn tuꞌn jaꞌtzin t-xiye. 36Tuꞌnpetziꞌn, kyniminxjiꞌy spikyꞌin, a luꞌ atx chꞌintl kyukꞌiy, tuꞌntzin kyoka te jun xjal aj spikyꞌin.
Tbꞌajlinxiꞌ tqꞌmaꞌn Jesús ikyjo, bꞌeꞌx el tewin tibꞌ kywutz.
Tej t-xi tqꞌmaꞌn Jesús qa tkyaqilxjal il tiꞌj tuꞌn kynimin tiꞌj
37Mix tuꞌn nimx techil tipin Jesús o bꞌant tuꞌn kywutzxjal, me mix i niminix tiꞌj. 38Tukꞌajo lo, japin bꞌajjo tyol Isaías, a yolil Tyol Dios ojtxe, tej tkubꞌ ttzꞌibꞌin:
Tata, ¿Ankye ma txi niminte Tbꞌanil Tqanil tiꞌja, a ma txi qqꞌmaꞌn?
¿Altzila qe xaye tyekꞌin tAjaw Tkyaqil toklin Tkawbꞌil kyibꞌaj?#Is. 53:1.
39Exla qa ikyjo, nlayx txi kynimin, quꞌn atx juntl yol kyij ttzꞌibꞌin Isaías kyjaluꞌn:
40Quꞌn ax Dios s-ok moẍsinte kywutz,
ex s-ok chꞌuẍsinte kyanmin,
tuꞌntzin mi tzꞌele kynikyꞌ te tuꞌn kywutz.
Ex tuꞌn mi kybꞌiye tuꞌn kyanmin.
Ex ntiꞌx ma chi meltzꞌaj wukꞌiy, tuꞌn kykubꞌ nqꞌaniꞌn.#Is. 6:10.
41Kyij ttzꞌibꞌin Isaías ikyjo, quꞌn otaq tli nimx toklin Jesús, exsin nyolintaq tiꞌj, a naꞌmtaq tul kanin Jesús twutz txꞌotxꞌ.
42Me kyxol tkyaqiljo luꞌn, attaq junjun Judiy i nimin tiꞌj Jesús, ex majxpe junjun nejinel kyxol. Me mix kubꞌe kychikybꞌin kywutzxjal noq tuꞌnjo kyxobꞌil kye Parisey, tuꞌn mi chi exe lajoꞌn tiꞌjjo kyoklin tojjo ja te kynaꞌbꞌl Dios aj Judiy. 43Quꞌn wenxixtaq toj kywutz, tuꞌn kyja nimsin kyuꞌnxjal tzaluꞌn twutz txꞌotxꞌ, tzeꞌnku tuꞌn kyja nimsin tuꞌn Dios toj kyaꞌj.
Tej tyolin Jesús tiꞌjjo xjelbꞌil twutz qMan Dios
44Xi tqꞌmaꞌn Jesús tukꞌa tqꞌajqꞌojil twiꞌ: Ankye te knimil wiꞌja, nya oꞌkqinxa kchin xel tnimin; qalaꞌ aku nMaꞌn, a tzaj chqꞌon weꞌy. 45Ex ankye te ma chin tliꞌy, ex ma tli Dios, a tzaj chqꞌon weꞌy. 46Quꞌn ayin wejiꞌy tspikyꞌin Dios, a ma tzul tzaluꞌn twutz txꞌotxꞌ, tuꞌntzin alkye knimil wiꞌja nlayxpen kyijx teꞌ toj qxopin.
47Me qa at jun ma bꞌinte nyola, ex mi xi tnimin, ok najil teꞌ; me nya npaja, quꞌn nya ma chin ula tuꞌn nkawiꞌn kyibꞌaj kykyaqil xjal, qalaꞌ noq tuꞌn kyklet wuꞌn. 48Ex ankye k-elil ikyꞌin weꞌy, ex mi xi tbꞌin nyola, at jun kkawil tibꞌaj; ayexjo yol, a o cheꞌx nqꞌmaꞌn. Ex ayexsin kchi kawiljo tiꞌj toj paꞌbꞌin twutz Dios, aj tjapin bꞌaj tqꞌijil tzaluꞌn twutz txꞌotxꞌ. 49Quꞌn ayejo nyola ex tkyaqil nxnaqꞌtzbꞌila nya weqekuy; qalaꞌ te nMaꞌn, a tzaj chqꞌoꞌn weꞌy. 50Bꞌiꞌn weꞌ wuꞌn qa ayejo Tyol Dios ma chi tzaj tqꞌmaꞌn, ayetzin ttxuyil chwinqiljo te jun majx. Tuꞌnpetziꞌn, oꞌkx nxi nqꞌmaꞌnjiꞌy tzeꞌnkuxjo ma tzaj nikꞌuꞌn weꞌy tuꞌn nMaꞌn.
Currently Selected:
Juan 12: mamC
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.